YEHESIKIELI 43
43
I Pue mewalili ri Banua-A
43:1-12
1Ungka lairia tuama setu mampoyunu yaku njoʼu ri baa-baa anu mosuara ri tondo pebetea. 2#Yeh. 10:3-4, 18:19, 11:22-23, Pepat. 1:15 Njairiamo kupangangkita, reʼe rara anu makilaya rata ungka ri tondo pebetea anu mantuju kanjau i mPue Ala pue nto Isaraeli. Oni nganga i mPue Ala ewa pokuu ntasi, pai lino mengkido-ngkido nasindi rara ngkarata i mPue Ala. 3Pepatongawa setu siwia pai anu kukita ri tempo karata i mPue Ala mangagero Yerusale, pai ewa anu kukita ri Koro Kebari. Painaka mombukotu yaku manyomba. 4Sindi anu makilaya setu molengko maliu baa-baa tondo pebetea nepa mesua ri raya Banua i mPue.
5Inosa i mPue maʼokotaka yaku pai ndakeni njoʼu ri tambale anu ri rayanya njairia kukita Banua i mPue nakulamuti rara ngkarata i mPue. 6Sindara tuama setu ntongo mekakore ri soriku, kudonge i Pue mompau ri yaku ungka ri raya Banua i mPue, natoʼo, 7“Ee tolino anu podo awu ntana, inceʼemo gadera mpoparenta-Ku. Ireʼimo da karoo-rooku ri tongo-tongo nto Isaraeli pai pai moparenta ri tau seʼe rantani masae-sae. Madago tau seʼe, ewanceʼe seʼe waʼa mokole ntau seʼe, bareʼemo da mampakakarika Toʼo-Ku anu magali ri panyomba lamoa bara ri pangadayo ntau seʼe watangkoro waʼa mokole ntau seʼe ireʼi. 8I owi waʼa mokole ntau seʼe mampowia waʼa wombo pai waʼa nono dampo langkanae ntau seʼe ri sori waʼa wombo pai waʼa nono dampo Banua-Ku, painaka jamo santapi rindi anu maoyoti. Tau seʼe mampakakarikamo Toʼoku anu magali pai powia ntau seʼe anu karika. Inceʼe painaka kuʼopisaka tau seʼe ri karau ndayaku. 9Paikanya montepuʼu seʼi-seʼi tau seʼe sangaya-ngaya da mampeʼontoka panyomba ri lamoa pai da malimba waʼa watangkoro waʼa mokole ntau seʼe. Roo setu nepa da maroo-roo yaku ri tongo-tongo ntau seʼe rantani masae-sae.”
10Nepa mompau woʼu i Pue ndatoʼo, “Ee tolino anu podo awu ntana, paratakamo waʼa nto Isaraeli kakononya Banua-Ku seʼi, pai pokaumo tau seʼe mamparesa nunjaa anu natangara. Pakaeamo tau seʼe ua waʼa ncalaanya. 11Pai ane maeamo mata ntau seʼe ua waʼa mpowianya, totorakakamo tau seʼe potaʼa Banua-Ku seʼi: potaʼanya, waʼa wombo mpesua pai pesuwu, posucu ngkatewangunakanya, waʼa mpodedenya pai waʼa mpadikanya. Ukimo pura-pura setu tila ntau seʼe da napangkita pai napari ndaya ntau seʼe ewambeʼi da napampapodede mpengaya-ngaya, pai da napalulu ntau seʼe pura-pura podedenya. 12Inceʼimo kantaninya katedikanaka Banua i mPue: Juku-juku tana anu mantolilimi ri lolo buyu setu magali mpodago.”
