YOELI 1
1
Patada ri Yoeli
1:1
1Ewaseʼi nuntu i mPue ri Yoeli, ana i mPetueli.
Waʼa nto Isaraeli mapari rayanya maka bangani njamaanya pura nakoni ntupako
1:2-20
2Pedongekamo ee waʼa ntau tuʼa;
patomatamo, pura-pura tau ri Yahuda.
Bara reʼemo pewalinya anu ewanceʼi ri tempo ngkatuwumi,
bara ri tempo ngkatuwu waʼa ntau piamomi?
3Tuntuka waʼa anami nunjaa anu mewali setu;
da naka tau seʼe woʼu mangantuntuka waʼa ananya.
Ewanceʼe seʼe mulinya anu nepa da rata sangaya-ngaya da mangadonge woʼu tuntuka anu da mewali setu,
pai da mangantuntuka woʼu waʼa mulinya.
4Tupako anu sondo bareʼe ndaincani imbanya,
metopa ri waʼa njamaa pai mampapurasi waʼa bangani njamaa,
nunjaa anu totaʼa yabi mpangkoni ntupako anu sancuncu seʼi,
napapurasi ntupako anu sancuncu woʼu
5Ee waʼa ntopoyanga-yangu, pembangumo!
Ee waʼa ntopanginu, ndipotumangimo!
Maka anggoro anu dawoʼu
roo ndarampa ungka ri ngujumu.
6 #
Pepat. 9:8
Gerombola ntupako mangaungku tanata;
tau seʼe maroso, pai bareʼe ndaincani kasondo imbanya,
ngisinya ewa kataja ngisi ncinga tina.
7Tau seʼe mampapurasi puʼu anggorota,
pai puʼu arata jamo tuʼanya.
Waʼa wotonya pura nalepasi pelanya,
painaka mabuya-buya raʼanya.
8Potumangimo, ee waʼa ntau, ewa anaweʼa anu mapari rayanya
anu mantangisi kamate ntengeanya anu napomawo.
9Gandu pai anggoro bemoreʼe
ri Banua i mPue.
Painaka nakabalusimo waʼa ntadu mpanyomba
anu todo mamporiokoi i Pue.
10Waʼa njamaa seʼi-seʼi malesamo.
Tana mongkabalusi;
maka mpengaya-ngaya gandu puramo,
makaramo wua anggoro,
pai puramo lana saitu.
11Ee topojamaa, ndipokukuoumo!
Ee topobonde anggoro, ndipotumangimo!
Maka gandu pai jole kuku pai pura-pura bangani njamaa malesamo.
12Waʼa mpuʼu ngkaju anu mowua ri pada mangaumo pura-pura:
puʼu anggoro, apeli, ara, koroma pai delima.
Inceʼe painaka waʼa ntau sondo bareʼemo mawongko rayanya.
13Ee waʼa ntadu mpanyomba anu mamporiokoi lampaʼani,
porengkokamo karu pai potumangimo.
Pesuamo ri raya Banua i mPue, da motumangi sambangi muntu,
maka bareʼemo da reʼe anggoro mpanyomba pai gandu da ndapanyombaka ri Pue Ala puemu.
14Songkamo waʼa ntaumu da mopuasa,
pareʼemo pogombo bangke!
Peboomo waʼa ntadulako pai waʼa ntau tuʼa
pai pura-pura bangani Yahuda,
da naka rata ri Banua i mPue Ala,
da naka meboo merapi tulungi ri Sira.
15 #
Yes. 13:6
Eo i mPue mosumo, eo anu ndapokaeka setu;
tempo Sira Anu Makuasa da mampareʼe kagero.
16Pangkoni puramo magero
ri suarata Banua i mPue Ala pueta
bareʼemo da reʼe podoro-doro.
17Inii mate ri tana anu mangau-ngau,
bareʼemo reʼe gandu da ndapariala,
inceʼe painaka waʼa ala soa-soa painaka marua ngkabongo.
18Waʼa mpinatuwu mengara mapari rayanya;
maka bareʼemo reʼe ewo da naande.
Ewanceʼe dompu bimba da yoga.
19Yaku merapi tulungi ri Komi, boo Pue
maka waʼa mpada mpongkambi puramo mangau,
waʼa mpuʼu ngkaju woʼu puramo mangau, mate
jamo ewa anu nasuwe apu.
20Sakopa waʼa mpinatuwu anu maila ri yopo
meboo merapi tulungi ri komi.
Bareʼemo naleʼo ntau seʼe mampakaʼosa karanganganya.
Maka waʼa ngkoro ue puramo mangau.
Currently Selected:
YOELI 1: LAIPMF
Highlight
Share
Compare
Copy
Want to have your highlights saved across all your devices? Sign up or sign in
