Dan. 6
6
Ngaliu Singa
1Lepat aimatei si Belsyazar, si Darius tai Media masioppu kudduat purimataat. Kateteret nenda rurania enam pulu rua ngarura. 2Si Darius masirubei purimataatnia bailiu sangotu rua pulunga kupkumen laggai. Senen Kupkumen laggai iuteake sara utet laggai. 3Si Daniel samba rua sirimanua sabagei iuddetnake sia masipasikeli sautet laggai nenda bule bui irugiake rimata. 4Oto si Daniel maeru samba makolou pugagalainia bele peile pugagalaira sautet laggai nenda. Kalulut si Daniel iate simasun ketsat puaagai; samba rimata masiisiake iuddetnakenia ute ka sangaliot purimataatnia. 5Tapoi sautet laggai samba sipasijago nenda rabesiake le masigaba puseleat Daniel kabagat pugagalai ka pamarenta, tapoi ta'amoi, kalulut si Daniel mariuriu le topit samba maroipo samba ta aigalaiake ore baga ele puseleat. 6Lepa kuarangannia, “Ta tasesese berisara puseleat katubut Daniel, ke ta ka enungan puaranannia ka Taiakamanua.”
7Lepa geti ei sia simakere masiailiake rimata samba kuarangan, “Oi Tuanku Rimata Darius, murimanua le Tuanku teret buruburu! 8Kai sangamberimai sipasikeli purimataat Tuanku, samba sautet laggai, amakerean bagamai masisegeake bule tuanku masibelaake surukat sibailiu reddenen simakolou. Oto Tuanku bule nuparentaake kabagat telu pulu ngagogoi ujunia ta tuobaake berisara sirimanua masisegeake panindogat ka sara buluat ele ka sirimanua, ke' ta' katubut tuanku. Kasei masipasabau surukat nenda turibbaiake le geti ka ngaliu singa. 9Kutiddou kai bule Tuanku masiteken surukat nenda bule ibailiunia surukat ka Media samba Persia sitaiooi tusili minca.” 10Iageti tekenangan surukat nenda Rimata Darius. 11Kele aiarep si Daniel pagalaiat nenda, toilinia ka lalepnia. Bilinia ka isit kapata ai jandelania sipaipo ka Jerusalem. Kele simatukkle galaiakenennia, murekkuk, manindou samba masiumun Taikamanua telu ngaminca kabagat sangagogoi ka ipot jandela sitububuka nenda.
12Kateteret tai saggak Daniel masiitco si Daniel ainia maninindou ka Taikamanuania, 13ei sia sangamberitda masiailiake rimata masisegeake si Daniel. Kuarangan, “Ta' pa' Tuanku le amasibelaake surukat masikera sangamberi sirimanua ujut telu pulungagogoi nene masisegeake panindogat katubut sara bulungan ele ka sirimanua, ke'ta' kai Tuanku” Samba kasei leu et sipasabau surukat nenda turibbaiake le geti ka ngaliu singa?”
Aleginangan Rimata, “Kirenangan, parenta nenda ibailiu le surukat ka Media samba Persia sitaioi tusili.”
14Lepa kuarangan kai rimata, “Si Daniel, sara sirimanua siribbaiakenen sibara ka Jehuda, sitaisuru' Tuanku samba sitaireddet parentat Tuanku. Mariuriu le ipanindou telu ngaminca sangagogoi.”
15Lepat aiarep pagalaiat nenda si rimata, makope le reureu bagania, samba gabanangan enungan addeat masibelaake si Daniel. Pat aili ka soibokat si rimata aipeilenia mupaatuat. 16Lepa geti sangamberi sirimanua nenda toili sia masialiake rimata samba kuarangan katubunia, “Agai le, oi Tuanku, siripot surukat Median samba Persia, parenta sibelaakenen rimata ta'momoi tusili.”
17Oto kalepakatnia parentaakenangan rimata bule tulaba si Daniel samba turibbaiakenia kabagat ngaliu singa. Kuanangan rimata katubut Daniel, “Bule Taikamanua panindogietnu simariuriu nenda, Nia te masibelaake ekeu.” 18Pasat nenda ambitrangan samba galakrangan sara bukku sabeu nenda ka ngungun ngaliu, lepa ettetakkenangan tularat sipsipnia rimata ka bukku nenda samba tularat sipsip siabeu tiboitubu ka purimataatnia, bule bui berisara sirimanua moi masibelaake si Daniel ka ngaliu singa nenda. 19Lepa geti toili rimata ka uma purimataat. Ta'ioba mukom ele tupusuibi. Sangasoibo nenda ta ailaulaunia merep.
20Maseggei pei le, suru rimata samba einia siamola ka ngaliu singa. 21Kele aisege sedda, pusoganangan sialei karat baga, “Daniel, pagugulet Taikamanua sipuririmanua! Amoian leu ibelaake ekeu Taikamanum panindogietnu samba reddenennu nenda ka sangamberi singa nenda?”
22Lepa aleginangan si Daniel, “Oi Rimata, murimanua le tuanku teret buruburu! 23Aikoiniakean malaikaNia Taikamanuangku masipetpet ngungun sangamberi singa nenda, bailiunangan ta aragalai apapa katubukku, karena taanai akugalai puseleat katubuNia samba katubut tuanku, ale rimata.” 24Lepa makopenangan angkat bagania rimata samba parentaakenangan bule tubelaake si Daniel kabagat ngaliu nenda. Iageti tiktikrangan si Daniel ka ngaliu nenda, samba berisara siorangan katubunia, kalulut matonem bagania ka Taikamanuania. 25Iageti kaunangan parenta rimata bule tulaba sirimanua sipasisusuksuk si Daniel nenda samba turibaiake sia kabagat ngaliu sambatda tatoga samba tainanalepda. Ta'pei asege sia ka saisai ngaliu nenda, aitarakkupman sia sangamberi singa samba pabuburangan leu tolatda.
26Iageti kaunangan surat Rimata Darius ka sangamberi sirimanua ka sangaliot laggai, suku samba nganga, sikudduiji sangaliot polak, kise ngangania, “Bule ituppai riuriu puririmanuamui! 27Pasamba nene kuake surukat, ka sangaliot purimataat kupkumenku, sangamberi sirimanua buita rakalotoake samba rasuru Taikamanuan Daniel,
Nia iate Taikamanua sipuririmanua teret buruburu,
Nia le mupaparenta teret buruburu.
Purimataatnia ta masususu.
Gegenia ta sasappru.
28Nia masiarauake samba masibelaake,
kiseiet samba pukerengan Nia masigalaiake
ka manua samba ka polak.
Si Daniel aiarauakeanNia,
ka sabbak sangamberi singa.
29Kisedda te aibara puaabeu tiboitubunia si Daniel kateteret puparentaat Darius samba Koresh, tai Persia nenda.
Currently Selected:
Dan. 6: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
