Ams. 9
9
Pasiitco sikalima: Tuhan kabebet kudduat pasibuluat
1Itcokungan ipuriosi Tuhan ka bebet kudduat pasibuluat, samba Kuanangan:
“Bo'bo le' simaron tu'tut arigi, bailiu sangamberi tukdak mungeungeu,
samba mabukatnangan nenda ka utera sangamberi sirimanua,
samba sia sipulelegei Kumamateiake psamba lanjau;
beri sara sia sibelaake tubuna.
2Kenanen bai moi raei ka taikabaga,
iala le geti sia kabeiKu sedda;
kenanen bai tusakai sia ka manua,
Kugogorosotake le' geti sia sedda.
3Kenanen bai mulipput sia ka uddut leleu Karmel,
Kugagaba samba Kuaala le geti sia sedda;
kenanen bai mulipput sia ka mataKu ka saisai koat,
Kupaparentaake le' geti ulou masipila sia sedda.
4Kenanen bai muenung sia matat saggakda sibailiu tangsiake,
Kupaparentaake le' geti lanjau masimateiake sia sedda.
Kuipoake le' geti mataKu katubutda
addeat pugejaat bagatda, samba ta'puerukatda.”
5Tuhan Taikamanua Sebaot le'
sipasirarape polak, bailiu pungeungeunangan,
samba sengamberi sikuddujinia mureureu baga,
samba sangamberi polak tusakai kele bagat oinan Nil,
samba ikainia kele bagat oinan Misir.
6Nia sipasiririoake kudduatNia ka manua
samba masibongake lakkupNia ka uddut polak;
sipasisosogai oinan koat
samba masiuruake koat ka uddut polak,
Tuhan nenda te' oniNia.
Taikamanua masikeraake bangsa sipili
7“Ta'pa' makere' le kam kele tai Etiopia ka mataKu,
ale kam tai Israel?” kise te' ngangan Tuhan.
Ta'pa' Aku palulungan
tai Israel bela ka laggai Misir,
tai Pilistin ka Kaftor
samba tai Aram ka Kir?
8Bulatnia te', ai pulelelek Tuhan Taikamanua
purimataat sijo nene:
Kutatata'akenia le nia geti ka polak!
Tapoi muntogat Jakob geti ta' Kutatata'ake, kise te' ngangan Tuhan.
9“Aipoi bulatnia te' Kukakau le' parenta,
samba Kusoso'soake le muntogat Israel ka talagat sangamberi bangsa,
kele rasoso'ake sirimanua soso'so',
samba sangaluiku bukku sigoiso leu ta'bebele ka polak.
10Lulut lanjau mamatei le geti
sangamberi sirimanua sijo ka talagat paamianKu
sipasikukua: Pugejaatbaga nenda geti ta'an babara
samba ta'an geti iaaili kai.”
Palelengan pagalaiat katuaraugat
11 #
Pugap. 15:16-18
“Ka gogoi nenda Kuririoake le' geti minca
sapou David simabubukkat;
Kutatabbo le' geti rupinia simararagat,
samba masirioake minca siragatatnia;
Kugagalai le' minca simakere' kele' siburu';
12bule rabakkati bangsa Edom sipulelegei
samba sangamberi bangsa kuanenKu bakkatKu,”
kise te' ngangan Tuhan sipasigagalai pagalaiat nene.
13“Bulatnia te', babara te' geti teterenia,” ngangan Tuhan,
“ipamamangkru geti masiailiake sipasimomonei
samba sipamimiot buat anggur masikarapake uremen;
sangamberi leleu masibaibaiake anggur sibau
samba sangamberi tinambu geti iebaiji le'.
14Kutotoiliake le' geti minca paamianKu Israel:
ragagalai le' geti minca sangamberi laggai simakakatai samba masukudduijinia;
rapauuremi le' sangamberi monen anggur samba masilo' anggurnia.
Ragagalai le sangamberi monen buat kaju samba masikom buania.
15Iageti Kupauuremi le sia ka polakra,
samba ta'an tupabuburau sia minca ka polak sikauKu katubutra,”
ngangan Tuhan, Taikamanua.
Currently Selected:
Ams. 9: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
