Ams. 8
8
Pasiitco sikaepat: Karakjak pasamba buat kaju simarak
1Nene' te' sipatoilat Tuhan Taikamanua katubuku: Matoila le' sara karakjang ai kabagania buat kaju simamarak.
2Lepa kuanaganNia: “Aponia anuitco, Amos?” Alegikungannia: “Sara karakjang ai ka bagania buat kaju simarak.” Kuanangan si Tuhan katubuku:
“Teterenia amoian ka paamianKu Israel.
Ta'an kuappeakenia.
3Sangamberi urai ka kudduat sipunenan ibabailiu geti soubaga ka teteret nenda,”
kise te' ngangan Tuhan Taikamanua.
“Ai maigi tubu simamatei. Paribbaiakerangannia sirimanua ka senen kudduat. Mengmengake ekeu!
Pasirepdeman ka sirimanua sipajo sasarainania
4Arepake le' nene, kam sipaperaki sirimanua simageba,
samba simateiake sirimanua sipangogorik ka laggai nene.
5Paatunungannia: “Pingamoi pa' itusasabau laggo sibau,
bule ioi itusakiake gandum
samba pigamoi pa' itusasabau gogoi sabat,
bule ioi tusakiake tarigu
masipagoiso efa, masipabeu syikal,
masigalai pajoat samba kilo patajuat,
6bule tasaki kam sirimanua sitaioitubu kalulut bulagat
samba sirimanua simageba' kalulut ruangasila tarangai;
samba masisakiake tapung simakatai?”
7Amusuppangan si Tuhan ka puaangkatbagat Jakob:
“Bulatnia taan geti Kukakalipogi ka sanganantat tetere sangamberi galaitubutda!
8Ta' pa' mugeret le geti polak kalulut pagalaiat nenda,
bailiu senen sikalaggaiatnia mureureubaga?
Ta' pa' sangamberi polak nenda ibura le' kele bagat oinan Nil,
iparaggai samba ikai kele bagat oinan Misir?”
Taggop sulu samba soubaga
9Ka gogoi nenda geti muaaili te',
kise te' ngangan Tuhan Taikamanua,
10Punen puangkakat bagamui Kubabailiuake geti pureureugat baga,
samba sangamberi uraimui ibailiu geti soubaga.
“Kugagalai le' geti itusone sulu talagat sinago
samba masikau imagepgep polak talagat torot gogoi.
Kukokomakake le' geti komak goni ka senen tenga
samba masibailiuake senen ute' tukuilo'.
Kugagalai te' geti sibailiu pureureugatbaga kalulut ka kamatei togania sisasara,
kalepakatnia bailiu kele gogoi sabau.”
Laje samba oggou
11Bulatnia te' babara geti gogoinia,
kise te' ngangan Tuhan Taikamanua,
Kukakau le' geti pulajeat ka laggai nene,
ta' pulajeat komen ele puooggau oinan,
tapoi pasiaarep tiboiet Tuhan.
12Mueeppak te' geti sia ka senen koat
samba masigejengi barania ka bare ka kabelaiat sulu
masigaba tiboiet Tuhan,
tapoi ta'arasese.
13Ka gogoi nenda kalapuinangan taiokko simalainge tubu
samba tailainge kalulut oggou;
14sia sipususuppa ka onin Asima, rimata Samaria sinanalep
samba sipasikukua: Ka onin taikamanuamui sipuririmanua, ale tai Dan!
samba: Ka onin pueenung ka ka Bersyeba!
sia nenda bele le geti sia samba ta'an tususuru sia minca.”
Currently Selected:
Ams. 8: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
