AMOSI 7
7
PEPATONGAWA KONO POPAHUKU UNGKA RI Pue
7:1-17
Tupako
7:1-3
1Yaku mangarata sambaʼa pepatongawa ungka ri Pue Anu Ndate ri Peawanya. Kukita Sira mampareʼe sadompu bangke tupako ri tempo ngkaroo ntau mancewo ewo tila i mokole, pai montepuʼumo tuwu ewo anu mangura. 2Waʼa ntupako setu, sakodi da nakoni pura-pura mpengaya-ngaya pinamuya anu tuwu ri tana. Nepa mompau yaku kutoʼo, “Pue Anu Ndate ri Peawanya, ndipokapurumo waʼa ntau-Mi! Tau seʼe kodi-kodi gaga pai malente, ewambeʼi da napangkoto ntau seʼe tuwu!”
3I Pue mabalisaka rencana, ndatoʼo, “Anu nukita setu bareʼe da mewali.”
Apu
7:4-6
4Yaku mangangkita woʼu sangaya pepatongawa ungka ri Pue Anu Ndate ri Peawanya. Kukita Sira ntongo mompatikali da mangahuku waʼa ntaua pai apu. Apu setu mantunju rantani pura tasi bangke anu ri ara lino pai montepuʼumo mantunju jamaa. 5Mompau yaku kutoʼo, “Boo Pue, mbolimo ndipapeʼonto apu setu! Waʼa ntau-Mi setu podo kodi-kodi pai malente, ewambeʼi da napangkoto ntau seʼe tuwu!”
6I Pue mabalisaka woʼu rencana, ndatoʼo, “Inceʼe seʼe bareʼe woʼu da mewali.”
Wayaa mpontubu anu ndaloe
7:7-9
7Yaku mangarata woʼu sangaya pepatongawa anu ntaninya ungka ri Pue. Kukita Sira mekakore ri sori sambaʼa tembo anu ndawangu mampake wayaa mpontubu anu ndaloe lau watu ndataka ri tando mbayaa setu. 8Meoasi Sira ndatoʼo, “Nunjaa anu nukita Amosi?”
Mesono yaku kutoʼo, “Wayaa mpontubu anu teloe-loe, Pue.”
Nepa ndatoʼo i mPue, “Yaku mampake wayaa mpontubu seʼi, mampatongawa waʼa ntauku jamo ewa tembo anu bareʼe mayoa pepakorenya. Yaku bareʼemo da mawalisaka rencanaku, manoto kojo da kupangahuku tau seʼe. 9Waʼa ngkareʼe anu napake waʼa muli i Saki manyomba da ndagero. Waʼa ngkareʼe nto Isaraeli anu magali da ndaruasi. Yaku da maʼopisaka waʼa muli i Mokole Yerobea.”
I Amosi pai i Amasia
7:10-17
10I Amasia, tadu mpanyomba ri Beteli, mampakatu bambari seʼi ri Yerobea mokole nto Isaraeli anu mantoʼo, “I Amosi mogombo pai waʼa ntau sondo da mangaewa i Mokole. Waʼa mpaunya anu mangantundeki tau sondo anu mampareʼe kagero ntana seʼi. 11Natoʼo komi mokole da mate ri pombetoto, pai waʼa nto Isaraeli da ndateo mewali tawani njoʼu ri suo ntana anu lawa ungka ri tananya seʼi.”
12Nepa natoʼo i Amasia ri Amosi, “Ee nabi, pewalilimo ri Yahuda! Pontuntumo njairia. Mbolimo tau seʼe da mangawaika siko pangkonimu. 13Neʼe boi montuntu woʼu siko ri Beteli. Kota seʼi ndapatani tila mokole, pai kareʼe mpanyomba tila banca.”
14Mesono i Amosi natoʼo, “Yaku banya nabi ua inceʼe lantiku. Yaku seʼi sambaʼa topongkambi pai toponduru wua ara. 15Paikanya yaku ndatima i mPue sindara kampale-mpale ri tetalaku, nepa ndapokau yaku mamparata nuntu-A ri to Isaraeli. 16Inceʼe painaka pedongekamo nunjaa anu ndatoʼo i mPue ri siko. Ua siko mampetangani yaku montuntu manceko to Isaraeli, 17ndatoʼo i mPue rongomu da mewali toposalara ri jaya-jaya ri raya ngkota, pai waʼa anamu da ndapepate ri raya mpoʼiwali. Tanamu da ndatila-tilaka tau ntaninya, pai siko ngkaliomu da mate ri tana ntau anu bareʼe mangaincani i Pue. Waʼa nto Isaraeli manoto da ndakeni ri kareʼe mpantawani, lawa ungka ri tananya.”
Currently Selected:
AMOSI 7: LAIPMF
Highlight
Share
Compare
Copy
Want to have your highlights saved across all your devices? Sign up or sign in
