YEHESIKIELI 40
40
PEPATONGAWA KONO BANUA PANYOMBA RI Pue RI TEMPO ANU DA RATA
40:1–48:35
I Yehesikieli ndakeni njoʼu ri Yerusale
40:1-4
1Sindara setu kono ri sampuyu eo mbuya anu kaʼisa, ri taʼu ruampuyu pai alima tempo pantawani kami, sampuyu pai aopo ntaʼumo karoonya masua Yerusale, kuepe kuasa i mPue, nepa ndakeni mpalai yaku. 2#Pepat. 21:10 Ri raya sambaʼa pepatongawa, i Pue Ala mangkeni yaku ri tana Isaraeli pai madika yaku ri wawo buyu anu ndateka. Ri suaraku kukita satobu banua anu motaʼa ewa sambaʼa kota. 3#Pepat. 11:1, 21:15 Yaku ndakeni njoʼu njairia pai kukita sambaʼa tuama anu kampiri-mpiri ewa tambaga anu mekakore mosu ri baa-baa ngkota. Siʼa mangkekeni wayaa mpontubu ungka ri lena pai kaju mpontubu.
4Tuama setu mompau ri yaku natoʼo, “Ee tolino anu podo awu ntana, pedongeka mpodago pai komatasi mpodago mpengaya-ngaya anu kupapakitaka siko, maka inceʼimo puʼunya painaka siko ndakeni ri maʼi. Toʼokamo banca Isaraeli pura-pura anu da nukita.”
Baa-baa tondo pebetenya
40:5-16
5 #
1 Raj. 6:1-38, 2 Taw. 3:1-9 Nepa kukita Banua i mPue, anu natolilimi tembo. Natepuʼumo ntuama setu mantubu tembo setu pai kaju pontubunya anu tatogo meteri karatenya. Narata kalangkati ntembo setu tatogo meteri pai kakumbanya tatogo meteri woʼu. 6Ungka lairia njoʼu siʼa ri baa-baa anu moara tondo pebetenya. Mepone siʼa ri ejanya, pai kasawinya ri wawonya natubu tungka mbombo setu, kabininya tatogo meteri. 7-10Ri sambali baa-baa setu reʼe sambaʼa jaya kodi pai ri wiwinya mpotimali-mali njau lincu mpojaga tatogo. Pura-pura lincu setu siwia-wia kabangkenya; taʼanya mosulapa, pai apanya sambali seʼe tatogo meteri. Waʼa ntembo oyotinya siwia kakumbanya, inceʼemo radua meteri santongo. Jaya kodi setu tesumpanaka woʼu tatogo meteri njoʼu ri lincu bangke anu moara ri Banua i mPue. Tuama setu mangantubu lincu bangke setu, narata kabangkenya aopo meteri; kareʼenya tondo ri baa-baa tondo ri rayanya, inceʼemo anu mosu mpodago pai Banua i mPue. Waʼa ntembo anu mancuara Banua i mPue, sambaʼa meteri kakumbanya.
11Ungka lairia, tuama setu mangantubu kabini njaya kodi anu ri baa-baa, narata aono meteri santongo kabininya, pai baa-baa setu alima meteri kabininya. 12Ri suara waʼa lincu mpojaga anu tatogo ngkani tatogo meteri kabangkenya setu njau tembo ede anu podo santongo meteri kandatekanya, pai kakumbanya woʼu podo santongo meteri. 13Nepa natubu ntuama setu oyonya ungka ri tembo anu ri taliku sambaʼa lincu mpojaga rata ri tembo taliku lincu mpojaga anu sampototonya, narata 12,5 meteri. 14Natubu woʼu lincu bangke setu; narata sampuyu meteri karatenya. Wombo lincu setu moara njoi tambale ri sambaliku Banua i mPue. 15Ungka ri baa-baa tondo sambalikunya rata ri tembo lincu bangke anu mancuara Banua i mPue 25 meteri oyonya. 16Ri tembo ri taliku pai tembo oyoti waʼa lincu setu reʼe waʼa ntuke anu kodi. Waʼa ntembo tondo ri rayanya anu mancuara jaya kodi setu, ndaramba-rambanika waʼa woti mpuʼu ntabaro.
Tambale anu ri sambaliku Banua i mPue
40:17-19
17Ungka lairia, tuama setu mampoyunu yaku moliu ri baa-baa njoʼu ri tambale ri sambaliku Banua i mPue. Ri apa ntembo tondo sambalikunya mantolilimi Banua i mPue setu ndapowia 30 lincu. Ri suara waʼa lincu setu njau joia watu, 18anu mantolilimi sape-sape tambale setu. Tambale ri sambalikunya setu inceʼe lauka pai tambale anu ri rayanya.
