2Taw. 6
6
1Kateteret nenda panindounangan Rimata Salomo, “Oi Tuhan nuoba peile mukuddu kabagat gepgep tanai rusa. 2Kineiget kugalai uma simalainge sibailiu kudduatNu teret buruburu?
Tuhan masisunake palelengenNia katubut David
(1Rim. 8:4-21)
3Lepa aipanindou Rimata Salomo pitcanangan ka siberikabaga sipuririo sedda, iageti tiddounangan panukanan Taikamanua uktukra. 4#2Sam. 7:1-13; 1Taw. 17:1-12 Kuanangannia, “Tuumunake le si Tuhan, Taikamanuanda tai Israel, sigalaiake kele sikuaNia katubut David, ukkuiku, kisene: 5Barania akuambit paamianKu bela ka laggai Misir, taanai laggai akupili katalagat sangamberi muntogat Israel bule turioake uma sedda sibailiu kudduat panindogat katubukKu, samba taanai sirimanua akupili bule ibailiu rimata ka paamianKu Israel. 6Tapoi lepa geti pilikungan Jerusalem sibailiu kudduat panindogat katubukKu samba pilikungan si David ipaneinei paamianKu Israel. 7Iageti kuanangan si Salomo: “Ukkuiku si David, aipaatungan masigalai uma panindogat kai Tuhan Taikamanuan Israel. 8Tapoi si Tuhan masikua katubunia: pinaatum nenda maeru, 9tapoi ta ekeu, togam le geti masigagalai umangKu nenda.” 10Kineneiget si Tuhan aisutakean sipinalelekNia, aibailiuakean aku rimata Israel masisailiake ukkuiku samba akugalaian leu uma kudduat panindogat kai Tuhan, Taikamanuan Israel. 11Kabagat uma nenda akutarekakean kudduat Peti Pakerekat Baga kabagania ai bukku lei, palelengan Tuhan pasamba paamian Israel.”
Panindogat Salomo
(1Rim. 8:22-53)
12Iageti purionangan si Salomo ka matat kudduat pasibuluat ka matatda sangamberi paamian Israel, lepa totoiakenangan kabeinia; 13– kalulut si Salomo aigalaian sara langgatan sibara ka tembaga, nantania lima eto, lionia lima eto, buaknia telu eto samba galaknangannia ka gerat –; purionangan ka uddutnia lepa purekkuknangan ka matatda sangamberi paamian Israel samba totoiakenangan kabeinia ka isit ka manua samba panindounangan, 14“Tuhan Taikamanuan Israel! Taanai simakere kele Ekeu, ka manua ele ka polak, anusutakean palelengan samba anupatoilaan nuntut baga ka paamianNu simatopit samba simareddet kamuinet patuat katubum. 15Anusutakean palelenganNu ka ukkuiku kai David. Aponia sipalelekNu nenda anusutakean gogoi nene. 16#1Rim. 2:4 Oto kineneiget, ale Tuhan, Taikamanuan Israel, galaiake siripot sipalelekanenNu katubut paguguletNu kai David, ukkuiku, kise: Muntogatnu ta masusubu kamatakKu samba mariuriu le mukuddu ka uddenan purimataat Israel, ke mariuriu rapurimanua tatogam siripot surukatKu kele nupurimanua kamatakKu. 17Oto kineneiget, ale Tuhan, Taikamanuan Israel, patoila le katubulanan tiboietNu sikuam ka paguguletNu kai David.
18 #
2Taw. 2:6
Tapoi ale Taikamanua, bulatnia leu pa nuoba mukuddu ka polak? Beringan sangaliot manua leu ta malio Kekeu, sarapei uma panindogat sigalaiku nene! 19Ale Tuhan Taikamanuangku, aku paguguletNu! tapoi arepi le panindogatku, samba sutake sitiddouku. 20#5Mos. 12:11 Bule sinago samba sinoibo Ekeu masipasikeli uma nene, uma sikuam sibailiu kudduat onim – arepi le panindogat paguguletNu sisegeakenenmai ka kudduat nene. 21Arepi le sitiddou paguguletNu samba panindogat paamianNu Israel sisegeakenenmai ka kudduat nene; Nuarepi leu sibara ka kudduatNu, ka manua; samba ke nuarepi, oto appeakenungan kai.
