Dan. 5

Surat ka rupi

1Ka sara gogoi Rimata Belsyazar masisogai sangaribu sirimanua siabeu tiboitubu ka purimataatnia, bule raoi ka punen sibaraakenenia, samba pulonangan angggur ka matat sangaribu sirimanua nenda. 2Ai sia mulolo, si Besyazar masikau parenta raala pulokat mas samba perak, siraurau Nebukadnezar, ukkuinia, sibara ka uman Tuhan ka Jerusalem. Pinaatut Rimata Belsyazar iate bule sia siabeu tiboitubu ka purimataatnia, tainanalepda samba leu tainanalepda kabebe sangamberitda mulo ka pulokat nenda. 3Iageti ambitrangan leu sangamberi pulokat nenda katubunia, sialara ka Uman Sipunenan, Uman Taikamanua ka Jerusalem. Lepa pulorangan sangamberitda ka pulokat nenda. 4Aisia mulolo umunakerangan sabulungan sigalai sibara ka mas, perak, tembaga, laba, loina samba bukku.

5Kateteret nenda leu et, sinulut matoilanangan singongai kabei sirimanua sipanunurat ka rupi uma purimataat, ipot reret alito, samba rimata masiitco teitei takep aimanunurat. 6Lepa pumusinangan matat rimata samba bulat malotonia pat pugeretnangan bokklonia. 7Iageti pugereinangan sabeu nganga si rimata, bule tuambit katubunia simatawa, simasoppit samba siagai toggaiat panyanyat. Kuanangan Rimata katubutda simasiku patuat ka Babel nenda: “Kasei siagai masibasa surat nenda samba ipaagai katukolobatnia katubukku, kukau te geti leppei purimataat kele tubut juba simasuat laiket simakeppu saki samba inu mas toggaiat puaabeu. Ta sarat nenda kubailiuake leu et nia sibailiu sikatelu sibara gege ka purimataatku.” 8Tapoi sangamberi siooi simasiku patuat nenda, ta raagai masibasa surat nenda samba tamomoi rapaagai katukolobatnia katubut Rimata. 9Lepa nenda makopenangan karat bagania Rimata Belsyazar samba mamusinangan matania, kisedda leu et siabeu tiboitubu ka purimataatnia paingonangan sia. 10Kalulut tiboiet rimata samba siabeu tiboitubu ka purimataatnia nenda, tugurunangan inan rimata ka bagat punen nenda; kuanangannia: “Oi Rimata, murimanua le Tuanku teret buruburu! Buian ta imangka bagam kalulut pupaatuanannu tuanku nenda samba buian imamusi matam. 11Aipoi ka purimataat Tuanku ai sara simanteu sisun ketsat sabulungan sipunenan! Kateteret pamarentaat ukkui Tuanku, sirimanua nenda matoila puaagainia, puagai kolou samba sikut paatuat, kele sikut paatuat sabulungan. Aiuddetakeannia Rimata Nebukadnezar, ukkui tuanku, sibailiu ute'ra simasiku patuat, simatawa, tai Kasdim samba siagai masitoggai panyanyat, 12kalulut katubut sirimanua nenda ai ketsat sisaliu puaagai, puaagai samba sikut patuat, bailiu oinangan ikolouake katukolobat pangamutet, masipoiliat simalipput samba masigaba enungan kabelaiat simabesi tupasikeli. Oninia iate Daniel, tapoi rimata masioniakenia Beltsazar. Sogai le nia. Oto kineiget sogaiat le si Daniel samba ipaagai geti katukolobat surat nenda!”