19Njairia njau baa-baa ntaninya anu ndateka kareʼenya da njoʼu ri tambale anu ri rayanya. Tuama setu mantubu oyo baa-baa radua setu, narata 50 meteri.
Baa-baa tondo utara
40:20-23
20Ungka lairia, tuama setu mantubu baa-baa utara njoʼu ri tambale anu ri rayanya. 21Ri baa-baa setu njau lincu mpojaga tatogo ri apanya mpotimali-mali ri wiwi njayanya anu kodi, waʼa ntembo oyotinya sangkani pai lincunya anu bangke, pura-pura siwia tubu ngkabangkenya pai anu reʼe ri baa-baa tondo pebetea. Jaya kodi setu seʼe 25 meteri karatenya, pai kabininya 12,5 meteri. 22Ewanceʼe seʼe lincu bangkenya, waʼa ntukenya pai waʼa mbotinya puʼu ntabaro siwia pai anu reʼe ri baa-baa ri pebetea. Reʼe papitu ntuka eja anu da njoʼu ri baa-baa setu, pai ri tandonya njau lincu bangke anu mosuara ri tambale anu ri sambaliku Banua i mPue. 23Mombesuara pai baa-baa utara, njau baa-baa ntaninya anu da njoʼu ri tambale anu ri rayanya, siwia pai anu reʼe ri baa-baa tondo pebetea. Tau setu mantubu oyo baa-baa radua setu narata 50 meteri.
Baa-baa tondo selata
40:24-27
24Roo inceʼe, tuama setu mampoyunu yaku njoʼu ri baa-baa selata, natubu woʼu inceʼe. Tongawa baa-baa setu siwia pai waʼa baa-baa anu ntaninya. 25Waʼa ntuke ri waʼa lincunya setu siwia pai anu reʼe ri waʼa baa-baa anu ntaninya. Karate njaya kodi baa-baa setu rua mpuyu pai alima meteri, pai kabininya sampuyu pai radua meteri santongo. 26Papitu ntuka eja anu njoʼu ri baa-baa setu pai lincu anu bangke woʼu njau ri tandonya, mosuara ri tambale anu ri sambaliku Banua i mPue. Waʼa ntembo tondo ri rayanya anu mancuara jaya kodi setu, ndaramba-rambanika pai waʼa woti puʼu ntabaro. 27Njairia njau woʼu baa-baa anu da njoʼu ri tambale tondo ri rayanya. Tuama setu mantubu oyo baa-baa radua setu narata 50 meteri.
Baa-baa selata anu da njoʼu ri tambale anu ri rayanya
40:28-31
28Roo inceʼe tuama setu mampoyunu yaku moliu ri baa-baa selata mesua ri tambale anu ri rayanya. Natubu baa-baa selata setu, pai tubunya siwia pai baa-baa anu ri sambalikunya. 29-30Waʼa lincu mpojaganya, lincu bangkenya, pai waʼa ntembo ri rayanya siwia pai anu reʼe ri waʼa baa-baa anu ntaninya. Waʼa lincu ri baa-baa setu woʼu reʼe tukenya. Jaya kodi baa-baa setu 25 meteri karatenya. 31Paikanya lincu bangkenya mosuara ri sambalikunya. Waʼa ntembo anu tondo ri rayanya anu mancuara jaya kodi, ndaramba-rambanika woʼu pai waʼa woti puʼu ntabaro. Reʼe uayu ntuka eja anu da njoʼu ri baa-baa setu.
Baa-baa anu da njoʼu ri tambale anu ri rayanya
40:32-34
32Roo inceʼe, tuama setu mampoyunu yaku moliu ri baa-baa pebetea mesua ri soma anu ri rayanya. Natubu baa-baa setu pai tubunya siwia pai baa-baa ntaninya. 33Waʼa lincu mpojaganya, waʼa ntembo tondo ri rayanya pai lincu bangkenya tubunya ewa anu reʼe ri baa-baa anu ntaninya. Ri waʼa lincu setu pai ri lincunya anu bangke reʼe waʼa ntukenya. Jaya kodi setu 25 meteri karatenya pai 12,5 meteri kabininya. 34Lincunya anu bangke mosuara ri tambale anu ri sambalikunya. Waʼa ntembo anu tondo ri rayanya mancuara jaya kodi, ndaramba-rambanika waʼa woti mpuʼu ntabaro. Reʼe uayu ntuka eja anu da njoʼu ri baa-baa setu.
