4Mos. 3
3
Tai Lewi
1Nene te muntogat Aron samba Mose kateteret aipanibo si Tuhan kai Mose ka leleu Sinai. 2#4Mos. 26:60 Oninda tatogat Aron, iate sikebbukat Nadab, iageti si Abihu, Eleazar samba si Itamar. 3Nenda te oninda tatogat Aron, tai imam sinulaiji, sisukatakenen ibailiu siukka galajet puimam. 4#3Mos. 10:1-2; 4Mos. 26:61 Tapoi si Nadab samba si Abihu atataan sia ka matat Tuhan ka simatangeu ka Sinai, kateteret airapangunguruatnake obengan bagei ka matat Tuhan. Ruadda taanai tatogatda. Oto kateteret ai peile muririmanua ukkuira si Aron, siukkaake galajet imam iate Eleazar samba Itamar.
5Kuanangan si Tuhan kai Mose, 6“Koiniake suku Lewi ramalegre samba raei kai imam Aron, bule rapasikelinia. 7Buita ragalaiake galajet kai Aron samba ka sangamberi paamian Israel ka matat Sapou Paailiat samba kisedda te ragalaiake galajet ka Sapou Sipunenan. 8Buita rapasikeli sangamberi bibilet Sapou Paailiat, samba masigalaiake galajet ka tai Israel samba kisedda te ragalaiake galajet ka Sapou Sipunenan. 9Tai Lewi buita nusegeake sia katubut Aron samba tatogania; sibara katalagatda tai Israel buita sangamberitda nenda tusegeake katubunia. 10Tapoi si Harun samba tatogania buita nukau sia masiukkaake galajet sibailiu imam, tapoi siberikabaga silegreake tubutda buita tuukum simateiakenen.”
11Kunangan si Tuhan katubut Mose, 12“Bulatnia te, Kuala tai Lewi ka talagatda tai Israel silit sangamberi tatogatda sikebbukat, siputututu mata siboiki sibara ka suruket, bule tai Lewi ibailiu bakkatKu, 13#2Mos. 13:2kalulut Aku le sibakkat sangamberi tatoga sikebbukat. Kateteret Akumateiake sangamberi tatoga sikebbukat ka laggai Misir, iageti kokoiakekungan addeatKu sangamberi tatogatda tai Isarel sikebbukat, sirimanua samba tarimeu; sangamberinia nenda Aku sibakkatnia; Aku te Tuhan.”
14Kuanangan si Tuhan kai Mose ka simatangeu ka Sinai: 15“Suratnake oninda tai Lewi siripot mungkuat samba muntogatda; sangamberi taimanteu sipurura sangalaggo kapata buita nusuratake.” 16Lepa suratakenangan sia si Mose siripot sikuat Tuhan, kele sikoiniakenen katubunia. 17Nene te onin tatogat Lewi: Gerson, Kehat samba Merari. 18Nene te oninda tatogat Gerson samba samuntogatda: Libni samba si Simei. 19Tatogat Kehat samba samuntogatda iate Amram, Jizhar, Hebron samba Uziel. 20Tatogat Merari samba samuntogatda iate Mahli samba si Musi.
Nene te samuntogatda tai Lewi ka bagat mungkuatda. 21Mungkuat Gerson iate muntogat Libni samba muntogat Simei. 22Igitda sitususurat kateteret sangamberi taimanteu sipurura sangalaggo kapata tusurat ai pitu ngaribu lima ngotu sia. 23Sangamberi muntogat Gerson nene musapou ka teitei Sapou Sipunenan ka isit sikaleleu. 24Siuteake mungkuat Gerson iate si Elyasaf togat Lael. 25Bulat pasikelietda samuntogat Gerson kabagat Sapou Paailiat iate Sapou Sipunenan samba Sapou samba tabbonia, komak ka matatbaliu gugurukatnia Sapou Paailiat, 26komak kekret laibokat samba kekre matatbaliu laibokat ka sangaliot Sapou Sipunenan samba kudduat pasibuluat, samba apprania, samba leu sangamberi galajet sipaakkup ka sangamberinia nenda.
