AMOSI 6
6
Isaraeli magero
6:1-14
1Marugimo komi anu madago karoo-roomi ri Sioni, pai komi anu mangaepe lindo rayami ri Samaria – ee komi waʼa ntopombawanaka tau sondo ri Isaraeli anu ndapatani seʼi, komi anu nakamaʼisi ntau sondo merapi tulungi! 2Ndikanjoʼumo mampeole ri Kaline nepa melinja mpaliu njoʼu ri kota Hamati anu bangke setu, nepa njoʼu woʼu ri kota Gati ri Pelisiti. Ndisarumaka waʼa ngkota setu da meruu ngkadagonya ungka ri kamokole Yahuda pai Isaraeli? Ane tana ntau seʼe meruu ngkabangkenya pai tanami? 3Komi momamalinga maka ndisarumaka eo ngkapari ntongo masaepa nepa da rata, paikanya waʼa mpowiami podo mampakaronga rata eo ngkapari setu.
4Marugimo komi anu yore ri paturua anu meawa pai mosusa mangkoni sanga japi pai bimba anu mangurapa! 5Madago rayami mantapoli ngayu, ewa anu napowia i Daudi, pai komi mampongayuka waʼa ngayu setu pai dunde. 6Komi manginu anggoro ri galasi anu ndabangani buke-buke, pai komi mampake lana wongi anu masuli, paikanya bareʼe mapari rayami ri kagero Isaraeli. 7Inceʼe painaka komi anu uyu suʼanya da ndakeni ri kareʼe mpantawani. Waʼa ncusa pai podoro-doro da motando.
8Ri kayonto-yontonya i Pue Anu Makuasa pai Anu Ndate ri Peawanya mawai patiendo seʼi, “Bareʼe kupokono pobangke-bangke nto Isaraeli, bareʼe kupokono mangkita langkanae ntau seʼe anu meawa. Kota kareʼe mpotunda mokolenya sangkani pai waʼa ntau anu njau ri rayanya, da kupepombaika ri iwali.”
9Ane rapanya reʼe sampuyu tau anu mesambuni ri raya sambaʼa banua, tau seʼe da mate woʼu. 10Sambaʼa tau bangani ncombori anu mampasilolongani da pangadayo, da rata pai da mangkeni mpesuwu wata ngkoro ntinanya. Siʼa da meboo ri tau anu njau ri taliku banua setu, “Bara ntongo reʼepa yunumu anu tuwupa?”
Nepa da nadonge pesono mantoʼo, “Bereʼe!”
Tau anu mampasilolongani popadayo waʼa ntau mate setu da mangantoʼo, “Neʼemo mompau siko! Kita bareʼe maya mompau mangantoʼo, Toʼo i mPue.”
11Maka ane i Pue mangantoʼo songka, pura-pura banua, bangke kodi da ndagero. 12Ara da nakoto nyara molumba ri pongku toruku mbatu? Ara da reʼemo tau mopajeko ri tasi mampake japi? Paikanya komi mantoro balikomo yoa mewali rasu anu mepepate, pai anu monco mewali anu sala.
13Komi mampau mbamba mangantoʼo komi manganangimo Lodebari. Nditoʼo woʼu, “Komi ganamo rosomi da manganangi Karanaimi.”
14I Pue Anu Ndate ri Peawanya pai anu Makuasa ngkalioa mangantoʼo, “Waʼa nto Isaraeli, Yaku mangampokau surodado ungka ri sambaʼa banca ntaninya da mangaungku tanami. Tau seʼe da mamparapee komi montepuʼu ungka ri jaya njoʼu Hamati tondo utara nakarataka ri Yombo Araba tondo selata.”
Currently Selected:
AMOSI 6: LAIPMF
Highlight
Share
Compare
Copy
Want to have your highlights saved across all your devices? Sign up or sign in
