YEHESIKIELI 42
42
Radua banua mosu ri Banua i mPue
42:1-14
1Ungka lairia tuama setu mampoyunu yaku njoʼu ri tambale anu ri sambalikunya nepa naponinika yaku njoʼu ri banua ntaninya ri tondo utara Banua i mPue setu, baree lawa ungka ri banua bangke anu ri tondo kasoyoa Banua i mPue setu. 2Banua setu karatenya 50 meteri pai kabininya 25 meteri. 3Apa banua setu sambira mosuara ri tambale anu kabininya 10 meteri, pai apanya anu ntaninya mosuara ri joia watu ri tambale anu ri sambalikunya. Banua setu tatogo ntapi; santapi-santapi seʼe tesalukodi pai anu ri aranya. 4Ri suara waʼa lincu setu tondo ri rayanya reʼe jaya kodi anu 5 metere kabininya pai karatenya 50 meteri. Waʼa wombonya pura-pura mosuara tondo ri utara. 5Waʼa lincu anu ri wawonya kodi sakodi pai waʼa lincu anu ri aranya, inceʼe painaka waʼa jaya kodi anu ri suara waʼa lincu anu ri wawonya inceʼe mabini painaka jaya kodi anu lau ri aranya. 6Waʼa lincu setu tatogo ntapi pai bareʼe nasungko nono ewa waʼa banua anu reʼe ri soma. 7-8Santila ungka ri lincu anu ri aranya sangkarate 25 meteri podo ewa tembo, pai anu sumpanya 25 meteri seʼe, ndawangu waʼa lincu. Ri tapi anu ri wawonya mpodago reʼe waʼa lincu sangkarate banua setu. 9-10Ri ara waʼa lincu anu ri tando banua setu tondo pebetea pai ri puʼu tembo, reʼe sambaʼa wombo anu da njoʼu ri tambale ri sambalikunya.
Ri apanya tondo selata Banua i mPue, reʼe banua anu siwia, bareʼe lawa kareʼenya pai banua anu ri tondo kasoyoa. 11Ri suara waʼa lincunya reʼe sambaʼa jaya kodi anu siwia pai jaya kodi ri tondo utara. Tubunya siwia, taʼanya siwia pai waʼa wombonya woʼu siwia. 12Ri ara waʼa lincu ri apanya tondo selata, inceʼemo tandonya tondo pebetea ri puʼu tembo, reʼe woʼu sambaʼa wombo.
13Natoʼo ntuama setu ri yaku, “Banua radua setu magali. Njairia waʼa ntadu mpanyomba anu maya mancuara karata i mPue, mangkoni waʼa mpanyomba anu magali mpodago. Njairia seʼe woʼu sangaya-ngaya da ndapadika waʼa mpanyomba anu magali mpodago, inceʼemo panyomba: gandu pai panyomba poncompo salaa bara panyomba poncawani rugi. 14Ane roomo mawianaka tetalanya waʼa ntadu mpanyomba ri Banua i mPue, pai da njoʼu ri sambalikunya, waʼa rengko anu ndapatani napake ntau seʼe mamporiokoi panyomba sangaya-ngaya da nadika ntau seʼe waʼa rengko setu ri raya waʼa lincu setu. Tau seʼe sangaya-ngaya da mampake rengko ntaninya, roo setu nepa maya njoʼu tau seʼe ri kareʼe pompasambaka waʼa ntau sondo.”
Tubu ntana sape-sape kareʼe Banua i mPue
42:15-20
15Ri karoonya tuama setu mantubu Banua i mPue anu ri rayanya, napoyunu yaku mesuwu moliu ri baa-baa tondo pebetea, nepa natubu sape-sape Banua i mPue setu. 16Pai toko pontubunya natubu apanya tondo pebetea, narata 250 meteri. 17-19Roo setu natubu apanya tondo utara, apanya tondo selata, pai apanya tondo kasoyoa, sambaʼa-sambaʼa apanya setu 250 meteri karatenya. 20Mewali tana kareʼe mpotunda Banua i mPue setu mosulapa aopo, sanculapa-sanculapa seʼe siwia karatenya 250 meteri. Tana setu natolilimi tembo anu mangaoyoti tana kareʼe Banua i mPue pai tana anu ri sambalikunyu.
Currently Selected:
YEHESIKIELI 42: LAIPMF
Highlight
Share
Compare
Copy
Want to have your highlights saved across all your devices? Sign up or sign in