27Mungkuat Kehat iate muntogat Amram, Jizhar, muntogat Hebron samba muntogat Uziel; iate samuntogat Kehat. 28Taddera sisuratakenen kateteret sangamberi taimanteu sipurura sangalaggo kapata tusurat ai balu ngaribu enem ngotu sia, iate sipasikeli bibilet sipunenan. 29Rapusasapou samuntogat suku Kehat nene ka bebet Sapou Sipunenan isit kaiaman. 30Siuteake mungkua Kehat samba samuntogatnia iate Elisafan togat Uziel. 31Pasikeliatda iate Peti Pakerekat baga, meja, reret alito, kudduat pasibuluat, bibilet kudduat sipunenan pakeiet masigalaiake panindogat, kisedda leu et kekre, samba leu sangamberi galajet sipaakkup ka sangamberinia nenda.
32Ute bulat sabeu ka tai Lewi iate si Eleazar, togat Aron, sipasijago sia sipuuku sangamberi bibilet sipunenan.
33Mungkuat Merari iate muntogat Mahli samba muntogat Musi; iate samuntogat Merari. 34Taddera sisuratakenen kateteret sangamberi taimanteu sipurura sangalaggo kapata tusurat ai enem ngaribu rua ngotu sia. 35Siuteake mungkuat Merari samba samuntogatnia iate si Zuriel togat Abihail. Rapusasapou iate ka bebet Sapou Sipunenan isit bare. 36Galaiakenenda muntogat Merari iate masijago lapprit Sapou Sipunenan, loina silittengania, sangamberi ariginia, aponia, sangamberi bibiletnia, samba leu sangamberi galajet sipaakkup ka sangamberinia nenda, 37kisedda leu et arigi laibokat ka sangaliot kudduat sipunenan, aponia, turi' samba apprania.
38Sipusasapou ka matat Sapou Sipunenan ka isit ka belaiat sulu, ka matat Sapou Paailiat iate si Mose samba si Aron samba leu tatogania, sipasigagalaike galajet masijago kudduat sipunenan addeatda tai Israel; tapoi siberikabaga silegreake tubunia, buita tuukum simateiakenen.
39Taddera tai Lewi siripot sikuat Tuhan isuratakenia si Mose samba si Aron, siripot muntogatda, iate sangamberi taimanteu sipurura sangalaggo kapata, ai rua pulu rua ngaribu sia.
40Lepa kuanangan si Tuhan kai Mose, “Suratnake sangamberi tatogatda tai Israel taimanteu sikebbukat sipururura sangalaggo kapata, lepa addenungan igitda, 41samba alanungan tai Lewi addeatKu – Aku te Tuhan – sibailiu silit sangamberi tatoga sikebbukat sibabara ka tai Israel, kisedda leu et tarimeura tai Lewi silit sangamberi toga sikebbukat katalagat tarimeura tai Israel.” 42Iagei suratakenangan si Mose sangamberi toga sikebbukat sibabara ka tai Israel, siripot sikoiniakenen Tuhan katubunia. 43Sangamberi toga sikebbukat taimanteu sisuratakenen kabagat pasisuranan nenda, iate sipurura sangalaggo kapata, ai rua pulu rua ngaribu rua ngotu pitu pulu telu sia.
44Lepa kuanangan si Tuhan kai Mose, 45“Ala tai Lewi silit sangamberi toga sikebbukat sibabara ka tai Israel, kisedda leu et tarimeura tai Lewi silit tarimeura, bule tai Lewi nenda ibailiu bakkatKu; Aku te Tuhan. 46Sibailiu bulagat panebui ka rua ngotu pitu pulu telu tatogatda tai Israel sikebbukat sisabau igitda tai Lewi nenda, 47buita nuala lima syikal sara sirimanua; buita nualania siripot syikal sipunenan – syikal nene rua puluh gera sanenia –. 48Kaunungan perak nenda katubut Aron samba ka tatogania sibailiu bulagat panebui ka sangamberi sirimanua sipulelegei nenda.” 49Lepa alanangan si Mose bulagat panebui addeatda sangamberi sirimanua sisabau igitda sitebuira tai Lewi; 50sibara ka tatogatda tai Israel sikebbukat alanangan perak nenda, sangaribu telu ngotu enem puluh lima syikal, tukilo siripot syikal sipunenan, 51iageti kaunangan si Mose bulagat panebui nenda katubut Aron samba ka tatogania siripot sikuat Tuhan, kele sikoiniakenen Tuhan katubut Mose.
@LAI 2015