Dan. 7

Ka epat tarimeu samba togat sirimanua

1Ka sara soibo, ka rura siboiki kateteret puparentaat Rimata Belsyazar, rimata ka Babel, pangamutnangan si Daniel samba bara itcot mata ka peremannia. Lepa suratnakenangan pangamutetnia nenda, nene te rubeiatnia sabeu:

2Kuanangan si Daniel, kise: “Ka sara soibo abara itcot mataku. Itcokungan epat matat rusa sibara ka manua masigotco koat simalio. 3#Pamoil. 13:1, 17:8 Iageti tuottounangan epat tarimeu sabeu sibara kabagat koat, tapoi ta makere putubuatnia. 4#Pamoil. 13:2 Siboiki putubuatnia kele singa, ai kappo kele manyang. Kateteret aikukikinere, sinulut tutoktoknangan kapponia. Lepa geti tuakkatnangan barania ka polak samba turioake ka rerenia kele sirimanua, lepa kau katubunia patuat sirimanua.

5Tarimeu sikarua putubuatnia kele beruang. Ipurio ka rerenia kateitei, samba aiaambit telu tolat usu' ka sotnia. Arepkungan nganga masikua katubunia, “Kauan, kom le akkula siobat bagam le iginia!”

6Kateteret aikulelelekngake, ottou minca tarimeu bagei. Putubuatnia kele macan tutul, tapoi kateiteinia ai epat kappot uma'. Tarimeu nenda ai epat utenia, samba katubunia tukau pubebeunan.

7 # Pamoil. 12:3, 13:1 Kateteret aikukikinerenia, ottou tarimeu sikaepat. Tarimeu nenda bulat maron samba magege' samba leu kalotoakenen le. Sotnia sabeu sibara ka laba; itamuake samba ibubuake le saggaknia, lepa legeinia paperakinangannia. Ta makere kele tarimeu sipuboboiki; ai bannia pulu. 8#Pamoil. 13:5-6 Ai kukikinere sangamberi bannia nenda, sinulut tu'tu' sara ban bagei ka oggaknia. Ban nenda magoiso, tapoi moi le ipakarit ele itoktokngake telu ban sipuboboiki nenda. Ban sigoiso nenda ai matania kele matat sirimanua samba ngungu sitiboake pubuangan paatuat.

Itcot mata pagalaiat Nia sipuririmanua teret buruburu

9 # Pamoil. 1:14, 20:4 Aimaririuiru peile kupasiitco, piga pa' kudduat purimataat tugalakngake, lepa pukuddunangan sipuririmanua teret buruburu nenda. LeppeiNia samba alaiNia mabulau kele bantra. Kudduat purimataatNia pasamba sangamberi rodania mutoro kalulut julut obengan; 10#Pamoil. 5:11, 20:12 samba enungan obengan masirarat barania ka kudduat purimataatNia. Mungaribu le sirimanua sipuukuNia, samba mujuta le sirimanua sipuririo kamataNia. Lepa geti kuddu sipasiukum, samba panga'ngarangan sangamberi buko.

11Kateteret aikuiitconia, riuriu le kuarap ngangan ban sigoiso nenda ipatibo ka buak paatuatnia. Iageti tarimeu sikaepat nenda tumateiake, tubunia simamatei nenda, tububuake samba tukau ka obengan sipasilalabo. 12Sangamberi tarimeu bagei atualaan pugegeatnia, tapoi momoi rapurimanua teret gogoi sinetreakenen.

13 # Mat. 24:30, 26:64; Mrk. 13:26, 14:62; Luk. 21:27; Pamoil. 1:7, 13, 14:14 Pasiitcot mataku ka soibo nenda, kuitco le sara kele sirimanua. Moi le nia pasamba tanai rusa ka manua, ambitnangannia ka mataNia. 14#Pamoil. 11:15 Lepa kaunangan katubunia gege samba pubebeunan sibailiu rimata, bailiu sangamberi sirimanua ka sangamberi laggai, suku samba nganga mupagugulet katubunia. Gegenia iate pubebeunan simatom samba sitaitatata. Purimataatnia iate sitaisasappru.

Sangamberi itcot mata nenda tukolouake

15Sangamberi siitcot mata siitcoku nenda sibaraake ingo samba taimangkat bagaku. 16Lepa legerikungan sara sirimanua katalagatda sipuririo sedda samba tiddoukungan katukolobat pagalaiat sangamberinia nenda. Iageti paagainangan katukolobatnia katubukku: 17Kuanangan, “Ka epat ngamuneng tarimeu sabeu nenda iate epat rimata tuottou geti ka polak; 18#Pamoil. 22:5 lepa nenda sangamberi paamian Taikamanua Sipulubeunan rasilo le geti puparentaat samba puparentarangan teret buruburu tatatata.”

19Lepa geti kuoba le kuagai katukolobat tarimeu sikaepat nenda, sitaimakere ka tarimeu bagei. Tarimeu nenda bulat kalotoakenen. Sotnia sibara laba samba suletnia tembaga. Tarimeu nenda simakatai kokom samba sipasibubuake samba masipaperaki silegeijatnia; 20samba pagalaiat sipulu ban ka utenia samba leu pagalaiat ban sigoisoi, iate ban sibara mata samba ngungunia sitiboake pubuangan patuat. Putu'tunangan ban sigoiso nenda bailiu takki telu ban. Ban nenda bulat kalotoakenen bele peile ban bagei.

21 # Pamoil. 13:7 Kateteret akupuleleknia, ban sigoiso nenda pasaggak isaggangi paamian Taikamanua samba kalaakenangan sia. 22#Pamoil. 20:4 Iageti oi Nia sipuririmanua teret buruburu nenda, sineseatakenangan paamian Taikamanua Sipulubeunan. Ailinangan teterenia paamian Taikamanua rasilo gege rapuparenta.

23Oto kise te ngangan sirimanua sipuririo siailiakenenku nenda: “Tarimeu sikaepat nenda iate purimataat sikaepat murio le geti ka polak, sitaimakere ka sangamberi purimataat bagei. Purimatat nenda koiloknangan geti sangaliot polak, bubuakenangannia samba silegeijatnia paperakinangannia. 24#Pamoil. 17:12 Sipulu ban nenda iate pulu rimata sipupaparenta geti ka purimataat nenda. Pasat sia, bara minca sara rimata bagei; ta makerenia ka tai rimata sipuboboiki, samba ikalaake le geti telu tai rimata. 25#Pamoil. 12:14, 13:5-6 Itiboake le geti tiboiet masisaggangi Taikamanua Sipulubeunan samba ipaoreiji le geti paamian Taikamanua. Ibesiake le geti isili tetere, surukat samba enungan puaranan paamian Taikamanua, samba ikupkupmake le geti sia sangarura, rua ngarura samba sitengarura ujunia. 26Iageti parururangan sipasiukum, samba alarangan pubebeunannia bule tupakatai samba tusappruake pat tata. 27#Pamoil. 20:4, 22:5 Puparentaat, gege, pubebeunan samba puaabeu sibara ka sangamberi purimataat ka polak tukau le geti ka paamian Taikamanua Sipulubeunan. Puparentaatda iate puparentaat simatom, samba sangamberi sibara gege rapaguguletake le geti tubutda ka paamian Taikamanua sipulubeunan.” 28Kise te katuareman nenda. Aku, Daniel, pupatuananku bulat sibaraake taimangkat bagaku, pat musi mataku; samba koirikungan sangamberinia nenda ka paatuatku.

Currently Selected:

Dan. 7: MWV

Highlight

Copy

Compare