YEHESIKIELI 39
39
Kapanangi i Gogi
39:1-10
1I Pue Anu Ndate ri Peawanya mantoʼo, “Ee tolino anu podo awu ntana, ekasimo i Gogi, mokole bangke ungka ri waʼa lemba Meseki pai Tubali, pai toʼokamo siʼa, Yaku seʼi iwalinya. 2Yaku da mampapebia siʼa pai da mangkeni mpesuwu siʼa mesuwu ungka ri tana anu lawa ungka ri utara, ri waʼa buyu nto Isaraeli. 3Njairia da kuwombo gorosi mpananya painaka da telapasaka ungka ri palenya mokaii, pai da Kunawusi mata mpana ungka ri palenya mokana. 4Ri wawo waʼa buyu Isaraeli, i Gogi sangkani pai waʼa ncurodadonya pai anu mancambiranaka siʼa pai siʼa da mate, pai waʼa wata ngkoro ntau seʼe da Kuwaika waʼa ntonci pai pinatuwu masii da mangkoni. 5Waʼa ncurodado setu da madungka pai mate ri tongo waʼa njamaa. Yaku Pue Anu Ndate ri Peawanya mantoʼomo seʼi. 6Yaku da mampareʼe katenunju ri tana Magogi pai ri sambiwi ntasi, kanjau waʼa ntau anu tuwu ri kalindo ndaya. Da naincanimo ntau seʼe pura-pura ka-Yakunya Pue. 7Paikanya ri tongo-tongo nto Isaraeli da kupatongawa toʼoku anu magali, pai toʼoku setu bareʼemo da napakakarika. Nepa da naincani waʼa banca ka-Yakunya Pue, Pue Ala anu magali ungka ri Isaraeli.”
8I Pue Anu Ndate ri Peawanya mantoʼo, “Monco eo anu kujanji setu da rata. 9Waʼa ntau bangani ngkota ri Isaraeli da mesuwu mangguyu-ngguyu da mampasambaka waʼa mparewa mpoʼiwali anu ndapalaikamo, inceʼemo kanta pai penai, gorosi mpana pai mata mpana pai tarasulu. Pura-pura setu napokaju apu ntau seʼe, gana ndapake ri raya anu pitu ntaʼu. 10Mewali tau seʼe bareʼemo da mekaju ri jamaa, bara da mantowo kaju ri yopo, maka waʼa mparewa mpoʼiwali anu ndapalaika setu gana ndapokaju apu. Tau seʼe da mampamuru pai da mangarampa aga-aga ntau anu roomo mampamurui pai mangarampa aga-aga ntau seʼe. Yaku, Pue Anu Ndate ri Peawanya mantoʼomo seʼi.”
Padayo i Gogi
39:11-20
11Ndatoʼo i mPue, “Ane tepewalimo pura-pura setu, da kuwaika i Gogi tana mpopadayo ri Isaraeli, ri Rato mPowote anu njau ri tondo pebetea ungka ri Tasi Mate. Njairiamo da ndapadayo i Gogi pai waʼa ncurodadonya, maka rato setu da ndapapotoʼo ‘Rato Ncurodado i Gogi.’ 12Papitu mbuya kasaenya waʼa to Isaraeli mampotetalaka popadayo pura-pura wata ngkoro ntau mate da naka tana setu bareʼemo karika. 13Pura-pura tau da mampositulungi tetala mpopadayo setu, pai ua tetala setu tau seʼe da marata sili lengenya ri eo mpenangi-Ku, Yaku Pue Anu Ndate ri Peawanya mantoʼomo seʼi.
14Jabutu liumo anu papitu mbuya setu, reʼe bara tesangkuja tau anu ndapapolako da maleleangi tana setu da mampepali wata ngkoro ntau mate anu reʼepa ri wawo ntana, pai ane reʼepa da nadayo da naka tana anu karika da wali ngkagali. 15Ri paleleangi ntau seʼe setu, sangkani-sangkani narata ntau seʼe wuku ntau, da nadika ntau seʼe petondoni ri sorinya, da naka nakita waʼa ntopopadayo, anu da mangadayo wuku setu ri Rato Ncurodado i Gogi. 16Ewanceʼemo ndapampakagali tana setu ungka ri kakarika. (Ri purinya ri rato setu da reʼe kota anu toʼonya siwia pai Surodado i Gogi.)”
