Obj. 1

Iuukumake te Edom si Tuhan

1Nene te' sipatuptupakenen Obaja. Isegeake le' patonekat Tuhan Sipulubeunan pagalaiat bangsa Edom.

Aikoiniakean si Tuhan pakoinietNia ka tubutda tai bangsa samba ataarepingan kam tiboiet sisegeakenennia kele kise: “Kau numatarek kam pasaggak! Sita kam masisaggangi Edom.” 2Samba ka tubut Edom, aikua si Tuhan, kukau le' kam sitaiaddeakenen, bailiu rapaloloi kam sangamberi bangsa. 3Aipatajungan kam buak patuatmui. Laggai sabeu kudduat rimatamui iate leleu bukku simaron, kudduatmui ka leleu simabuak. Lulut nenda paatumuian, “Kasei momoi masibeleake' aku?” 4Kenanen nugalai kam lalepmui simabuak kele purumunan manyang samba kele buak panyanyat ka manua, ta' isoppi Kubebeleake ekeu.

5Sipananangkou samba sipasiraraurau siooi sinoibo, sarat masiala siobat bagania le. Sirimanua sipasimomonei buat anggur ka mone, bui ta'ikokoiake' piga ngambua pa'. Tapoi ratata'ake le' kam tai saggakmui. 6Ale sapunuteteu Esau, ragaugau le' kam samba pukayoatmui kasimalipput leu rararaurau. 7Patajurangan kam saaleimui samba tuituiake'rangan kam ka laggaimui. Kalaakerangan kam saaleimui, samba pajorangan kam sirimanua pakomakenenmui. Panounouakerangan pagalaiat tubumui, kaipangan kineiget puagaiatdra tai Edom 8Ka gogoi Kuukum tai Edom, sirimanua simaagai paatuat subuakekungan sia, sangamberi pusikuat paatuadra leu pepe. 9Sipasasaggak sibara ka T'eman maloto'rangan, samba sangamberi saladruda tai Edom matei sia.

Paluluatnia Aituukum Edom

10“Anugalaian kam gege katubutda sasarainamui sapunuteteu Jakob. Lulut nenda bui ta'tusubuake le' kam, samba rapaloloi kam sirimanua ka sanganantat tetere. 11Puriomuian ka sareunan, ka teteret rapakatai tai saggak matatbaliu Jerusalem samba kalaakerangan laggai nenda. Mengmeng le' kam ka teteret raraurau sangamberi pukayoat Jerusalem samba raparubeinia ka talagadra. Makere' le' kam ka tai saggak nenda. 12Ta' mateu nupuangka baga lulut katai purimanuaiatda tai Jehuda samba mugora' baga ka gogoi katusubuatda sasarainamui. Ta' mateu imabuak tiboietmui ka teteret ai sia kasaggot tubu. 13Ta' mateu nuguruki kam laggaira sapamianKu samba masigereiji sirimanua ka bagat pangoringan, sarapei masiraurau bibiletda ka gogoi pureureugat bagadda! 14Ta' mateu nupurio kam ka parubaat enungan masikekre sirimanua situituiake' tubunia ka saggak, ele' masikau sia katubutda tai saggak ka gogoi aiorak sia pugejaat baga.”

Iuukumake te sangamberi bangsa Taikamanua

15“Bulat amalegrengan gogoinia, Aku, Tuhan, masiukum tai bangsa-bangsa. Aponia sangamberi sigalai Edom bui ta'tulumunake ka tubudda. Raoorik te geti aponia sigalaiakenenda. 16Ka uddut leleuKu Sipunenan, sapaamianKu aralo'an lo' sibailiu toggaiat ukumanda. Tapoi loketdra rubeiat sabangsa-bangsa ka polak nene makope peile pongit. Ukuman nenda ta'momoi rakatsliake. Bui' ta'ralo' le teret sapru, lepa' geti sappru sia.

Kamamanang Israel

17“Tapoi ka leleu Sion, babara te simaarau, samba leleu nenda bailiu kudduat simakokoi addeatKu. Iageti sapunuteteu Jakob bakkatirangan geti minca' polak taikebbukadra. 18PaamianKu tai Israel masilabo sapunuteteu Esau teret sappru, kele obengan ilabo legei siperakat ka mone, beringan sia sara sibara ka punuteteu Esau sibebela. Kise te ngangan Tuhan.

19Tai Jehuda ka kaiaman kudduijirangan leu laggai Edom. Sirimanua sibara ka leleu ka saigit kabelekat sulu masioppu laggai Filistin. Suku Benjamin kudduijirangan leu Gilead, samba Israel paamianKu masibakkati sangaliot tobbou Efraim samba Samaria. 20Tai Israel ka bare' totoili sia baradda ka kudduat katuribbaiatda, samba kudduijirangan geti Fenisia teret ka Sarfat. Tai Jerusalem siribbaiakenen ka Sardis toili geti sia minca', samba bakkatirangan sangamberi laggai karubeiat kaiaman Jehuda. 21Sipulaggai simaarau ka Jerusalem saggangirangan laggai Edom samba kalaake'rangannia. Iageti Aku Tuhan muparenta sibailiu rimata.

Currently Selected:

Obj. 1: MWV

Highlight

Copy

Compare