AMOSI 9
9
Pepatongawa kono popahuku ungka ri Pue
9:1-10
1Kukita i Pue mekakore mosu ri lampaʼani. Sira mamparata songka seʼi, “Bobakimo marimbo-rimbo waʼa wuntu nono anu reʼe ri Banua-Ku da naka monjua samalele tambale. Dungkalakasi waʼa nono setu, papapereka woʼo waʼa ntau. Tau anu bareʼe mate inceʼe da kupepate ri poʼiwali. Bereʼe mau sambaʼa tau anu da maleʼo molonco, pai bareʼe da reʼe mau sambaʼa tau anu da lapa. 2Mau rapanya tau seʼe mencili ri kareʼe ntau mate, sangaya-ngaya da kuganggayo tau seʼe. Mau rapanya tau seʼe mepone ri yangi, sangaya-ngaya da kutumbalaka tau seʼe ungka ndatiria. 3Ane mesambuni tau seʼe ri lolo Buyu ngKarameli, da Kupepali pai da kusoko tau seʼe. Ane mesambuni tau seʼe ri oru ntasi, da kupokau naga ntasi da mangantungku tau seʼe. 4Ane natawani iwali tau seʼe, Yaku da mampokau naka ndapepate tau seʼe. Kupoima-ima kojo da maʼopisaka tau seʼe, pai bareʼe da kupelae tau seʼe.”
5Moenggo lino pai waʼa banganinya masusa rayanya,
ua ndalengko i mPue Anu Ndate ri Peawanya pai Makuasa.
Ewa kamowo ngKoro Nili pai teloo ncoroba,
ewanceʼemo pepone ntau seʼe nepa manawu.
6I Pue mawangu banua-A ndateka ri raoa,
pai ri wawo lino ndapataka yangi ewa payu,
pai ue ungka ri tasi ndabubu ri karatana,
anu mangawianaka pura-pura setu, toʼoa inceʼemo i Pue!
7Ndatoʼo i mPue: “Ee waʼa nto Isaraeli, Yaku mampetiro to Sudani siwia pai kupampetiro komi. Yaku roomo mangkeni to Pelisiti ungka ri Kareta pai to Siria ungka ri Kiri, siwia pai ewa kupangangkeni komi ungka ri tana Masiri. 8Yaku, Pue Anu Ndate ri Peawanya, ntongo mampetiro kamokole Isaraeli anu masalaa seʼi, pai Yaku da mampapaya ungka ri wawo lino. Paikanya muli i Yako bareʼe da pura-pura Kuʼopisaka. Yaku, Pue anu mantoʼomo seʼi.
9Yaku da mampapesuwu songka, pai da mangantapi banca Isaraeli da ewa tau mantapi wea ri raya duku. Da mantapi anu bareʼe moyowe ungka ri oyo ntau seʼe, Yaku da mawuraga tau seʼe ri oyo waʼa banca. 10Waʼa ntau anu masalaa ri oyo waʼa ntauku mangantoʼo, ‘I Pue Ala bareʼe da mampapaliuka kita napere ngkapari.’ Paikanya kamonconya tau seʼe da ndapepate ri raya mpoʼiwali.”
Isaraeli da ndawali wangu muni
9:11-15
11 #
Pwn. 15:16-18
Ndatoʼo i mPue, “Maʼipa temponya da rata, Yaku da mangawali wangu muni poparenta i Daudi. Wawaseʼi kamokole setu jamo ewa banua anu madungka. Paikanya waʼa ntembonya da kupakoroka pai da kuwali wangu muni da naka mewali ewa anu owi. 12To Isaraeli da mamparenta tana nto Edomi anu njaupa yau yabinya, sangkani pai pura-pura banca anu Yaku mampotumpu owi. Yaku, Pue anu mantoʼomo seʼi pai da kuwianaka pura-pura setu.”
13Ndatoʼo i mPue, “Maʼipa temponya da rata, da maligamo katuwu mpae painaka bareʼemo da reʼe karapanya pomota, puʼu anggoro da maligamo katuwunya, painaka bereʼe da karapanya tau mampaa anggoro. Ue anggoro da montede ungka ri wawo waʼa buyu pai da moili ungka ri waʼa mpongku ntana. 14Yaku da mampapewali waʼa ntau-Ku to Isaraeli da gana-gana muni katuwunya. Tau seʼe da mangawali wangu muni waʼa ngkota ntau seʼe anu maruamo, nepa da meari tau seʼe njairia. Tau seʼe da mampinamuyani waʼa bonde anggoro, pai mangainu anggoronya. Tau seʼe da momuya pai da mangkoni wuanya. 15Yaku da mangadika waʼa ntauku ri tana anu roo kuwaika tau seʼe. Tau seʼe bareʼe da ndalimba ungka njairia. Yaku Pue Ala pue ntau seʼe anu mantoʼomo seʼi.”
Currently Selected:
AMOSI 9: LAIPMF
Highlight
Share
Compare
Copy
Want to have your highlights saved across all your devices? Sign up or sign in
