4Mos. 4
4
1Kuanangan si Tuhan kai Mose samba kai Aron: 2“Adde kam igit mungkuat Kehat sibailiu mungkuat sisaraakenen katalagat muntogat Lewi, siripot muntogat sibabara kabagat mungkuatda. 3Addemuian sipurura lima pulu, sangamberi sirimanua siorak bulat sipugagalai, bule ragalaiake galajet ka Sapou Paailiat. 4Galajet puukuketda tai Kehat ka Sapou Paailiat iate masipasikeli sangamberi bibilet bulat sipunenan.
5Ke' mutuitui pusapougat, si Aron samba tatogania buita tuguru sia kabaga masigorosotake komak pasitabbo, samba tabboakerangannia ka petit surukat. 6Buita ragalakake ka uddutnia tabbo sibara ka kulit silebbuk, samba ka uddutnia minca buita ranga'ngaake sangabuttet komak simasurou ka sangalionia, iageti buita rakau sangamberi loina pasibairat peti nenda.
7Kisedda leu et ka uddut mejat roti panguruatakenen buita raapoake sangabuttet komak simasurou, samba ka uddutnia buita ragalakake piring, pulokat, pulokat samba kudduat buluakenen saragaiakenen; kisedda leu et roti panguruatakenen buita mariuriu ikuddu ka uddutnia. 8Ka uddut sangamberinia nenda buita ranga'ngaake sangabuttet komak kirmizi, lepa tabborangannia pasamba tabbo sibara ka kulit silebbuk, iageti buita rakau sangamberi loina pasibairat meja nenda. 9Lepa buita raala sangabuttet komak simasurou samba tabboakerangannia ka reret alito sibailiu pasitoro pasamba sangamberi alitonia, lalaptip samba kudduatnia, samba sangamberi kudduat tulania pakeiet masipasikeli reret alito nenda. 10Buita ragalakake pasamba sangamberi bibiletnia ka uddut tabbo sibara ka kulit silebbuk samba galakakerangannia ka uddut pasibairat. 11Ka uddut kudduat pasibuluat sigalai sibara ka mas nenda buita tu nga'ngaake sangabuttet komak samba tabborangannia pasamba tabbo sibara ka kulit silebbuk, iageti kaurangan sangamberi loina pasibairat kudduat pasibuluat nenda. 12Lepa buita raala sangamberi bibilet pakeiet ka panindogat ka kudduat sipunenan, galakakerangannia ka uddut sangabuttet komak simasurou samba tabborangannia pasamba tabbo sibara ka kulit silebbuk, iageti galakakerangannia ka uddut pasibairat. 13Buita rapalina kudduat pasibuluat nenda pasamba abu, lepa nga'ngaakerangan sangabuttet komak simabonan ka uddutnia, 14lepa nenda galakakerangan ka uddutnia sangamberi bibiletnia pakeiet tupasikelinia, iate, bo, pasikakkak, pasisukkai, pasisubui, sangamberi bibilet kudduat pasibuluat nenda, samba ka uddutnia buita ranga'ngaake tabbo sibara ka kulit silebbuk, iageti kaurangan sangamberi loina pasibairat kudduat pasibuluat nenda.
15Lepat itabbonia si Aron samba tatogania sangamberi bibilet sipunenan samba sangamberi bibilet kudduat sipunenan kateteret kepei tuotcaake pusapougat, momoian ratuguru' tai Kehat kabaga raakkatake sangamberi bibilet nenda; tapoi bui iorak sia sangamberi bibilet sipunenan nenda, babara mamatei sia. Oto nenda te sangamberi bibilet ka Sapou Paailiat akkatakenenda muntogat Kehat. 16Tapoi si Eleazar, togat imam Aron, masipuuku tula sibailiu pasipato, laboket sibara ka sangamberi pusinginan, buluakenen simatukkle tugalaiake samba tula pasisukat; buita ta ipuuku sangamberi Sapou Sipunenan samba sangamberi sibabara kabagania, iate sangamberi bibilet sipunenan samba bibiletnia.”
