YEHESIKIELI 46
46
Tau makuasa pai podede ncongka mposusa
46:1-12
1I Pue Anu ndate ri Peawanya mantoʼo, “Wombo anu ri pebetea anu da njoʼu ri tambale anu ri rayanya da ndadampo mpaliu sangkasae eo mpotetala anu aono eo. Baa-baa setu podo maya ndaloka ri Eo Umapo pai ri eo mPosusa Wuya Dawoʼu. 2Ri waʼa eo setu waʼa anu makuasa sangaya-ngaya da mesua ungka ri tambale anu ri sambalikunya moliu ri lincu bangke nepa da mekakore ri sori nono baa-baa, sindara waʼa ntadu mpanyomba ngkasimadago ungka ri tau anu makuasa setu. Ri baa-baa setu siʼa sangaya-ngaya da mombukotu manyomba ri Pue, nepa malai. Roo setu rantani mawengi baa-baa setu bareʼe maya ndaloka. 3Ri suara baa-baa setu, pura-pura tau sondo sangaya-ngaya da mombukotu manyomba ri Pue, sangkani-sangkani eo Umapo pai ri Posusa Wuya Dawoʼu.
4Ri Eo Umapo waʼa anu makuasa setu sangaya-ngaya da mampanyombaka ri Pue panyomba anu ndaʼombasi inceʼemo aono ana bimba pai sambaʼa bimba laki, pura-pura anu bereʼe posarinya. 5Sangkani pai bimba laki setu sangaya-ngaya da ndapanyombaka woʼu panyomba gandu 17,5 literi kasondonya, sangkani pai waʼa ana bimba setu ndapanyombaka woʼu gandu gori ngkagananya. Waʼa mpanyomba gandu sangaya-ngaya da ndayunuki pai panyomba lana saitu tatogo literi.
6Ri tempo Posusa Wuya Dawoʼu panyomba setu sangaya-ngaya da motaʼa sambaʼa japi laki, aono ana bimba, pai sambaʼa bimba laki, pura-pura setu bereʼe posarinya. 7Simpoyunu pai sambaʼa japi laki pai mbula laki, siʼa sangaya-ngaya da mampanyombaka gandu 17,5 literi kasondonya, simpoyunu pai wungka-wungka ana bimba, tesangkuja anu ndapokono mampanyombaka. Sangkani-sangkani ndapanyombaka gandu sangaya-ngaya da ndayunuki pai panyomba tatogo literi lana saitu.
8Ane waʼa anu makuasa da mawianaka panyomba ri Banua-Ku, siʼa sangaya-ngaya da mesua moliu ri lincu bangke, pai pewalilinya woʼu da mojaya njairia seʼe. 9Paikanya, ane ri waʼa eo bangke tau sondo rata manyomba ri Pue, tau seʼe anu mesua moliu ri baa-baa utara, pewalilinya sangaya-ngaya da moliu ri baa-baa selata, ane roomo manyomba tau seʼe. Pai waʼa ntau anu mesua moliu ri baa-baa selata, pewalilinya sangaya-ngaya da moliu ri baa-baa utara. Waʼa ntau bareʼe maya mewalili ri baa-baa mpesuanya ngena; tau seʼe sangaya-ngaya da mewalili moliu ri baa-baa anu ri sambiranya. 10Waʼa anu makuasa sangaya-ngaya da mesua ri Banua i mPue sangkani-ngkani pai tau sondo pai pewalilinya sangaya-ngaya da moyunu pai tau sondo woʼu.
11Ri waʼa eo mposusa pai eo bangke, da simpoyunu pai sambaʼa japi laki pai sambaʼa-sambaʼa bimba laki sangaya-ngaya da ndapanyombaka 17,5 literi gandu, simpoyunu pai sambaʼa-sambaʼa ana bimba, da ndapanyomba woʼu gandu, kasondonya malulu pepokono ntau anu manyomba. Sangkani-sangkani da mampanyombaka gandu sangaya-ngaya da simpoyunu pai panyomba tatogo literi lana saitu.
