Pangt. 4
4
Nganturat bule itugaba sikut patuat
1Arepmake kam, ale tatoga, nganturat sara ukkui,
samba lelekngake kam bule nusese kam puaagai kolou,
2kalulut kuake le puaagai simaeru katubumui;
bui nukaddiuake sigelaiakenenku.
3Kalulut kateteret aipeile aku ka lalep ukkuiku sibailiu toga,
siluluk samba sibailiu togat inangku sisasara,
4gelaiakenangan aku ukkuiku, kuanangan, “Obaake patuatnu iometnake tiboietku;
siddoni le sigelaiakenenku, bule imaeru puririmanuam.
5Bakkati le sikut patuat, bakkati puaagai kolou,
bui nukalipoginia, samba bui nutusoip ka sikuakku.
6Bui nukaddiuake sikut patuat nenda, bailiu puukunangan geti ekeu,
pununtukinia baga, bailiu jagonangan ekeu.
7Panandaat sikut patuat iate: Masibakkati sikut patuat
samba ka sangamberi sisilonu kau nubakkati puaagai kolou.
8Abeuakenia, abeuakenangan geti ekeu;
ibailiuake le ekeu siabeu, ke nulakkaiakenia.
9Akenangan te geti kirit ogo simalainge ka utenu
samba panguruatakenangan pulatsanan simalainge katubum.”
10Ale togakku, arepi samba silo le tiboietku,
bule imaburu puririmanuam.
11Kugelaiake enungan pusisikut patuat katubum
kupalulu ekeu ka enungan simaroipo.
12Ke muenung ekeu ta isasaila bakkounu,
ke mubalau ekeu ta isosoksok rerem.
13Siddoni le nganturat, bui nuobaakenia,
pasikeli le nia, kalulut nia te purimanuaiatnu.
14Bui nuenungi enunganda sirimanua sikatai,
samba bui nututnake sirimanua sikatai paraboat.
15Areuake ekeu ka enungan nenda, bui nuenunginia,
bui nutusoip sedda samba riuriuake le nupuenung.
16Kalulut ta memerep sia,
ke tapei ragalaiake sikatai;
tata le laulaura,
ke tapei ramateiake sirimanua;
17kalulut mukom le sia roti pukakatai,
samba mulo anggur.
18Tapoi enunganda sirimanua simatopit kele torot sulu simanseman,
makokope le toronia pat muine toronia imatago.
19Enunganda sirimanua sikatai kele pugepgeman le,
ta raagai aponia lulunia isosoksok reretda.
20Ale togakku, lelekake tiboietku
samba tongiake piunu ka nganturatku;
21bui ituareu sangamberinia nenda ka matam,
koiri le nenda kabagat patuatnu.
22Kalulut nenda te sibailiu purimanuaiatda sisilonia
samba katualeat sangaliot tubutda.
23Pasikeli patuatnu kabagat tarek simakolou,
kalulut sedda te ibabara purmanuaiat.
24Ribbaiake tiboiet pabokoat katubum,
samba areuake katubum tiboiet patajuat sipepeake sirimanua.
25Kau imariuriu nukinere simariuriu ka mata
samba numattai simariuriu kamata.
26 #
Ibr. 12:13
Enungi enungan simagaktuk
samba kau ipusara sangamberi enungannu.
27Bui nutusoip kai kattoet ele kai katciu
areuake rerem ka pukakatai.
@LAI 2015