Pangt. 3
3
Panukanan sibara ka sikut patuat
1Ale togakku, bui nukalipogi apa sigelaiakenenku katubum,
eddangan ipasikeli tiboietku patuatnu,
2kalulut nantat rura samba burut puririmanua
samba aban ituppaiake geti katubum.
3Bule bui ikaddiuake ekeu katet baga samba topit!
Inuake le nenda ka lolokkatnu, suratake nenda ka patuatnu,
4 #
Luk. 2:52
bailiu sesenungan geti katet baga samba puaabeu
ka matat Taikamanua samba leu ka sirimanua.
5Kau imatonem bagam katubut Tuhan ka muinet patuatnu,
samba bui nukaroni puagaiatnu saram.
6Munengake le Nia ka sangamberi galaiakenennu,
iageti roipoakenangan geti enungannu.
7Bui nuaddeake tubum simakope sikut patuat,
kau numaloto katubut Tuhan samba areuake tubum ka sikatai;
8nenda te geti sialeake geti tubum
samba iaarauake sangamberi tolatnu.
9Abeuake si Tuhan kabagat pukayoatnu
samba ka bua siboiki ka sangamberi sigabam,
10masutnangan samba taimemetnangan geti sapou kudduat pangoirukatnu,
samba buranangan geti suat anggurnu kabagat kudduat pasibutcinan.
11Ale togakku, bui nukeraake nganturat Tuhan
samba bui ingau ekeu ka ngantomanNia.
12Kalulut ikau le si Tuhan nganturat ka sirimanua simanuntu bagania,
kele sara ukkui simanuntu baga ka togania.
13Mauktuk te sia sisese sikuat patuat,
sirimanua sibakkati puaagai,
14kalulut puuktungannia bele peile masiuktungi perak,
samba siloketnia bele peile mas.
15Makeppu peile sakinia bele peile pulaingean;
kenanen aponia pa kiddiet bagam, tamomoi tupakereakenia.
16Nantat puririmanua ai kakabeinia sikattoet,
ka kabeinia sikatciu pukaioat samba pubebeunan.
17Enungannia iate enungan simasut angkat baga,
sangamberi enungannia gorat baga le.
18Ibailiu le nia loina purimanuaiat ka sirimanua siukkaakenia,
kasei sipukakaronan katubunia tuoniake le nia simauktuk.
19Kabagat sikut patuat galakakenangan si Tuhan bongen polak,
kabagat puaagaiNia nganangakenangan manua,
20kabagat puaagaiNia pasaragainangan oinan simalio
samba tanai rusa masibaibaiake tinobut.
21Ale togakku, bui ituareu kamatam kerut pupaatuanan samba pusisikut patuat,
kau nupasikelinia nenda,
22oto nenda ibailiu le purimauaiat katubum,
samba pulaingean ka lolokkatnu.
23Puenungnungan geti ka bagat aban
samba ta isosoksok rerem.
24Ke merep ekeu, ta tugegege ekeu,
tapoi merep le ekeu samba malelek laulaunu.
25Bui numaloto katugegekat simatulut,
ele katusubuatda sirimanua sikatai.
26Kalulut si Tuhan le geti ibailiu karonannu,
samba sipasiareuake rerem ka sesere.
Pananakat mugalai simaeru
27Bui nukera simaeru katubut sirimanua simateu masisilo,
ke moi nugalainia.
28Bui nukua ka saaleinu sirimanua, putuituian samba toiliakean ekeu,
mansep geti akekungannia, tapoi tiddogetnia nenda ai katubum.
29Bui nuisiake sikatai ka saaleinu sirimanua
ke taanai pasuksukngan ikuddu katubum.
30Bui nupagoluake sirimanua sitapaluluat,
ke ta iagalai sikatai katubum.
31Bui imasisi bagam ka sigalaiake pukakatai,
samba bui nuului paraboatda,
32kalulut malaga bagaNia si Tuhan ka sirimanua sigalai sikatai,
tapoi malegreNia ka sirimanua simaroipo puririmanua.
33Pateleiat Tuhan ai ka lalepda sirimanua sikatai,
tapoi ipanukani le lalepda simareddet katubuNia.
34Ke iaili sirimanua sioba paloloi, oto nia leu et paloloinangan,
tapoi kudduatda sirimanua ipanukani le si Tuhan.
35Sirimanua simasiku patuat ibakkati le katuumunan,
tapoi sirimanua simakela patuat isilo le geti paloloiat.
@LAI 2015