YEHESIKIELI 41
41
1Tuama setu mampoyunu yaku njoʼu ri raya lincu ri tongo anu ndapapotoʼoka Kareʼe Anu Magali. Natubu jaya kodi anu da njoʼu njairia, tatogo meteri karatenya, 2pai alima meteri kabininya. Rindi anu ri apanya ntimali-mali, radua meteri santongo kakumbanya. Roo setu nepa natubu Kareʼe Anu Magali setu: karatenya 20 mpuyu meteri pai kabininya sampuyu meteri.
3Roo setu napesuaki lincu anu ri rayanya. Natubu jaya kodi anu da njoʼu njairia: Karatenya sambaʼa meteri, kabininya tatogo meteri, pai rindi anu ri apanya ntimali-mali tatogo meteri santongo kakumbanya. 4Nepa natubu woʼu lincu setu, mosulapa aopo, karatenya pai kabininya siwia-wia sampuyu meteri. Nepa natoʼoka yaku, “Inceʼemo Lincu Anu Magali mPodago.”
Waʼa lincu anu ndapowia ri tembo Banua i mPue
41:5-11
5Roo inceʼe natubu ntuama setu tembo Banua i mPue setu; kakumbanya tatogo meteri. Ri tembo sape-sape Banua i mPue setu reʼe waʼa lincu anu kabininya radua meteri. 6Waʼa lincu setu tatogo ntapi, pai santapi-santapi seʼe reʼe 30 lincu. Tempo ri sambalikunya ri santapi-santapi seʼe mapini painaka tembo lincu anu ri aranya, painaka waʼa lincu setu madago ndapampaposuncu mau bareʼe ndayosu tembo Banua i mPue setu. 7Ungka ri sambalikunya ndakita tembo Banua i mPue setu siwia kakumbanya ungka ri aranya sawi ri wawonya. Ri tembo anu ri sambaliku Banua i mPue setu, ri sambaliku waʼa lincu setu, reʼe radua eja bangke, painaka naleʼo ntau mepone ungka ri aranya sawi ri karadua pai ri katatogo ntapinya. 8-11Tembo ri sambaliku waʼa lincu setu kakumbanya radua pai santongo meteri. Waʼa lincu setu reʼe mombo anu da njoʼu ri waʼa lincu tondo utara Banua i mPue pai wombo ntaninya anu da njoʼu ri waʼa lincu tondo selata. Sape-sape Banua i mPue setu reʼe ambeka anu kabininya radua pai santongo meteri, kandatekanya tatogo meteri ungka ri tana, siwia kalangkatinya pai pondasi waʼa lincu anu njau ri tembo Banua i mPue. Ri oyo ambeka pai waʼa lincu anu napake waʼa ntadu mpanyomba, reʼe tambale anu kabininya sampuyu meteri, ri kaii kana Banua i mPue setu.
Anu ri tondo kasoyoa
41:12
12Mototo pai tambale tondo kasoyoa, reʼe banua bangke anu karatenya 45 meteri pai kabininya tatogompuyu pai alima meteri, pai kakumba waʼa rindinya radua santongo meteri.
Tubu juku-juku Banua i mPue
41:13-15a
13Tuama setu mantubu karate Banua i mPue, narata 50 meteri. Ungka ri tondo taliku Banua i mPue rata ri tembo ntaliku banua bangke ri tondo kasoyoa setu oyonya 50 meteri woʼu. 14Ri suara Banua i mPue anu mosuara tondo pebetea pai tambale ri kaii kananya, kabininya 50 meteri woʼu. 15aTuama setu mantubu woʼu banua bangke anu mosuara ri tambale tondo kasoyoa, kabininya 50 meteri, tesuamo waʼa rindi ri kaii pai mokana.
Katetila Banua i mPue
41:15b-21a
15bWaʼa lincu anu njau ri Banua i mPue, lincu ri suara, inceʼe Lincu Anu Magali pai Lincu Anu Magali mPodago, 16ndaramba-rambanika simpinya kaju, ungka ri joia sawi ri tukenya. Waʼa ntuke setu madago ndaompoka ayapa. 17Juku-juku rindi tondo ri rayanya ndaramba-rambanika pai waʼa woti, 18puʼu ntabaro pai turuki kerubio, sangkaju puʼu ntabaro ri oyo radua turuki kerubio. Kerubio setu radua lionya, 19sambaʼa lio ntolino mosuara ri rando puʼu ntabaro tondo kaii pai lio ncinga inceʼe mancuara rando puʼu ntabaro tondo mokana. Waʼa woti setu reʼe ri juku-juku Banua i mPue, 20montepuʼu ungka ri joia sawi-sawi ri tungka mbombo. 21aWaʼa nono dampo mbombo ri Lincu Anu Magali mosulapa aopo.
Lampaʼani kaju
41:21b-22
21bRi suara Lincu Anu Magali mPodago reʼe sangaya anu ndakita ewa lampaʼani kaju. 22Kandatekanya sambaʼa pai santongo meteri pai kabininya sambaʼa meteri. Waʼa sunonya, potundanya pai rindinya ndapowia ungka ri kaju. Natoʼo ntuama setu ri yaku, “Inceʼemo meja anu reʼe ri suara karata i mPue.”
Waʼa wombo
41:23-26
23Ri tando njaya kodi anu njoʼu ri Lincu Anu Magali reʼe sambaʼa wombo, ewanceʼe seʼe ritando njaya kodi anu da njoʼu ri Lincu Anu Magali mPodago. 24Waʼalincu mampotumpu radua dampombombo, anu ndaloka ri tongonya. 25Waʼa dampo mbombo Lincu Anu Magali ndaramba-rambanika waʼa mboti puʼu ntabaro pai rando mboti turuki kerubio, ewa anu reʼe ri waʼa rindinya. Ri suara lincu anu tondo ri sambalikunya ndaomponika dopi. 26Ri apa ndindi mpotimali-mali njau waʼa ntuke, pai rindinya ndaramba-rambanika pai waʼa woti puʼu ntabaro.
Currently Selected:
YEHESIKIELI 41: LAIPMF
Highlight
Share
Compare
Copy
Want to have your highlights saved across all your devices? Sign up or sign in
