YEHESIKIELI 45
45
Tubu ntana anu ndapatani tila i mPue
45:1-6
1Ri kabareʼepanya tana setu ndatila-tila da mewali panta ri sambaʼa-sambaʼa lemba seʼe sangaya-ngaya da ndapatani santila tila i mPue. Karatenya da gana-gana 12,5 kilo meteri, pai kabininya sampuyu kilo meteri. Tana anu nasango ntubu setu inceʼemo tana magali. 2Tila mpawangu Banua i mPue ndatima ungka ri tana setu santila anu tubunya da mosulapa aopo, tubunya sanculapa seʼe 250 meteri, natolilimi ntanalapa anu 25 meteri kabininya, njairia da ndapawangu Banua i mPue. 3Santila radua ungka ri tana setu, anu karatenya 12,5 kilo meteri pai kabininya alima kilo meteri inceʼe sangaya-ngaya da ndapatoka da ndapawangu Banua i mPue, inceʼemo tana anu magali mpodago. 4Tana setu magali pai ndapatokaka waʼa ntadu mpanyomba anu motetala mawianaka panyomba ri Banua i mPue. Santika ungka ri tana setu da ndapangawangu banua ntau seʼe, pai santila woʼu tila da ndapawangu Banua i mPue. 5Sampotila radua tana setu anu tubunya 12,5 kilo meteri karatenya api alima kilo meteri kabininya, inceʼe sangaya-ngaya da ndapatokaka waʼa nto Lewi anu motetala ri raya Banua i mPue. Njairia da ndapawangu waʼa ngkota da kareʼe mpeari ntau seʼe.
6Ri sambaliku ntana anu magali setu, sangaya-ngaya da reʼe woʼu tana, anu karatenya sampuyu pai radua santongo kilo meteri, pai kabininya radua santongo kilo meteri, da ndapawangu sambaʼa kota, anu maya napeari isema ntano ungka ri oyo nto Isaraeli.
Tana tila ntau makuasa anu moparenta
45:7-8
7Tila ntau anu makuasa anu moparenta sangaya-ngaya da ndapatokaka woʼu tana. Tana setu da motida-tida pai tana anu ndapatani tila i mPue setu, ungka ri tidanya tondo kasoyoa rata ri Tasi ri Tongo, pai ungka ri tida ntana anu ndapatani setu tondo pebetea, rantani rata ri tida ntana setu tondo pebetea. Mewali karatenya da siwia pai karate santila tana anu ndawaika waʼa lemba nto Isaraeli. 8Tana setu da napotumpu ntau makuasa anu moparenta ri tana Isaraeli, da naka neʼe nakodisi woʼu waʼa ntau-Ku, paikanya waʼa ntana yabinya setu da nawai napotumpu waʼa lemba nto Isaraeli.
Kinoyo waʼa ntau makuasa anu moparenta
45:9-17
9I Pue Anu Ndate ri Peawanya mantoʼo, “Ganamo karia waʼa ncalaamu, ee waʼa ntau anu makuasa ri Isaraeli! Peʼontokamo powiamu anu malulu pepokonomu anu majeani waʼa mpalili setu. Wianakamo anu monco pai mayoa. Neʼe kojo boi ndiiri waʼa ntauku ungka ri tana ntau seʼe. Yaku Pue Anu Ndate ri Peawanya mampesongkaka incetu ri komi.
10 #
Tad. 19:36
Pakemo dasi pai pobanga anu monco:
11Sambaʼa epa anu ndapake mabanga anu mangau sangaya-ngaya da siwia banganinya pai sambaʼa kati anu ndabangaka anu maue. Tubunya sangaya-ngaya da sambaʼa homeri.
12Mewali da ewanceʼi waʼa mpobanga setu:
1 homeri = 10 epa = 10 bati
1 mina = 60 sikali.
13-15Inceʼemo podasi anu da mampakanoto waʼa mpanyomba:
gandu:
1/60 ungka ri pandata mpomotamu jole kuku:
1/60 ungka ri pandata mpomotamu
lana saitu:
1/100 ungka ri pandata waʼa mpuʼu saitu.