17 #
Pepat. 19:17-18
I Pue Anu Ndate ri Peawanya mantoʼo ri yaku, “Ee tolino anu podo awu ntana, peboomo pura-pura tonci pai pinatuwu ntaninya, da naka rata pura-pura mangkoni pangkoni anu ndapatokaka tau seʼe. Yaku da mampareʼe susa bangke ri waʼa buyu Isaraeli, njairia da napangkoni ntau seʼe sanga mbayawo pai mainu daa. 18Njairia da naleʼo ntau mangkoni wata ngkoro waʼa mpomakoje, pai mangainu daa waʼa ntau makuasa ri lino. Waʼa mpomakoje pai waʼa ntau makuasa setu da ndapepate ewa mbula laki bara ewa ana mbula, bara japi laki anu maboko ungka ri Basani. 19Roo kupepate waʼa ntau setu ewa anu ndapanyombaka, waʼa ntonci pai waʼa mpinatuwu ntaninya da mangkoni pura-pura lorinya rantani nasumu, pai da mainu daa rantani mayangu. 20Tau seʼe maya mampakabosu komponya ri meja mpangkoniku pai pura-pura nyara pai tau mampelamba pai waʼa mpomakoje. Yaku, Pue Anu Ndate ri Peawanya mantoʼomo seʼi.”
Isaraeli ndawali wangu muni
39:21-29
21Ndatoʼo i mPue, “Yaku da mampapakitaka waʼa banca peawaku. Tau seʼe pura-pura da mangangkita ewambeʼi kupampake kuasa-Ku da mangawianaka waʼa mpobotusiku anu mayoa. 22Montepuʼu ungka njairia da naincanimo Isaraeli ka-Yakunya Pue Ala pue ntau seʼe. 23Pai pura-pura banca da marata ndaya, to Isaraeli ndapakatu ri kareʼe pantawani ua salaa ntau seʼe ri Yaku. Tau seʼe Kupalaikamo pai Kupapaliuka nanangi iwali pai ndapepate ri pombetoto. 24Kupowia tau seʼe sintimba pai kakarika pai jaʼa anu nawianaka ntau seʼe, nepa Kupepombaika tau seʼe.”
25I Pue Anu Ndate ri Peawanya mantoʼo, “Paikanya seʼi-seʼi Yaku da mampokapuru to Isaraeli muli i Yako, pai da mampakagana-gana muni katuwu ntau seʼe. Da ewanceʼe kupangajagai toʼo-Ku da naka bareʼe bali-bali ndapantubunaka. 26Ane maroo-roo tau seʼe ri kaʼuononya ri tana ntau seʼe ngkalionya pai benoreʼe mau sambaʼa tau anu da masalempori katuwu ntau seʼe, da nakalinganimo woʼu ntau seʼe ewambeʼi ndapampakaeamo tau seʼe ua mangaewa Yaku. 27Yaku da mangangkeni mpewalili muni tau seʼe ungka ri waʼa ntana iwalinya, pai da tongawamo ri waʼa banca kagali-Ku ua powia-Ku setu. 28Da naincanimo waʼa ntau-Ku ka-Yakunya Pue Ala pue ntau seʼe. Maka Yakumo anu mampakatu tau seʼe ri kareʼe mpantawani, paikanya Yaku seʼe anu da mangkeni mpewalili tau seʼe ri tananya ngkalionya, pai bereʼe mau sambaʼa tau ri oyo ntau seʼe anu ndapalaika njairia. 29Yaku da mangadika inosaku ri banca Isaraeli, pai bareʼemo da mampalika tau seʼe. Yaku, Pue Anu ndate ri Peawanya mantoʼomo seʼi.”
Currently Selected:
YEHESIKIELI 39: LAIPMF
Highlight
Copy
Compare
Share
Want to have your highlights saved across all your devices? Sign up or sign in
