OBAJA 1
1
I Pue mangahuku Edomi
1-9
1 #
Yes. 34:5-17, 63:1-6, Yer. 49:7-22, Yeh. 25:12-14, 35:1-15, Am. 1:11-12, Mal. 1:2-5 Ewaseʼi wati i Obaja; siʼa mamparata nuntu i mPue Anu Ndate ri Peawanya kono banca Edomi:
I Pue mampokau waʼa mpomokaua njoʼu ri waʼa banca, pai kita mangadongemo nuntu anu nakeni seʼe ewaseʼi, “Ndipompatikalimo da moʼiwali! Maʼimo takanjoʼu maungku Edomi.” 2Ri to Edomi ndatoʼo i mPue, “Siko da kupakalente, painaka banca pura-pura, mampetikodi siko. 3Pobangke-bangke ndayamu da malinguni siko. Indo ngkotamu inceʼe roka mbatu anu maroso; kareʼe mpearimu inceʼe lolo buyu anu ndateka. Inceʼe painaka nditoʼo ri rayami, isema anu da mangkoto manangi Yaku? 4Mau rapanya nuwangu banuamu ewa kandateka waʼa betuʼe ri yangi, manoto da kupanawusaka siko.
5To pelima bara to pangangka anu rata ri ntongo mbengi, podo da mangantima anu napodaraya. Tau anu mampupu wua anggoro ri bonde, da nadika yabinya bara tesangkuja ogu. Paikanya siko mayasi da nasaewe waʼa iwalimu. 6Ee waʼa muli i Esau, siko da ndasualeki pai aga-agamu anu tesambuni ntano da ndapamuru. 7Siko da nambambasi waʼa ngkasiyunumu, pai da ndairi ungka ri tanamu. Siko da nanangi waʼa balemu, natolia ntau anu mangkoni sangkani-ngkani pai siko. Tau seʼe da kaoa-oa kakononya siko, ‘Seʼi-seʼi mbeʼimo waʼa mpangaincanimu?’
8Ri eo Kupangahuku Edomi, waʼa ntaunya anu loʼe Kuʼopisaka. Pai waʼa mpangaincani ntau seʼe da paya, sako wakanya bareʼemo da reʼe. 9Waʼa mpomakoje ungka ri Temani da maekamo pai pura-pura surodado Edomi da mate.”
Tundainya Edomi ndahuku
10-14
10“Siko mowia anu mampakaparimo waʼa ngkasangkompomu muli i Yako. Inceʼe painaka siko da ndagero, pai da napomparumbasa ntau rantani pusa lino. 11Podo da nutango lawa-lawa, ri eo mparongkasi iwali baa-baa Yerusale pai manganangi kota setu. Podo da nuole-oleka tempo panteo ntau seʼe pura-pura kakoreʼe Yerusale pai napampotila-tila ntau seʼe. Siko siwia kajaʼamu pai iwali setu. 12Bareʼe sintinaja da nupokawongko ndaya karugi nto Yahuda pai modoro-doro ri eo ngkagero ngkasangkompomu. Bareʼe sintinaja siko da mogele-gele ri tempo siʼa masusa. 13Bareʼe sintinaja siko mampesuaki kota waʼa ntauku pai manggorasi waʼa ntau anu ri tongo ngkapari, pagonya da mampamuru aga-aganya ri eo ngkaruginya! 14Bareʼe sintempo siko mekakore ri porampu njaya, da mangantundani waʼa ntau anu molonco mampalaika iwali, bara mampepombaika tau seʼe ri iwali ri eo tau seʼe napere ncusa ndaya.”
I Pue Ala mangabotusi waʼa banca
15-16
15“Monco mosumo eonya, Yaku Pue, mabotusi waʼa banca. Nunjaa anu napowia Edomi inceʼe da ndasilika tau seʼe. Da naepe ntau seʼe woʼu ewambeʼi anu napowiaka tau ntaninya. 16Ri wawo buyuku anu magali waʼa ntau-Ku mangainu panginu anu mampapolimbayo hukunya. Paikanya panginu tila waʼa banca ri lino seʼi, inceʼe maʼai woʼu kapaʼinya. Popahuku setu bareʼe nakoto ntau seʼe da mamperenggoka. Tau seʼe sangaya-ngaya da mangainu rantani pura, ungka lairia nepa da paya bareʼemo reʼe sako wakanya.”
Penangi Isaraeli
17-21
17“Paikanya ri wawo buyu Sioni da reʼe kaʼuono, pai buyu setu da mewali kareʼe anu ndapatani da tilaku. Mewali i Yako da mampotumpu muni tana panta ntau seʼe. 18Waʼa ntau-Ku Isaraeli da ewa apu anu mampanowa pura-pura muli i Esau, da ewa apu anu mantunju deami ri jamaa. Bareʼe da reʼe mau sambaʼa tau ungka ri muli i Esau anu da maleʼo lapa. Yaku, Pue anu mompaumo seʼi!
19Waʼa nto Yahuda ri Selata da mampotundasi Edomi. Waʼa ntau ungka ri buyu mongkodo tondo kasoyoa da manganangi wilaya Pelisiti. Waʼa nto Benyami da mampotundasi Gilea, pai tau-Ku Isaraeli da mangkuasai samalele Eparai pai Samaria. 20To Isaraeli Utara da mewalili ungka ri pantawani pai mampotundasi Penesia rata-rata ri Sarepati. Waʼa nto Yerusale anu ndatawani ri Saridisi, da mewalili pai da mampotumpu waʼa ngkota tondo selata Yahuda. 21Waʼa ntau bangani Yerusale anu gana-gana katuwunya da maungku pai da mampapeʼuru Edomi. Pai Yaku Pue da moparenta ewa sambaʼa datu.”
Currently Selected:
OBAJA 1: LAIPMF
Highlight
Share
Compare
Copy
Want to have your highlights saved across all your devices? Sign up or sign in
