HOSEA 14
14
1Samaria sangaya-ngaya da ndahuku, ua mangaewa Yaku. Waʼa mpalilinya da mate ri pombetoto; waʼa ongaanya da ndaija-ijaki, pai waʼa mbeʼa anu manee koro da ndabira komponya.”
I Hosea mamperapi da naka Isaraeli majea
14:2-4
2Pewalilimo ri Pue Ala puemu, ee banca Isaraeli! Salaamu inceʼe mampapopuʼu siko teparangkaja painaka madungka. 3Pewalilimo ri Pue pai paratamo pekakai seʼi ewa sambaʼa panyombamu ri Sira, “Pue neʼemo ndikitanaka waʼa ncalaa mami, pai ndisabemo pakakai mami seʼi, da naka kami mangaunde komi, ewa anu roomo kajanji. 4Asuri bareʼe nakoto da mancorepaka kami, pai nyara mpoʼiwali bareʼe nakoto da mampelae kami. Kami bareʼemo da mangantoʼoka waʼa nturuki powia mpale mami katau seʼe Pue Ala mami. Boo Pue, komi mangampokapuru waʼa ntau anu pindongo bereʼe tau da petiondanya.”
I Pue majanjika to Isaraeli katuwu dawoʼu
14:5-9
5Ndatoʼo i mPue,
“Waʼa ntau-Ku anu bareʼe tumoro, kuwali ntima muni,
pai kupotowe ri kaliogu ndayaku;
tau seʼe bareʼemo kupokarau.
6Tila nto Isaraeli Yaku da ewa uja
anu mabubusi tana anu mangau-ngau.
Tau seʼe da meboʼa ewa sese
pai ewa puʼu ncemara anu mainti pokalenya.
7Tau seʼe da tuwu pai da kakoteranga-rangani,
da ewa pinamuya anu mowayo sape-sape
ewa puʼu saitu kadolidinya
mawongi ewa puʼu ncemara!
8Tau seʼe da mewalili ri Yaku
pai da maroo-roo ri pangkariani-Ku.
Ganggara kojo tau seʼe da teranga-rangani kagana-gana ngkatuwunya,
ewa gandu anu tuwu ri bonde anu maboko,
pai da ewa bonde anggoro.
Ewa ua anggoro Libano
toʼo ntau seʼe da tebambari.
9To Isaraeli da mantajika waʼa nturuki lamoanya;
tau seʼe da Kuporewu pai da Kupedongeka pekakainya.
Ewa puʼu ngkaju anu bareʼe bali-bali karombo iranya,
Yaku da mangampayuni tau seʼe
Yakumo puʼu mpengaya-ngaya popadonco tila ntau seʼe.
Yaku, Pue, anu mantoʼomo seʼi.”
Kapusanya
14:10
10Mbolimo pura-pura anu loʼe mangarata ndaya nunjaa anu teʼuki ireʼi, pai da mamparindaya. Waʼa mpatada ungka ri Pue paka monco, pai tau anu meaya da tuwu malulu patada setu. Paikanya tau masalaa bareʼe da ndapedongeka, painaka teparangkaja pai manawu.
Currently Selected:
HOSEA 14: LAIPMF
Highlight
Share
Compare
Copy
Want to have your highlights saved across all your devices? Sign up or sign in
