Hos. 8

Katubukkanan Israel kalulut pukakatainia

1Kuanangan si Tuhan, “Nauake kam toggaiat kalotoakenen! Tai saggak masisaggangi laggaiku kele manyang itarakkup ibania! Paamianku masipasabau palelenganku katubudra, samba masisaggangi sangamberi sigelaiakenenku. 2Kenanen poi rakukua aku Taikamanuandra, samba rakua sia leuet paminaku siagai aku, 3tapoi sia ta'raoba masisilo apa simaeru. Oto kalulut neda sia geti rakrukru sia tai saggakra.

4Sapamianku masipilih rimata ta'rarere sipinatuku. Rarot ake siute ake sitaiagaietku. Raala mas samba perakra bule ragalai tularat sabulungan sikau ramasaragai. 5Malaga bagaku katularat jaui mas panindogietdra sikuddu ka laggai Samaria. Bulat magolu aku katubudra. Teret kaipapa sia geti rapalolit tubudra masibuluiji sabulungan. 6Jaui mas panindogiet ka Samaria nenda iate sigalaira siagai masipaddai mas tai Israel! Ta' Taikamanua nenda samba bui ta'tuanauake! 7Paamianku masisogai rusa ialeuet sia geti masimonei julungen monen gandumra ta'makikiniu, ialeuet geti ta'babara tepung addeat komen. Tapoi ke mone nenda makikiniu leu et, ialeuet gandumnia geti raala le bangsa bagei. 8Kele pario simararagat kisedda tai Israel tat nanai katukaunanra minca, samba aibailiuan sia bangsa simaturere kele bangsa-bangsa bagei. 9Kele kalidei simaliak simalawan, kisedda te tai israel masitut siobaket bagadra. Ragaba paroman ka tai Asyur samba rasaki pasuruangan ka bangsa-bangsa bagei. 10Kenanen kisedda aku geti masiruruake samba masiukum sia. Ta'an leu mabuburu geti rakatciakenia ke rimata Asyur masipaoreiji sia.

11Iapei imaigi ragalai mezbah tai Isarel addeat masiposa jo memei maigi leuet kudduatdra addeat masigalai jo! 12Bulat maigi akusurat gelaiakenen ka sia, tapoi sangamberinia nenda ta'arasilo kalulut raaddeake ta'anai lulunia ka sia. 13Raoba masipanguruatake buluakenen katubukku, samba masikau akkulat buluakenen nenda, tapoi aku, Tuhan, ta'maangka bagaku sangamberi buluakenenda. Kineneiget aku geti masirepdep sangamberi jodra samba masiukum sia kalulut sangamberi jo nenda; kutoiliake sia minca ka Misir!

14Tai Israel masigalai lalep, tapoi rakakalipogi sipasibabara sia. Tai Jehuda masipaigi laggai sibara pujagoat, tapoi aku geti masibeleake obengan addeat masilabo itata sangamberi lalep samba laggaira.

Currently Selected:

Hos. 8: MWV

Highlight

Copy

Compare