17Kuananngan si Tuhan kai Mose samba kai Aron: 18“Lelengake le bule pusaraat Kehat samba muntogatnia bui imasubu katalagatda tai Lewi. 19Nene te galaiakenenmui katubutda, bule ioi rapurimanua samba bui ramatei, ke' rapalegre tubutda ka sangamberi bibilet Sipunenan: Si Aron samba tatogania bui tatuguru sia kabaga samba tuuddetnake sia senenda ka kudduat puukuketda ka bebet bibilet akkatnakenenda. 20Tapoi tai Kehat bui ratuguru kabaga masiitco bibilet sipunenan nenda, kenanen tamauju, babara mamatei sia.” 21Kuanangan si Tuhan si Mose: 22“Adde leu et igit suku Gerson siripot mungkuat samba muntogatda. 23Suratake' sangamberi sipurura telu puluh kapata pat aili sipurura lima puluh, iate senen sirimanua bulat sipugagalai, bule ragalaiake galaiet puukuket ka Sapou Paailiat. 24Nene te galaiakenenda muntogat Gerson kabagat galajet puukuket samba masiakkatake bibilet nenda: 25buita raakkatake tobat Sapou Sipunenan, samba Sapou Paailiat tabbonia samba tabbo sibara ka kulit silebbuk sikuddu ka uddutnia, kekret matatbaliu Sapou Paailiat, 26sangamberi komak kekre kudduat ka mata samba kekre matatbaliu gugurukat kudduat ka mata sibabara ka sangaliot Sapou Sipunenan samba kudduat pasibuluat, apprania samba sangamberi bibilet galajet ka puukuketda; samba buita ragalaiake sangamberi puukuket bagei sipaakkup ka sangamberinia nenda. 27Sangamberi galajet puukuket suku Gerson buita tugalaiake siripot sikoiniakenen Aron samba tatogania, iate sangamberi galajet masiakkatake bibilet samba galajet puukuket nenda; kau nubailiuake sia sipasikeli sangamberi akkatakenenda. 28Iate galajetda samuntogat Gerson ka Sapou Paailiat. Buita ragalaiake kabagat paneineiat Itamar, togat imam Aron nenda.
29Buita nusuratake tai Merari siripot muntogat sibabara kabagat mungkuatda. 30Suratake sia sipururura telu puluh kapata pat aili sipururura lima puluh, iate senen sirimanua siorak bulat sipugagalai, bule ragalaiake galajet puukuket ka Sapou Paailiat. 31Nene te bulat akkatakenenda sipaakkup ka sangamberi galajet puukuketda ka Sapou Paailiat: sangamberi lapprit Sapou Sipunenan, sangamberi loina silittengania, ariginia, aponia, 32arigit kudduat kamata ka sangalionia, aponia, turinia samba apprania, samba leu sangamberi bibiletnia; sangamberinia iate galaiakenenda. Kau nusausau' pasasara bilet bulat akkatakenenda. 33Iate galaiakenenda samuntogat Merari, iate sangamberi galajet puukuketda ka Sapou Paailiat, bulat galaiakenenda ka paneineiat Itamar, togat imam Aron.
34Kisedda te si Mose samba si Aron sambatda saute paamian Israel rasuratake muntogat Kehat siripot samuntogat sibabara kabagat mungkuatda, 35iate sangamberi sirimanua sipururura telu puluh kapata pat aili sipururura lima puluh, senen siorak bulat sipugagalai sipaakkup ka puukuket ka Sapou Paailiat. 36Oto taddenia sisuratakenenda siripot samuntogatda iate dua ngaribu pitu ngotu lima pulu sia. 37Sia te atusuratake sibara ka muntogat Kehat, sangamberi sigalaiake puukuket galaiakenen ka Sapou Paailiat, iate sisuratakenen Mose samba si Aron, kele sikoiniakenen Tuhan kai Mose.
38Muntogat Gerson sitususurat siripot muntogatda ka bagat mungkuatda, 39iate sangamberi sirimanua sipururura telu pulu ngarura kapata teret siaili lima pulu ngarura, senen sirimanua siorak bulat sipugagalai sipaakkup ka galajet puukuket ka Sapou Paailiat, 40oto taddenia sinuratakenenda siripot muntogat kabagat mungkuatda iate rua ngaribu enem ngotu telu pulu sia. 41Iate igitda sitususurat samuntogat Gerson, sangamberi sigalaiake galajet puukuket ka Sapou Paailiat, iate sia sinuratakenen Mose samba si Aron siripot sikoiniakenen Tuhan.
42Muntogat Merari sitususurat siripot mungkuat ka bagat mungkuatda, 43iate sangamberi sirimanua sipururura telu pulu kapata pat aili sipururura lima pulu, senen sirimanua siorak galaiet puukuket ka Sapou Paailiat, 44oto sia sinuratakenen siripot muntogat kabagat mungkuatda iate telu ngaribu rua ngotu sia. 45Iate igitda sitususurat samuntogat Merari, iate sia sisuratakenen Mose samba si Aron siripot sikoiniakenen Tuhan kai Mose.
46Sangamberi tai Lewi sisuratakenen Mose samba si Aron sambadda siuteake paamian Israel siripot muntogatda sibabara ka bagat mungkuatda, 47iate sangamberi sirimanua sipururura kapata pat aili sipururura lima pulu, senen sirimanua siorak masigalaiake galajet puukuket ka Sapou Paailiat samba galajet masiakkatake bibilet, 48oto taddera sisuratakenen, balu ngaribu lima ngotu balu pulu sia. 49Siripot sikoiniakenen Tuhan kai Mose, oto senesenenda tugalai sibailiu sipuuku aponia galaiakenenda samba akkatakenenda. Kisedda te aitusuratake sia, kele sikoiniakenen Tuhan kai Mose.
@LAI 2015