4Mos. 2
2
Tusau'sau pusapougatda suku-suku Israel
1Kuanangan si Tuhan ka tubut Mose samba kai Aron: 2“Senesenen tai Israel buita musapou ka bebet toggaiatda, siripot tularat sukutda. Buita musapou sia masibokko Sapou Paailiat, simakareunan goiso ka bebenia.
3Sipusasapou ka isit kabelaiat sulu ka bebet sangamberi toggaiatda, iate saladdu Jehuda, siripot mungkuat saladdutda. Siuteake suku Jehuda iate si Nahason togat Aminadab. 4Igitda saladdunia sitususurat iate pitu pulu epat ngaribu enem ngotu sia. 5Sipusasapou ka bebenia iate suku Isakhar. Siuteake suku Isakhar iate Netaneel togat Zuar. 6Igitda saladdunia sitususurat iate lima pulu epat ngaribu epat ngotu sia. 7Iageti suku Zebulon. Siuteake suku Zebulon iate Eliab togat Helon. 8Igitda saladdunia sitususurat iate lima pulu pitu ngaribu epat ngotu sia. 9Igitda sirimanua sitususurat ka bagat saladdut Jehuda siripot mungkuat saladdutda ai sangotu balu pulu enem ngaribu epat ngotu sia. Sia te amutuitui siboiki.
10Toggaiat mungkuat saladdut Ruben iate ka saigit ka kaiaman, siripot mungkuat saladdutda. Siuteake suku Ruben iate Elizur togat Syedeur. 11Igit saladdutda sitususurat epat pulu enem ngaribu lima ngotu sia. 12Sipusasapou ka bebera iate suku Simeon. Siuteake suku Simeon iate Selumiel togat Zurisyadai. 13Igit saladdutda sitususurat lima pulu siba ngaribu telu ngotu sia. 14Iageti suku Gad. Siuteake suku Gad iate Elyasaf togat Rehuel. 15Igit saladdutda sitususurat epat pulu lima ngaribu enen ngotu lima pulu sia. 16Igitda sitususurat ka bagat saladdut Ruben siripot saladdutda sangotu lima pulu sara ngaribu epat ngotu lima pulu sia. Sia te situtuitui ka patunan sikarua.
17Lepa nenda mungkuatda tai Lewi tuitui sia bairatrangan Sapou Tuhan, ka talagat saladdutda sabagei. Makere kele rapusapou, kisedda leu et ratuitui, senesenenda ka kudduat siripot toggaiatra.
18Toggaiat saladdut Efraim, siripot saladdutda, iate ka isit sikaleleu. Siuteake mungkuat Efraim iate Elisama togat Amihud. 19Igit saladdutda epat pulu ngaribu lima ngotu sia. 20Ka bebera iate suku Manasye. Siuteake suku Manasye iate Gamaliel togat Pedazur. 21Igit saladdutda sitususurat telu pulu rua ngaribu rua ngotu sia. 22Iageti suku Benjamin. Siuteake suku Benjamin iate Abidan togat Gideoni. 23Igit saladdutda sitususurat telu pulu lima ngaribu epat ngotu sia. 24Igitda sitususurat ka bagat mungkuat saladdu Efraim siripot saladdutda sangotu balu ngaribu sangotu sia. Sia te situtuitui ka patunan sikatelu.
25Toggaiat saladdut Dan iate ka isit bare, siripot mungkuat saladdutda. Siuteake mungkuat Dan iate Ahiezer togat Amisyadai. 26Igit saladdutda sitususurat enem pulu rua ngaribu pitu ngotu sia. 27Sipusasapou ka bebera iate suku Asyer. Siuteake muntogat Asyer iate Pagiel togat Okhran. 28Igit saladdutda sitususurat epat pulu sara ngaribu lima ngotu sia. 29Iageti suku Naftali. Siuteake mungkuat Naftali iate Ahira togat Enan. 30Igit saladdutda sitususurat lima pulu telu ngaribu epat ngotu sia. 31Igitda sitususurat ka bagat saladdu Dan sangotu lima pulu pitu ngaribu enem ngotu sia. Siate situtuitui sikateitei, siripot toggaiat parubeiatda.”
32Nenda te tai Israel sitususurat siripot sukutda. Taddera sitususurat kabagat mungkuat saladdu pasamba sangamberi saladdutda ai enem ngotu telu ngaribu lima ngotu lima pulu sia. 33Tapoi tai Lewi ta atusuratnake sia pasamba ka tai Israel, kele sikoiniakenen Tuhan kai Mose. 34Iageti galaiakerangannia kisedda tai Israel; siripot sikoiniakenen Tuhan katubut Mose, kisedda arapusapou siripot toggaiatda, samba kisedda te aratuitui, senesenenda siripot muntogat samba sukutda.
@LAI 2015