(Pobanga malulu bati: 10 bati = 1 homeri = 1 kori)
bimba:
sambaʼa bimba ungka ri anu 200 imbanya.
Komi sangaya-ngaya da mampanyombaka panyomba gandu, panyomba anu ndaʼombasi, paipanyomba ngkasimadago da naka bareʼe ndakitanaka salaami. Yaku Pue Anu Ndate ri Peawanya anu mawai songka kono inceʼe.
16Pura-pura tau bangani ntana seʼi sangaya-ngaya da mangkeni waʼa mpanyomba setu ri tau makuasa anu moparenta ri Isaraeli. 17Siʼamo anu sangaya-ngaya da maoli pinatuwu anu da mewali panyomba anu ndaʼombasi pai waʼa gandu panyomba pai anggoro panyomba tila pura-pura banca Isaraeli ri tempo waʼa eo bangke, Posusa Wuya Dawoʼu, waʼa eo Umapo pai waʼa eo bangke ntaninya. Siʼa sangaya-ngaya da mampatoka panyomba ngkabareʼenya ndakitanaka salaa, gandu mpanyomba, panyomba anu ndaʼombasi, pai panyomba ngkasimadago da mamperapi kabareʼenya ndakitanaka salaa tila banca Isaraeli.”
Waʼa eo bangke
45:18-25
(Pa. 12:1-20, Tad. 23:33-43)
18I Pue Anu Ndate ri Peawanya mantoʼo ri waʼa ntau-A, “Ri sambaʼa eo mbuya anu kaʼisa, komi sangaya-ngaya da mampakagali Banua-Ku da ndipanyombaka sambaʼa japi laki anu mangurapa anu bereʼe posarinya. 19I Tadu mpanyomba sangaya-ngaya da mantima daa ungka ri panyomba anu mancompo salaa setu, nepa da naeseka waʼa ntungka mbombo ri Banua-Ku, pai ri aopo suno lampaʼani, pai ri waʼa nono baa-baa anu da njoʼu ri tambale anu ri rayanya. 20Ewanceʼe seʼe da ndipampowia ri papitu eo mbuya setu, ri waʼa ntau anu mowiamo salaa ua kabareʼenya naʼoamo bara ua kabareʼenya naincani. Ewanceʼe da ndipampowia mamporewu kagali Banua-Ku.
21 #
Pa. 12:1-20, Pai. 28:16-25 Ri sampuyu aopo eo mbuya anu kaʼisa, komi sangaya-ngaya da mawianaka Posusa Pasa. Papitu ndeme kasaenya, pura-puratau sangaya-ngaya da mangkoni roti anu bareʼe ndaragi. 22Ri eo anu kaʼisa, tau makuasa anu moparenta sangaya-ngaya da mampanyombaka sambaʼa japi laki da mewali panyomba poncompo salaa da tilanya pai tila ntau sondo. 23Ri tempo mposusa anu papitu ndeme setu, sandeme-sandeme siʼa sangaya-ngaya da mampanyombaka ri Pue papitu japi laki pai papitu bimba laki anu bereʼe posarikanya, nepa da ndaʼombasi ngkewaʼa-waʼa. Sandeme-sandeme siʼa sangaya-ngaya da mampanyombaka sambaʼa mbula laki da mewali panyomba poncompo salaa. 24Pai da mampanyombaka woʼu gandu 17,5 literi tila sambaʼa japi laki pai tatogo literi lana saitu tila sambaʼa bimba laki.
25 #
Tad. 23:33-36, Pai. 29:12-38 Ri Posusa mPokuani anu da ndatepuʼu ri sampuyu pai alima eo mbuya kapapitu, sandeme-sandeme ri raya anu papitu ndeme setu tau anu makuasa setu sangaya-ngaya da mampanyombaka waʼa mpanyomba anu siwia, inceʼemo panyomba kabareʼenya ndakitanaka salaa, panyomba anu ndaʼombasi, panyomba gandu pai lana saitu.”
Currently Selected:
YEHESIKIELI 45: LAIPMF
Highlight
Share
Compare
Copy
Want to have your highlights saved across all your devices? Sign up or sign in