Baa-baa utara anu da njoʼu ri tambale anu ri rayanya
40:35-37
35Karupurinya mpodago tuama setu mampoyunu yaku njoʼu ri baa-baa utara. Natubu baa-baa setu pai narata tubunya siwia pai waʼa baa-baa anu ntaninya. 36Ewanceʼe seʼe waʼa lincu mpojaganya, waʼa ntembo anu ri rayanya pai lincu bangkenya siwia pai anu reʼe ri waʼa baa-baa anu ntaninya. Ri waʼa lincunya pai ri lincu bangkenya reʼe waʼa ntukenya. Karate njaya kodi setu 25 meteri pai 12,5 meteri kabininya. 37Lincu ri suaranya setu mosuara ri tambale anu ri sambalikunya. Waʼa ntembo tondo ri rayanya anu mancuara jaya kodi, ndaramba-rambanika waʼa woti puʼu ntabaro. Reʼe uayu ntuka eja anu da njoʼu ri baa-baa setu.
Waʼa lincu bangke anu mosu ri baa-baa utara
40:38-46
38Ri tambale anu ri sambalikunya reʼe sambaʼa lincu ndatombika ri baa-baa ri rayanya tondo utara. Ungka ri lincu ndatombika setu reʼe sambaʼa monbo anu da njoʼu ri lincu bangke. Njairiamo ndapawusoʼi waʼa mpinatuwu anu da mewali panyomba anu ndaʼombasi. 39Ri lincu bangke setu, reʼe meja aopo, radua ri apanya mpotimali-mali. Ri wawo waʼa meja setumo pasambale pinatuwu anu ndaʼombasi ndapanyombaka, bara panyomba mpaosu salaa bara panyomba poncarungkoro. 40Ri sambaliku lincu bangke setu njau woʼu aopo meja, radua ri mpotimali-mali baa-baa utara setu. 41Mewali, reʼe uayu meja setu kareʼe mpasambale panyomba; aopo anu njau ri rayanya pai aopo anu njau ri sambaliku ntambale setu. 42Meja aopo anu ri lincu ndatombika setu anu ndapake mampatoka panyomba anu ndaʼombasi paka watu anu ndapaʼati. Meja setu santongo meteri kalangkatinya, wawonya mosulapa aopo, karatenya pai kabininya tatogo mpotila aopo meteri. Ri wawo waʼa meja setu ndapadika waʼa mparewa mponcambale pinatuwu anu ndapanyombaka. 43Paikanya waʼa meja setu ndadikaka simpinya anu 75 milimeteri kabininya. Pura-pura sanga mpinatuwu anu da ndapanyombaka ndadika ri wawo waʼa meja setu.
44Ungka lairia tuama setu mampoyunu yaku njoʼu ri tambale anu ri rayanya. Njairia njau radua bantayani, anu sambaʼa ri sori baa-baa utara pai mosuara ri selata, pai anu sambaʼa woʼu ri sori baa-baa selata pai mosuara ndeki utara. 45Natoʼo ntuama setu ri yaku, bantayani anu mosuara tondo selata setu inceʼe ndapatoka tila waʼa ntadu mpanyomba anu motetala ri Banua i mPue, 46pai bantayani anu mosuara ri tondo utara, inceʼe ndapatoka tila waʼa ntadu mpanyomba anu motetala ri lampaʼani. Pura-pura tadu mpanyomba setu da ungka ri muli i Sadoki. Maka ungka ri muli i Lewi podo muli i Sadoki anu maya mancuara i Pue anu da mamporiokoi Sira ri panyomba.
Soma anu ri rayanya pai Banua i mPue
40:47–41:4
47Tuama setu mangantubu tambale anu ri rayanya. Tambale setu mosulapa aopo: karatenya 50 meteri pai kabininya 50 meteri. Banua i mPue setu reʼe ri tondo kasoyoa, pai ri suaranya reʼe sambaʼa lampaʼani. 48-49Roo setu napoyunu yaku njoʼu ri lincu ri suara Banua i mPue setu mepone ri ejabara sangkuja ntuka. Natubu lincu mpesua; kabangkenya papitu ngkani radua santongo meteri, pai rindinya mpotimali-mali sameteri pai santongo kakumbanya. Ri kaii kananya reʼe sambaʼa nono bangke. Lincu ri suara setu reʼe sampuyu meteri karatenya pai aono meteri kabininya.
Currently Selected:
YEHESIKIELI 40: LAIPMF
Highlight
Share
Compare
Copy
Want to have your highlights saved across all your devices? Sign up or sign in
