HOSEA 4
4
I Pue mantuluri Isaraeli
4:1-3
1I Pue reʼe kara-karaa pai waʼa ntau bangani ntana seʼi. Ee Isaraeli, pedongeka nunjaa anu da natoʼo, “Ri tana seʼi bereʼe kamonco bara towe, pai waʼa ntau banganinya bareʼe mangaʼaku ka-Yakunya Pue Ala. 2Tau seʼe montandokoro, paikanya bareʼe nabangani ntau seʼe; tau seʼe kambamba-mbamba topopepate, to pelima pai toposalara. Jaʼa kakoteranga-rangani, pai pepepate tepewali mombembelulu. 3Inceʼe painaka tana seʼi da mewali mangau-ngau, pai pura-pura anu tuwu njairia da mate. Mpengaya-ngaya pinatuwu anu ri raoa, ri karatana pai ri tasi da magero.”
I Pue mantuluri waʼa ntadu mpanyomba
4:4-10
4Ndatoʼo i mPue, “Ee waʼa ntadu mapnyomba, neʼe boi reʼe anu mampetisala bara mangkarausi waʼa ntauku, maka komimo anu Kupakasala! 5Ri eo ri wengi komi mangkainaka mowia salaa, ewanceʼe seʼe waʼa nabi. Inceʼe painaka Yaku da mangagero Isaraeli, inemu. 6Komi waʼa ntadu mpanyomba, bareʼe mampedongeka Yaku painaka marugi tau seʼe. Komi bareʼe mantarima waʼa mpepaguruku. Mewali Yaku woʼu bareʼe da mantarima komi, pai waʼa anami bareʼe da Kuʼaku mewali waʼa ntadu mpanyombaku.
7Kako teranga-rangani kasondo imbami, kako masalaa komi ri Yaku, ee waʼa ntadu mpanyomba! Inceʼe painaka katedinakami da kubalisaka. Komi bareʼemo da ndatubunaka, paikanya da ndapetikodi. 8Komi mewali koreʼe ua ngkasalaa waʼa ntau-Ku, inceʼe painaka ndipokono da naka tau seʼe mowia salaa mpaliu. 9Komi da mangaepe kapari ewa waʼa ntau sondo!. Yaku da mangahuku komi sintinaja pai waʼa mpowiami. 10Komi da mangangkoni ungka ri waʼa mpanyomba anu ndapasambaka, paikanya komi da maoro mpaliu. Komi da mampanyomba waʼa lamoa ngkalimbokori, paikanya waʼa ntaumi bareʼe da terangani, maka komi mampalaikamo Yaku ua da mampanyomba waʼa lamoa ntaninya.”
I Pue mangahuku panyomba ri lamoa
4:11–5:3
11Ndatoʼo i mPue, “Ee waʼa ntauku, madago anggoro anu masae bara anggoro anu dawoʼu inceʼe mampakapaya pangkotomi monawa-nawa anu madago. 12Komi merapi totoraka ungka ri kaju santompo! Sambaʼa toko mangantoʼoka komi, nunjaa anu da rayami da mangaincani! Komi ewa sambaʼa rongo anu bareʼe tumoro; komi mampalaika Yaku pai mampepombaika koromi ri waʼa lamoa ntaninya. 13Ri kareʼe waʼa mpanyomba ri lamoa ri waʼa mpongkuntana ri buyu, komi mampanyombaka panyomba, pai mantunju dupa ri waʼa mpuʼu ngkaju anu moko-moko njairia madago kaleru-lerunya.
Paikanya nunjaamo pewalinya? anami anu anaweʼa mewali weʼa anu betumoro pai waʼa maniami anu weʼa mewali toposalara! 14Paikanya Yaku bareʼe mangahuku powia ntau seʼe, maka komi ngkaliomi seʼe njoʼu ri waʼa mbeʼa anu betumoro anu motetala ri waʼa banua lamoa, sangkani-ngkani pai tau seʼe komi mampanyombaka panyomba ri lamoa. Monco kojo basa seʼi, ‘Banca anu bareʼe mampotumpu parata ndaya kono Pue Ala da magero!’
15Ee komi to Isaraeli, komi bareʼe todo ri Yaku! Paikanya, kupomata-mata Yahuda bareʼe da mampowia sala anu ewanceʼe! Neʼe manyomba ri Giligali bara ri Beteli. Neʼe montandokoro njairia mamposabi toʼo mPue anu tuwu. 16Komi, ee to Isaraeli, maʼai ngkapeni woʼo! Ewambeʼi da kupaleʼo mangkambi komi ewa bimba ri tongo mpada?”
17Waʼa nto Isaraeli tesoʼomo ri lamoa. Inceʼe painaka papaliukamo tauseʼe. 18Butu mayangu ua kasondo anggoro nainu, mawongko raya ntau seʼe mampobalu koronya. Tau seʼe napokono ndapetikodi painaka ndatubunaka. 19Inceʼe painaka tau seʼe da paya mawaro ewa nawui ngoyu. Tau seʼe da mangkoyo-koyo ea mata ua waʼa mpanyomba anu napanyombaka ntau seʼe ri waʼa lamoa.
Currently Selected:
HOSEA 4: LAIPMF
Highlight
Share
Compare
Copy
Want to have your highlights saved across all your devices? Sign up or sign in
