Zep. 3
3
Jerusalem tuukumake
1Tutelei le' Jerusalem laggai sikatai sioba' masisaggangi si Tuhan samba sipaoreiji sikalaggaijatnia! 2Makatainangan te laggai sitaioba' masisilo' paasekat Tuhan, samba sitaimaletcei kapatekakatNia, sitai sege'ake' purimanuaiatnia kai Tuhan, samba sitaitiddou paroman katubuNia! 3Sangamberi siabeu tiboi tubu ka laggai nenda kele' singa sipurorou. Sipasiukumnia kele jojot leleu simalaje: bulat maalau bagadda bailu berisara tolat tak aralegeiake komen mancep. 4Tai nabi ta anai ukut bagadda samba tamomoi tukatonemi; tai imam leu rapalolit leu kaunen kai Tuhan samba rapabailok le surukat Taikamanua bailiu puuktunganda. 5Tapoi aile' si Tuhan ka laggai nenda, sarat katubulanan le igagalai samba ta'babara simasele. Senen simanseman sarat iake' le katuroipoat ka laggai nenda mariuriu le ragalai katai takmamaila sia. 6Kuanangan si Tuhan, “Maigingan Akutataake bangsa. Laggai leuet Kupakatai samba kekre, pujagoadda Kubailiuake simararagat. Lagaira leu amatangeuan ta'anai sikudduijinia samba enungan amatangeuan. 7Kupaatu poi, “Kineneiget bulatnia sapamianku masisuru Aku samba ralelek ake' sangamberi paasekatKu. Bulatnia rarerepdep sigelaiakenen katubudda. Tapoi amatoila geti, makope le aragalai sikatai bele peile siboiki. 8Tapoi jago! Ngenaake gogoinia kupurio ibailiu Aku sipangangandu. Aipoi Akuteuakean masiruruake' bangsa-bangsa samba purimataat kukau golukku katubudda. Sangaliot polak tata' le kalulut ikomnia oloi golukku. 9Tapoi Kubauake' le patuatda tai bangsa-bangsa, bailiu katubukkungan le rapaninindou, tat katubut taikamanua bagei. Bangsa-bangsa leu Akukuangan le rarereddet. 10Sibabara ka simareunan ka Sudan paamianKu simasaragai nenda momoi sia samba masipanguruat ake' buluakenen ka tubuKu. 11Kateteret nenda, ale kam sapamianKu, buian numaila kam kalulut anugalaiake' kam masisaggangi Aku. Kutuituiake' le' poi senen sirimanua simabuak patuat, samba nusaggangi kam Aku minca' ka leleu sipunenan. 12Sedda te kuoobaake mukuddu simariuriu bangsa simaepe patuat, sipasisiddoni paromanKu. Momoi rakuddu sedda. 13#Pamoil. 14:5 Tai israel sipulelegei ta'an paboboko sia minca' katubut kaseipa', samba ta'an mupajojoat sia puririmanuanda ta anai magulai samba maaban samba ta anai kaloto'akenen.
Urai Puangkakat Baga
14Ale Israel,
puangka' kam baga samba muurai!
Ale Jerusalem,
puangka' kam baga sangaliot patuatmui!
15Kalulut aiariake'an si Tuhan masiukum kam;
Aituituiake'an sangamberi saggakmui.
Aipasisikeli kam rimata Israel, Taikamanuamui.
Kineneiget buian numaloto' kam.
16Babara te teterenia rakuania sirimanua,
“Oi Jerusalem, buinumaloto' kam samba mabele' bagamui.
17Ai jajago kam Tuhan Taikamanuamui Sipulugege.
Amamanang an kam kalulut gegeNia.
Mangka bagania si Tuhan kalulut kam,
kakatet bagaNia iake' kakam purimanuaiat sibau.
18Kalulut kam, puurainangan angkat baga,
kele' sirimanua sipupupunen.”
Ngangan Tuhan,
“Kutataake' le pugejaat baga katubumui.
Paloloiat katubumui kutataake'.
19Babara te gogoinia kutataake' sipaoreiji kam,
Kuujaake' le sirimanua simasakit;
sangamberi sirimanua siribbaiakenen kutoiliake'.
Paloloiat katubudda kubailiuake' katuumunanda;
ka senen kudduat, samba ka sangaliot polak,
raabeuake' le sia samba raumun sia.
20Babara te teterenia,
taikalaggaiatmui simasasaragai Kupalulu sia ratoili.
Kuabeuake' leu kam ka sangaliot polak,
samba purimanuaitmui simaeru' kupaeru' minca'.”
Kise' te ngangan Tuhan.
Currently Selected:
Zep. 3: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
