HOSEA 13
13
Botusi anu kapusanya kono popahuku tila Isaraeli
13:1–14:1
1I owi lemba Eparai ndatubunaka, painaka ane reʼe songka ungka ri lemba setu waʼa lemba ntaninya ri Isaraeli medonge. Paikanya lemba Eparai masalaa ua panyomba ntau seʼe ri Baali, inceʼe painaka siʼa da paya. 2Nakarataka wawaseʼi waʼa nto Eparai setu ntongo mowia salaa mpaliu; tau seʼe mampowia waʼa nturuki salaka da napanyomba; turuki anu podo napowia ua kaloʼe mpale ntolino. Natoʼo ntau seʼe, “Ndipanyombakamo panyomba ri waʼa nturuki seʼi!” Meawa kojo ndapopogeleka, tolino mangaeki turuki ana japi! 3Inceʼe painaka waʼa ntau seʼe dapaya ewa gawu bara ewa rini ri tempo mpowuro. Tau seʼe da ewa awu deami anu nawui ngoyu ri pangaii gandu, pai ewa rangasu anu mesuwu ungka ri wobo mpesuwu ndangasu.
4Ndatoʼo i mPue, “Yakumo Pue Ala puemu, anu mampapesuwu siko ungka ri tana Masiri. Komi bareʼe mampotumpu Pue Ala ntaninya, waʼanya podo Yaku. Podo Yaku ngkalioku Toponcorepakamu. 5#Paw. 8:11-17 Ri tana mangau ri pada bone, Yakumo anu mangkariani komi. 6Paikanya jabutu komi meari ri tana anu madago, komi mabosu rantani osa rayami, komi mewali mekiunde pai ndikalinganimo Yaku. 7Inceʼe painaka Yaku da mantarangkaku komi ewa powia singa tumunda, ewa harimau bulatu Yaku da mangantundani komi ri jaya. 8Yaku da mampesuwuki komi ewa beruangi anu tetaji waʼa ananya. Yaku da mangasempati komi. Da ewa singa da mangancoko komi ri kareʼemi, pai ea pinatuwu anu masii Yaku da mangasempati komi.
9Yaku da mangagero komi, ee banca Isaraeli! Pai isema anu mangkoto da mampelae komi? 10#1 Sem. 8:5-6 Komi merapi mokole pai tadulako, paikanya mbeʼimo waʼa ntau setu pura-pura seʼi-seʼi. Ara nakoto ntau seʼe mangalapasaka komi? 11#1 Sem. 10:17-24, 15:26 Ri karau ndayaku kuwaika komi mokole, pai ri kapane ndayaku kuwali noʼo muni tau seʼe.”
12Ndatoʼo i mPue, “Salaa pai sala Isaraeli roomo ndauki, pai ukinya seʼe reʼe ndapakoroka. 13Kamonconya Isaraeli ntongo ndawaipa tempo da tuwu, paikanya siʼa maʼai ngkatengo painaka bareʼe napoyoweka tempo setu. Siʼa jamo ewa ongaa anu jamo sakodi tempo da ndapoʼongaamo, paikanya siʼa bareʼe napokono mesuwu ungka ri raya ngkompo inenya. 14#1 Kor. 15:55 Banca seʼi bareʼe da kusorepaka ungka ri kareʼa ntau mate. Ee kapate pesawukamo impomu! Wianakamo tetalamu anu mampakagero setu! Yaku bareʼemo da mampokapuru banca seʼi. 15Mau Isaraeli malimbokori ewa weo anu lese katuwunya, paikanya Yaku da mampokau ngoyu mosompo anu mapane ungka ri pada bone. Ngoyu setu anu da mampakangau waʼa mata ue pai waʼa ntibubu, painaka payamo pura-pura anu reʼe yowenya.
Currently Selected:
HOSEA 13: LAIPMF
Highlight
Share
Compare
Copy
Want to have your highlights saved across all your devices? Sign up or sign in
