AMOSI 8
8
Pepatongawa kono karanji kareʼe wua ngkaju
8:1-3
1Yaku mangkita woʼu sambaʼa pepatongawa, ungka ri Pue Anu Ndate ri Peawanya. Kukita sambaʼa karanji anu buke pai wua ngkaju anu matasamo. 2Meoasi i Pue ndatoʼo, “Nunjaa anu nukita Amosi?”
Mesono yaku kutoʼo, “Sambaʼa karanji anu buke-buke pai wua ngkaju anu matasamo.”
Ndatoʼo i mPue, “Matasamo temponya tila waʼa ntau-Ku Isaraeli. Yaku bareʼemo da mawalisaka rencana-Ku pai manoto kojo da mangahuku tau seʼe. 3Ri tempo setu waʼa ngayu ri langkanae da mewali potumangi. Ri mbeʼi-mbeʼi da morempo-rempo wata ngkoro ntau mate anu roo ndataji ngkaroo.”
Isaraeli ndahuku
8:4-14
4Pedongeka, ee komi anu majeani tau kaasi-asi ri tana seʼi rantani mate tau seʼe! 5Maka nditoʼo ri rayami, “Masae gaga eo mposusa. Maka da rayata ronga mampobalu woʼu ganduta, paikanya posusa seʼi jabereʼe kapusanya. Impia kapusa eo Umapo, da naka taleʼo woʼu mobalu-balu? Da rayata kojo moʼakala da mangampaka kodi pobanga, da mangampolegaka podasi. 6Gandu anu bareʼe ntani madago taleʼo mampobalu, olinya masuli. Kita mampepali tau anu kaasi-asi anu bareʼe nakoto mabayari indanya, mau indanya seʼe podo ewa oli ntalupa radua mbira, da taoli siʼa mewali watuata.”
7I Pue Ala pue banca Isaraeli, montando koromo ndatoʼo, “Yaku bareʼe kojo da mangkalingani powia ntau seʼe anu majaʼa. 8Da moenggo lino pai pura-pura tau da masusa rayanya. Sambawo ntana da monjua pai moropo ewa Koro Nili. 9Da rata temponya Yaku da mampowia reme da soyo ri tongo ndeme pai lino da wani mparokii ri tongo ndeme. Yaku Pue Anu Ndate ri Peawanya, mangantoʼomo seʼi. 10Waʼa mposusami da Kuwalisaka mewali poomboka pai waʼa ngayumi da mewali pokukuou. Yaku da mangaʼiowaka komi mangkou wuyuami, pai mamporengko karu tanda ngkapari ndaya. Komi da mewali ewa ine papa anu mangantangisi kapate ananya anu sambaʼa-mbaʼa. Reme setu da motando pai kapari ndaya anu maʼai kojo.”
11I Pue Anu Ndate ri Peawanya mantoʼo, “Da rata temponya Yaku da mampareʼe pari oro bangke ri tana seʼi. Tau da maoro, paikanya banya mampomaoro pangkoni. Tau da maranganga, paikanya banya mampomaranganga ue. Tau seʼe da mampomaoro pai da mampomaranganga nuntu-Ku. 12Tau da teyoro-yoro ungka ri utara njoʼu ri selata pai ungka ri pebetea njoʼu ri kasoyoa da mampepali nuntuku, paikanya bareʼe da narata. 13Ri eo setu sako waʼa ntau mangura anu marosopa koronya seʼe da malimpu karanganganya. 14Waʼa ntau anu montando koro mamposabi lamoa Samaria, anu mangantoʼo, ‘Mamposabi lamoa banca Daa,’ bara ‘Mamposabi lamoa Bariseba’ – da madungka pai bareʼemo da tepembangu.”
Currently Selected:
AMOSI 8: LAIPMF
Highlight
Share
Compare
Copy
Want to have your highlights saved across all your devices? Sign up or sign in