22Ke sara sirimanua tusuksuk masigalai sele ka sabagei samba tuambitnia ka kudduat pasibuluat kabagat umam nene ipusuppa kalulut ta aigalai sele, 23ale Tuhan, bule Ekeu ka manua nuarepi samba nutakkiake pakaroatda sapaguguletnu nene. Ukum le simasele samba belaake sitaimasele.
24Ke paamianNu Israel rakalaake sia tai saggakda kalulut jodda katubum, iageti bara olei baga rasuru Ekeu minca sibailiu Tuhan, iageti moi ka uman nene manindou masitiddou katuappekat katubum, 25bule Ekeu ka manua Nuarepi sia, nuappeake jot paamianNu nene, samba Nuambit sia minca ka laggai sikaunu ka sia samba ka tai kebbukkatda.
26Ke majo paamianNu katubum bailiu ta Nubeleake urat, iageti bauakerangan patuatda samba rasuru Ekeu sibailiu Tuhan samba masimattai umam nene manindou katubum, 27oi Tuhan ka manua, arepi le sia samba appeake le jotda sapaguguletNu paamian Israel. Gelaiake le sia sigalaiake simaeru. Lepa nenda oi Tuhan beleake le urat ka laggaiNu nene, laggai sikaunu ka paamianNu ibailiu bakkatda teret buruburu.
28Ke iorak laggai nene pulajeat, besi' simasappo, siureman ipakatainia legeu, gutgut ele sit, ele ke rasaggangi paamianNu tai saggak ele iorak sia oringen, 29bule Nuarepi panindogatda. Ke katalagat paamianNu Israel ai sia kabagat reureu baga manindou katubum sialei masiakkat kabei ka ipot umam nene, 30bule Ekeu ka kudduatNu ka manua Nuarepi samba Nuappeake sia. Sarat Ekeu le siagai bagat pupaatuanan sirimanua. Kalulut nenda galaiake senen katubut sirimanua siripot sigalaira, 31bule maloto paamianNu samba mareddet katubum sanganantania burut rapukuddu ka polak sikauNu ka taikebbukatmai.
32Ke sara sirimanua siooiake sibara ka laggai ka sareunan masiarep pagalaiat pubebeunanNu samba ronNu samba leu mariuriu tarekNu masiropake, iageti oinia ka umam nene manindou katubum, 33bule ka kudduatNu ka manua Nuarepi panindogatnia, bailiu sangamberi sirimanua ka sangaliot polak masiagai samba masisuru Ekeu kele paamianNu Israel, agairangan uma sirioakenenku nene kudduat panindogat katubum.
34Ke nukoiniake paamianNu bule raei pasaggak masisaggangi saggak, iageti kaipa pa rapukuddu, lepa mattairangan laggai sikokoiNu nene samba manindou ka ipot umam nene, 35bule Ekeu ka manua masiarepi panindogatda samba nukau kamanangan katubutda.
36Ke majo paamianNu katubum, – bulat taanai beri sara sirimanua sitaimajo, iageti kalulut goluNu obaakenungan rakalaake sia tai saggak samba raambit sia sibailiu ukumakenen ka sara laggai simareunan ele simalegre, 37bule Nuarepi panindogatda. Ke ka laggai nenda ragalakake sangamberi jotda, samba manindou katubum sialei masimunengake jo samba katai sigalaira, arepake le panindogatda, oi Tuhan. 38Ke ka laggai nenda ka muinet patuat samba sibulatnia rakaddiuake sangamberi jotda samba manindou katubum sialei masimattai ka laggai nene sikauNu ka taikebbukatmai, ka saigit laggai sikokoiNu samba Uma panindogat sirioakenenku nene, 39bule ka kudduatNu ka manua Nuarepi sangamberi panindogatda samba nupununtuki sia baga. Appeake sangamberi jot paamianNu.
40Kineneiget, oi Taikamanuangku, pasikeli le kai samba arepi le panindogat sisegeakenenmai katubum sibara ka kudduat nene. 41#Psalm. 132:8-10 Kineneiget suruake Ekeu, oi Tuhan Taikamanua, samba kenannan ka kudduat puariatNu,
Ekeu pasamba Peti Pakerekat Baga toggaiat pubebeuNu nenda!
Bule, oi Tuhan Taikamanua, tai imamNu muleppei katuaraugat,
samba sangamberi sirimanua simanuntu bagam mugora baga kalulut topitNu.
42Oi Tuhan Taikamanua, bui' nukeraake sirimanua silepa nusukatake,
repdep le sangamberi nuntut bagam katubut David, paguguletNu nenda.”
Currently Selected:
2Taw. 6: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