Lampaʼani
43:13-17
13 #
Pa. 27:1-2, 2 Taw. 4:1 Seʼimo tubu lampaʼani malulu pontubu anu ndapake mantubu Banua i mPue. Mantolilimi nono lampaʼani lau jaya ue anu ndakae santongo meteri kayombunya pai santongo meteri woʼu kabininya, pai wiwinya tondo ri sambalikunya sampotila aopo meteri kandatekanya. 14Ungka ri jaya ue rata ri katebata lampaʼani anu tondo ri tongonya radua meteri kandatekanya, pai yabi santongo meteri kakopinya pai jaya ue anu mantolilimi nono lampaʼani. Anu katatogo inceʼe wawo lampaʼani, inceʼe woʼu yabi santongo meteri kakopinya painaka lili ntongonya. 15Tila anu katatogo seʼi inceʼemo kareʼe mpaʼombasi panyomba; radua meteri kandatekanya. Ri sunonya aopo njau anu meuntu-untu ewa tondu. 16Wawo lampaʼani setu mosulapa aopo, sanculapa-sanculapa seʼa karatenya aono meteri. 17Tondo tongonya woʼu mosulapa aopo, sanculapa-sanculapa seʼe karatenya papitu meteri, pai simpinya tondo ri sambalikunya anu sampotila aopo meteri kandatekanya. (Kabini jaya uenya santongo meteri). Ri apanya tondo pebetea reʼe eja anu da ndeku ri wawo lampaʼani.
Pampanyombaka Lampaʼani
43:18-27
18 #
Pa. 29:35-37
I Pue Anu Ndate ri Peawanya mantoʼoka yaku, “Ee tolino anu podo awu ntana, pedongeka nunjaa anu da Kutoʼoka siko. Ane roomo ndawangu lampaʼani setu sangaya-ngaya da nupanyombaka da nuʼombasi panyomba ri wawonya pai da nuwebusika daa anu ndapanyombaka. 19Podo tadu mpanyomba muli i Sadoki ungka ri muli i Lewi, anu maya rata ri suara-Ku da mawianaka panyomba. Yaku Pue Anu Ndate ri Peawanya anu mampesongkaka incetu. Waika tau seʼe sambaʼa ana japi laki anu mangurapa da mewali panyomba mpaosu salaa. 20Timamo sakodi daanya, gereka tondu lampaʼani aopo anu njau ri aopo ncuno wawo lampaʼani setu. Ewanceʼe da nupampowia pampanyombaka lampaʼani setu pai mampatani inceʼe tilaku. 21Roo setu timamo sambaʼa japi laki anu da mancompo salaa setu, ombasimo ri kareʼe anu roo ndapakanoto, inceʼemo ri sambaliku ngkagali Banua i mPue. 22Bangke reme siko sangaya-ngaya da mampanyombaka sambaʼa mbula laki anu bereʼe posarinya da mewali panyomba mpasompo salaa. Pakagalimo lampaʼani setu pai daa mbula, siwia pai nupampowia japi laki anu mangurapa setu. 23Ane roomo nuwianaka inceʼe, timamo sambaʼa japi laki anu mangurapa pai sambaʼa mbula laki anu mangurapa, pinatuwu anu radua setu neʼe reʼe posarinya, 24nepa nukeni ri Yaku. Waʼa ntadu mpanyomba sangaya-ngaya da mampesawuka bure ri wawo mpinatuwu radua setu pai da mangaʼombasi mewali panyomba ri Yaku. 25Sandeme-sandeme ri raya anu papitu ndeme, siko sangaya-ngaya damampanyombaka sambaʼa mbula, japi laki anu mangurapa, pai mbula laki, tila mpanyomba pancompo salaa. Waʼa mpinatuwu setu neʼe boi reʼe posarinya. 26Papitu ndeme kasaenya waʼa ntadu mpanyomba da mawianaka upacara pampanyombaka lampa ani pai da mampatikali naka madago ndapake. 27Kapusa anu papitu ndeme setu, waʼa ntadu mpanyomba sangaya-ngaya da montepuʼumo mawianaka panyomba ri wawo lampaʼani setu panyomba anu ndaʼombasi pai panyomba ngkasimadago tila ntau sondo. Ane ewanceʼe da kupokawongko komi pura-pura. Yaku Pue Anu Ndate ri Peawanya, mantoʼomo seʼi.”
Currently Selected:
YEHESIKIELI 43: LAIPMF
Highlight
Share
Compare
Copy
Want to have your highlights saved across all your devices? Sign up or sign in
