2Taw. 7
7
Tugorosot obengan sibara ka manua; samba urai pusurakat
1Kele ailepa aipanindou Rimata Salomo, tugorosotnangan obengan sibara ka manua masilabo sangamberi buluakenen sibuluakenen kai Tuhan. Iageti toro toggaiat kababarat Tuhan masisutake Uman Tuhan nenda, 2bailiu tai imam tamomoi raguruki Uman Tuhan nenda. 3#1Taw. 16:34; 2Taw. 5:13; Ezra 3:11; Psalm. 100:4-5, 106:1, 107:1, 118:1, 136:1; Jer. 33:11 Kateteret araitco tai Israel obengan aitugorosot sibara ka manua samba toro toggaiat kababarat Tuhan masisutake uman Tuhan, purekkukrangan kabagat uma, masiumun samba masiabeuake Taikamanua kalulut eru samba katet bagaNia sitaitatata.
4Lepa nenda Rimata Salomo samba sangamberi sirimanua siparururu sedda masibuluake buluakenen kai Tuhan. 5Sibailiu buluakenen paabanan ipanguruatake si Salomo rua pulurua ngaribu ngamuneng jaui samba sangotu rua pulu ngaribu biribiri. Kisedda te rimata samba siberikabaga arapuneni uma panindogat nenda kai Tuhan. 6Tai imam murio ka kudduat sikokoiakenen ka sia sipamamatai ka tai Lewi sipasiumun si Tuhan pasamba nauakenen alei urai sigalai Rimata David, samba rauraiake urai “Nuntut bagaNia sitaitatata!” siripot panindogat David. Tai imam masinauake pipiau iageti puriorangan sangamberitda tai Israel.
7Iageti kokoiakenangan si Salomo rubeiat katalagat laibokat ka isit ka matat uman panindogat nenda kai Tuhan. Iageti panguruatakenangan sedda buluakenen rarangen, gandum samba tabet tarimeu sibailiu buluakenen paabanan. Sangamberinia nenda panguruatakenangannia sedda kalulut kudduat pasibuluat tembaga sigalainia makope goiso, bailiu ta mememet sangamberi panguruatakenen nenda.
8Si Salomo samba sangamberi paamian Israel masibaraake punen Sapou Buluk pitu ngagogoi burunia. Bulat maigi sirimanua aparuru ka punen nenda. Moi sia sibara ka laggai ka pasongan Hamat ka bare teret pasongan Misir ka kaiaman. 9Pitu ngagogoi burunia araparuru ka punen masipuneni kudduat pasibuluat, iageti pitu ngagogoi minca ka punen Sapou Buluk. Ka gogoi pangampulat baraakerangan punen pasilepa, 10iageti ka mansepnia imapato iate ka gogoi sikaruapulutelu laggo pitu si Salomo masikoiniake sia ratoili. Muangka baga sia kalulut sangamberi simaeru sigalai Tuhan ka tai Israel paamianNia, kai David samba kai Salomo.
Ipatoila minca tubunia si Tuhan kai Salomo
(1Rim. 9:1-9)
11Kele ailepaake aigalai uman Tuhan samba Uma purimataat siripot sipinatunia si Salomo, 12patoilanangan tubunia minca si Tuhan kai Salomo kateteret sinoibo. Kuanangan si Tuhan kai Salomo, “Akuarepan panindogatnu samba Kusilo Uma nene sibailiu kudduat sikokoiakenen masibuluake buluakenen katubukKu. 13Ke ta Kubeleake urat ele Kukoiniake sit sisappruake siureman ele masibaraake besi' simasappo ka paamianKu, 14samba paamianKu sipakei oningKu nenda muepe patuat, manindou, moi katubukKu samba ragalakake paraboatda sikatai, iageti Aku ka manua Kuarepi te panindogatda. Kuappeake te geti jotda samba Kubabailiuake te laggaira imaeru minca. 15Mariuriu te geti Kupasikeli UmangKu nene, samba matarek Aku masiarepi sangamberi panindogat sisegeakenenda kudduat nene. 16Kugagalaiake te sangamberinia nenda kalulut kudduat nene akupilingan samba akukokoiakean ibailiu kudduat panindogat katubukKu teret buruburu. Kupasisikeli te samba Kujagonia ka sanganantat tetere. 17Ke makere ekeu, kele si David, ukkuinu, murimanua siripot obaket bagakKu, mareddet, ka surukat samba masigalaiake sangamberi sikoiniakenenKu katubum, 18#1Rim. 2:4 iageti sutakekungan palelenganKu ka ukkuinu si David, iate mariuriu le ibara sara katalagat muntogatnia sibailiu rimata ka Israel. 19Tapoi ke ekeu samba sangamberi siberikabaga masipasabau surukat, tiboietKu samba leu masibuluiji taikamanua bagei, 20iageti keklekungan kam ka laggai siakeKu katubumui. Kaddiuakekungan leu Uma nene siteuakenenKu sibailiu kudduat panindogat katubukKu. Bailiuakekungan leu Uma nene loloiet samba gagatiet.
21Kineneiget Uma panindogat nene bulat rasuru, tapoi kateteret nenda senen sirimanua situsasabau sedda makisei le geti kabagatda raitconia. Kuarangan geti, ‘Angoi igalai kisedda si Tuhan ka laggai samba ka Uma nene?’ 22Iageti alegirangannia geti sirimanua, ‘Kalulut arakaddiuakean si Tuhan, Taikamanuanda, sipasiambit taikebbukatda rabela ka laggai Misir. Rabuluiji samba mupalelengan ramariuriu ka taikamanua bagei. Iate lulunia aibaraake si Tuhan gejat baga ka katubutda.’ ”
Currently Selected:
2Taw. 7: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