12Ane waʼa anu makuasa da rayanya mawai panyomba ngkabuya ndaya ri Pue, madago motaʼa panyomba anu ndaʼombasi bara panyomba ngkasimadago, baa-baa pebetea anu da njoʼu ri soma anu ri rayanya sangaya-ngaya da ndalokaka siʼa. Siʼa sangaya-ngaya. Siʼa sangaya-ngaya da mampanyombaka panyomba setu ewa pampanyombaka panyomba ri eo Umapo, paikanya ane mewalilimo siʼa, baa-baa setu da ronga ndadampo muni.”
Panyomba sandeme-sandeme
46:13-15
13Ndatoʼo i mPue, “Sandeme-sandeme ri tempo mpowuro, sambaʼa ana bimba anu tinuwunya santaʼu pai bereʼe posarinya sangaya-ngaya da ndapanyombaka mewali panyomba anu ndaʼombasi tila i mPue. 14Banya podo inceʼe, sampowuro-sampowuro sangaya-ngaya da ndapanyombaka woʼu radua kilo gandu pai sambaʼa literi lana saitu anu ndagaloka gandu setu. Inceʼemp panyomba gandu anu sandeme-sandeme sangaya-ngaya da ndapanyombaka ri Pue; ada setu da tewianaka rantani masae-sae. 15Sampowuro-sampowuro sangaya-ngaya bareʼe bali-bali ndapampanyombaka ri Pue: Sambaʼa ana bimba, panyomba gandu pai lana saitu.”
Tana anu napotumpu mokole
46:16-18
16I Pue Anu Ndate ri Peawanya mawai songka ndatoʼo, “Ane anu makuasa moparenta mawai santila ungka ri tana pantanya ri sambaʼa ananya tuama, tana setu da napotumpu ananya setu pai da mewalimo aga-aga ncomborinya. 17#Tad. 25:10 Paikanya ane anu makuasa setu mawai santila ungka ri tana pantanya setu ri sambaʼa anamayununya, tana setu da mewalili muni ri anu makuasa setu ri taʼu pampapewalili. Tana setu siʼa tumpunya pai podo siʼa pai waʼa ananya tuama anu maya mampotumpu mpaliu tana setu. 18Anu makuasa setu bareʼe maya mantima mau podo sakodi ntano ungka ri aga-aga anu napopanta mpalilinya. Podotananya ngkalionya anu maya nawaika waʼa ananya pai bareʼe da reʼe mau sambaʼa tau ungka ri waʼa ntau-Ku anu da ndagaʼati pai aga-aganya.”
Waʼa rapu ri Banua i mPue
46:19-24
19Ungka lairia tuama setu mampoyunu yaku moliu ri wombo anu ri sori baa-baa, njoʼu ri waʼa lincu magali anu mosuara ri utara. Waʼa lincu setu ndapatokaka waʼa ntadu mpanyomba. Tuama setu mantujuka yaku lincu anu ri tandonya tondo kasoyoa, 20nepa natoʼo, “Ireʼi waʼa ntadu mpanyomba sangaya-ngaya da mangalugai panyomba poncompo salaa pai panyomba mpombayari sangkani pai pantunu panyomba gandu, da naka mau sakodi ungka ri panyomba anu magali setu ndakoni ri tambale anu ri sambalikunya painaka da mampakarugi tau sondo.”
21-22Ungka lairia napoyunu yaku njoʼu ri tambale anu ri sambalikunya pai natujuka yaku ri aopo sunonya, wungka-wungka njau tambale anu kodi, karatenya 20 meteri pai 15 meteri kabininya. 23Wungka-wungka tambale setu natolilimi tembo watu pai ri tembo watu setu njau waʼa ntondi. 24Natoʼo ntuama setu ri yaku, “Inceʼemo waʼa rapu napalugai waʼa ntoporioko ri Banua i mPue waʼa mpanyomba anu napanyombaka ntau sondo.”
Currently Selected:
YEHESIKIELI 46: LAIPMF
Highlight
Share
Compare
Copy
Want to have your highlights saved across all your devices? Sign up or sign in
