Hos. 7

1Kuanangan si Tuhan, “Senen ibara patuatku masialeake pamianku tai Israel samba kutoiliake purimanuaiatdra oto kuitco le pukakatai samba jodra. Makere le sia rapaboko, raguruki lalep sirimanua addeat manangkou, samba ka enungan masiraurau. 2Ta'anai rapaatu kapatuatdra aipoi aku geti masirepdep sangamberi pukakatai nenda. Tapoi sangamberi jodra ailakkupman sia bailiu makope kolou le kuitconia.

Jot Israel ka puaranan samba ka pamarenta

3Kuanangan si Tuhan, “Sialei pajoat samba sangamberi galai tubu sikatai rakyat masibesiake masiangkaake bagat rimata samba siabeu kapurimataat. 4Sangamberidra le simapatajuat samba sirimanua sitaimatopit pulalagat bagadra makere boot obengan kapasilabokat roti sitaipujujuluu pei le pangenan masipatarek rarangen roti. 5Ka gogoi punen rimata, ragalai ka rimata samba siabeu kapurimataat mulo anggur pat roro' samba galairangan pagalaiat putaiagaiat patuat. Kalepakatnia rimata puangkanangan baga sambatda simapatajuat nenda. 6Kele obengan kapasilabokat kisedda te ron pukakatai samba golura amubongan kapatuat ka sanganantat soibo, samba pato pujulunangan ibailiu obengan simaoloi.

7Kaoloi golunia, ragalai masipamatei sangamberi siuteake sia, sangamberi rimatadra ramateiake sipatutut. Tapoi kenanen poi pagalaiatnia amakopean katai, ta'anai sia sara manindou katubukku addeat manindou paroman.

Israel samba tai bangsa bagei

8Kuanangan si Tuhan, “Bangsa Isarel apaaleian sia bangsa-bangsa sigoilik sia, bailiu uluirangan sia kele roti simamarak sangasilak. 9Ta'raseseake aipoi paalei ka bangsa-bangsa bagei nenda te, iate itata rondra. Katukappulat tiboi tubudra amalegrengan, tapoi ta'raagai. 10Pubuangan patuatdra tai Israel makalouan, samba aibailiuan toggaiat puseleadra. Kenanen sangamberinia nenda amuailingan, ialeuet ta'ragagaba aku ele toili katubukku, Tuhan Taikamanuandra. 11Tai Israel kaipa le raoba ei kele uma, ngorut sitaiagai patuat siboiki sirimanua ratiddou paroman ka Misir, lepa geti ei sia ka tai Asyur! 12Tapoi senen ratusabau, kupapasang le geti jarik masijarik sia kele sirimanua masilaba uma. Ukumkungan sia geti kalulut sangamberi pukakataira siagaiku.

13Matei le sia, aipoi arakaddiuakean aku. Ipasasabau le sia geti kalulut arasaggangi aku. 14Ta' bulat paninindou katubukku. Ke manindou sia, leppeiakerangan tubudra ka pereman samba musou mureureu baga kele galaiakenendra sirimanua sitaimatonem baga katubukku. Ke manindou sia ratiddou gandum samba anggur pajajakirangan tubutda kele sigalaiakenenda sirimanua sibuluiji sabulungan. Bulat sibulatnia rasaggangi le aku! 15Kenanen poi Aku le amasibauake samba masironake sia, tapoi amukere le sia baga masisaggangi Aku. 16Riuriu le ratut sabulungan sita'anai gege. Tamomoi tukatonemi sia kele rourou situpapakpak. Sautera manibo kabagat buak patuat, kalulut nenda matei le sia geti ka lanjau, samba gagatirangan sia tai Misir.

Currently Selected:

Hos. 7: MWV

Highlight

Copy

Compare