Pangt. 2
2
Puuktungan masibakkati sikut patuat
1Ale togakku, ke nusilo nganturatku
koiriake tiboietku kabagat patuatnu,
2bailiu lelekakenangan talingam sikut patuat,
samba mare'renangan patuatnu ka puagaiat,
3oo, ke musoga ekeu ka puaagai kolou,
ka puaagai nuipoake tiboietnu,
4ke nugabania kele nugaba perak,
samba nukukrunia kele masikukru pukaioat siugguk,
5sesenungan katukolobat pagalaiat loto ka Taikamanua
samba sesenungan puaagai pagalaiat Taikamanua.
6 Tuhan le masiake sikut patuat,
sibara ka ngunguNia ioi puaagai kolou samba puagaiat.
7Tarekakenangan paroman ka sirimanua simatopit,
ibailiu korabbi ka sirimanua simeru paraboat,
8aijajago enungan katuroipoat,
samba masipasikeli enunganda sirimanua simatopit.
9Againungan geti pagalaiat pubulanan, katuroipoat,
putopinan samba leu enungan purimanuaiat.
10Kalulut sikut patuat tuguru le geti ka patuatnu
samba puaagai siangkaake ketsatnu;
11pusikuat patuat masijago ekeu,
puaagai masipasikeli ekeu
12bule nubela ka enungan sikatai,
ka sirimanua sitiboake patajuat sikatai,
13ka sirimanua sikaddiuake enungan simaroipo
samba sienungi enungan simagepgep simasut jo;
14sipuangka baga sigalaiake sikatai,
mugora baga kalulut patajuat sikatai,
15enungannia simaigi pabilukat
samba simakatai paraboat;
16nubela ka sinanalep sikatai paraboat,
ka sinanalep siooiake, simananam titiboat,
17sikaddiuake simanteunia kateteret mabau peile nia
samba sikalipogi pelelengan Taikamanuania;
18bulatnia te, lalepnia mapepe imaloulou kabagat kamateiat,
enungannia siailiake laggaira taikabaga.
19Sirimanua siei katubunia, taanai katoiliat,
samba ta raaili enungan purimanuaiat.
20Kalulut nenda enungi le enunganda sirimanua simatopit,
samba pasikeli sangamberi enunganda sirimanua simatopit.
21Kalulut sirimanua simatopit le masikukudduiji polak nenda,
samba sirimanua simaeru paraboat le maririuriu mukuddu sedda,
22tapoi sirimanua sikatai tusubuake le sia geti ka polak nenda,
samba sipatataju tukekle le sia ka polak nenda.
@LAI 2015