Ams. 7
7
Pasiitco siboiki: Sit
1Nene te' sipatoilat Tuhan Taikamanua katubukku: Koinong Igalai mungkuat sit, kateteret se'se' sikaut itaddaake iputu'tu, iate se'se' sibau lepat tusaggri iate bakkat rimata.
2Kateteret aitaddaake sit masisapruake siureman ka polak, kuakkungannia:
“Tuhan Taikamanua, akean le katuappekat!
Kipa ioi imatotom si Jakob?
Ta' pa' magoiso le nia?”
3Iageti oleinangan bagania si Tuhan kalulut nenda.
Nenda ta'an muaaili, ngangan Tuhan.”
Pasiitco sikarua: Obengan
4Nene te' aipatoila Tuhan Taikamanua katubuku: Matoila isogai obengan si Tuhan Taikamanua igalaiake pasiukuman. Obengan nenda masipalaboki itata koat simalio samba polak mone.
5Lepa kuakungan,
“Tuhan Taikamanua, ariake'an le' obengan nenda!
Kipa ioi imatotom si Jakob?
Ta' pa magoiso le nia?”
6Iageti oleinangan bagania si Tuhan kalulut nenda.
“Nene' geti ta'an muaaili,” ngangan Tuhan Taikamanua.
Pasiitco sikatelu: Tali kirekat
7Nene' te' sipatoilat Tuhan Taikamanua katubuku: Matoila ipurio si Tuhan kabe'bet sara kekre sipuririo, samba ka kabeiNia ai tali kirekat'. 8Lepa kuanangan si Tuhan katubuku: “Aponia anuiitco, Amos?” Alegikungannia: “Tali kirekat!” Kuanangan si Tuhan:
“Bulatnia te', Kukakau le' geti tali kirekat katalagat paamianKu Israel;
Ta'an Kuappeakenia.
9Sangamberi leleu pasibuluat Ishak geti tupakakatai le',
samba turaragatnake le geti sangamberi kudduat pasibuluat,
samba Kusasaggangi le' geti sangamberi muntogat rimata Jerobeam pasamba lanjau.”
Si Amos tutuituiake ka Betel
10Iageti si Amazia, imam ka Betel, masikoiniake sirimanua masiailiake si Jerobeam rimata Israel, pasamba patonekat: “Aigalaian si Amos pukerekatbaga masisaggangi tuanku katalagat muntogat Israel; laggai nene ta'an ai omake sangamberi tiboietnia.
11Aipoi kasene le' aikua si Amos:
Mamatei le' geti si Jorobeam ka lanjau
samba tai Israel bulatnia mutuitui le sia baratda ka laggaira sibailiu sirimanua ribbaiakenen.”
12Iageti kuanangan si Amazia kai Amos: “Simaitco mata, kenan le, tuituiake ekeu ka laggai Jehuda! Gaba le' komennu sedda samba pusibalat le' sedda! 13Tapoi ba'an pusisibalat minca ka Betel, aipoi nene le' kudduat sipunenan kai rimata, nene te uma sipunenan uma purimataat. 14Alegiat Amos kai Amazia: “Aku nene ta' nabi samba nabi nene ta' rubeiat nabi, tapoi nabi nene sara siputatarimeu samba sipasirururuake buat sileu. 15Tapoi sogainangan aku si Tuhan ka galajetku masigirit biribiri, samba kuanangan si Tuhan katubuku: Kenan, pusibala le' katubut paamianKu Israel.
16Iageti kineiget, arepake ngangan Tuhan!
Kuanungan: Ba' pusisibalat masisaggangi Israel,
samba ba' titiboake tiboiet masisaggangi muntogat Ishak.
17Aipoi kise' le' ngangan Tuhan: Sinanalepnu geti muolop tubu le' ka laggai,
samba togam taimanteu samba tainanalep geti matei le' ka lanjau.
Polakmui tuparubei le' geti pasamba tali kirekat',
ekeu geti matei le' ka polak simalolit,
samba bulat mututuitui le' Israel barania ka laggainia sibailiu sirimanua siribbaiakenen.”
Currently Selected:
Ams. 7: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