Si Daniel masikolouake katukolobat surat nenda

13Lepa ambitrangan si Daniel ka matat rimata. Iageti parerenangan Rimata katubut Daniel, “Ekeu leu si Daniel tai Jahudi nenda, sara katalagat sirimanua siribbaiakenen siambit ukkuiku sibara ka laggai Jehuda.” 14Akuarepman pagalaiat ekeu, katubum masun ketsatda sabulungan, puagaiat, agai kolou samba sisaliu pusikuat patuat. 15Araambitnan katubukku sangamberi simaagai, simatawa, bule rabasa surat nene samba rapaagai katukolobatnia katubukku, Tapoi taamoi arakua katukolobatnia. 16Tapoi akuarepman pagalaiat ekeu, momoi nuake katukolobat samba momoi nugaba enungan kabelaiat simabesi tupasikeli. Kalulut nenda, Ke moi nubasa surat nene samba masikolouake katukolobatnia katubukku, akekungan geti kekeu leppei purimataat kele tubut juba simasuat laiket simakeppu saki samba inu mas samba uddetakekungan geti ekeu ibailiu sirimanua sikatelu sibara gege ka purimataatku.” 17Iageti aleginangannia si Daniel, “Tuanku taan leu nuaake panguruat katubukku, kauan le ka sirimanua sabagei! Kenanen kisedda, kubabasa samba kupaagaian le katukolobat surat nenda.

18Oi tuanku Rimata, Taikamanua sipulubeunan, aikauan gege sibailiu rimata, puaabeu, pulatsanan samba pubebeunan katubut Nebukadenezar, ukkui Tuanku. 19Kalulut puaabeu sikau Taikamanua katubunia nenda, malotorangan katubunia sangamberi sirimanua ka sangamberi laggai, suku samba nganga; mateiakenangan kasei siobat bagania samba obaakenangan rapurimanua kasei siobat bagania, buakngakenangan kasei siobat bagania samba epeakenangan kasei siobat bagania. 20Tapoi kateteret aimabuak samba aimakela paatuatnia, pat puparaboatnangan kabagat buak patuat, oto tutukluake le nia ka kudduat purimataatnia samba pulatsanan tuala katubunia. 21Tutuituiake le nia katalagat sirimanua samba paatuatnia ibailiu kele patuat tarimeu. Kudduatnia ai katalagat kalidei ka bakkat loina; komennia se'se kele komen jaui samba tubunia masua kalulut tinobut sibara ka manua, teret seseakenangannia, Taikamanua, Sipulubeunan, siteuake purimataatda sirimanua samba masiuddetnake kasei sinausaunia.

22Tapoi Tuanku, Belsyazar, togania, ta aiepeake patuatnia, kenanen sangamberinia nenda iagai Tuanku. 23Ibuakngake le patuatnia Tuanku katubut Tuhan ka manua samba magegenia masikoiniake raambit pulokat katubut tuanku siraurau sibara ka uman Tuhan. Iageti Tuanku pasamba siabeu tiboitubu ka purimataatnia, tainanalepda samba leu tainanalep tuanku kabebe mulo sibara kabagat pulokat nenda. Tuanku masiumun sabulungan sigalai sibara ka mas, perak, tembaga, laba, loina samba bukku, sabulungan sitaiooi masiitco, masiarep ele sitaiagai kolou apa pa. Ta aisuru tuanku Taikamanua sipasiteteuake puririrmanua samba ka mamatei Tuanku samba siteuake enungan puririmanuan Tuanku. 24Nene te lulunia Taikamanua aikoiniake teitei kabei nenda masisuratnake patonekatNia.

25Nene te surat nenda: “Tuadde, tuadde, tukireki, turubei. 26Nene te katukoloubatnia: Tuadde: teteret puparentaat Tuanku aiaddengan Taikamanua samba iaailingan le kalepakatnia; 27Tukireki: atukirekingan Tuanku samba tusese ta masege baga; 28Turubei: purimataat Tuanku turubei samba tukau ka tai Media samba Persia.”

29Iageti koiniakenangan sapaguguletnia si Belsyazar, masileppeiake katubut Daniel leppei simasuat laiket simakeppu saki samba inu mas ka lolokkatnia, samba paagainangan pagalaiat si Daniel, sibailiu sikatelu sibara gege ka purimataatnia. 30Ka soibo nenda leu et mateiakerangan si Belsyazar rimata Babel nenda.

Currently Selected:

Dan. 5: MWV

Highlight

Copy

Compare