2Taw. 8
8
Sigalaiakenen Rimata Salomo
(1Rim. 9:10-28)
1Kele aisabau rua pulungarura tukapplunangan aigalai Uman Tuhan si Salomo samba uma purimataatnia. 2Sangamberi laggai sikau Rimata Hiram katubunia galainangannia minca, lepa koiniakenangan tai Israel mukuddu sedda. 3Iageti oppunangan laggai Hamat samba Zoba. 4Paronnangan leu laggai Tadmor ka kudduat simatangeu, lepa galainangan minca sangamberi kudduat pasikoirikat ka Hamat. 5Paronnangan leu minca laggai Bet-Horon ka tiri samba laggai Bet-Horon ka taggurat ibailiu laggai sibara irip bukku samba matatbaliu gugurukat sibara lekkerat. 6Galainangan leu et minca laggai Baalat, samba sangamberi laggai kudduat pangoirikat samba sangamberi laggai kudduat pasigalangan kereta pasaggak samba kuronia. Sangamberi pinaatunia masigalai laggai Jerusalem, Libanon samba ka sangaliot kupkumennia aigalaiakean. 7Sangamberi sirimanua sipulelegei tai Het, Amori, Feris, Hewi samba tai Jebus, sitaiadddeakenen tai Israel, 8iate muntogat sipukukuddu peile ka laggai nenda sitaimamateiakenenda tai Israel, sia te aikau si Salomo sibailiu sipugagalai simasane, kiseddda te sia teret kineneiget. 9Tapoi tai Israel ta aibailiuake sia si Salomo sibailiu sipugagalai simasane, tapoi ibailiuake sia saladdu, saladdu sipukukuro, ele ute saladdu sipukekereta samba sipukukuro.
10Rua ngotu lima puluh sia igitda ikau galajetda Rimata Salomo masipasikeli sangamberi sirimanua sipugagalai simasane.
11Si Salomo masikau sinanalepnia, togat Parao, sibara ka Laggai David mukuddu ka lalep sigalainia ka sia. Kalulut aipaatu poi si Salomo, “Tamomoi ipukuddu sinanalepku ka uma purimataat David, Rimata Israel, kalulut sangamberi kudduat aituguruake Peti Pakerekat Baga iate sipunenan.”
12Iageti panguruatakenen buluakenen rarangen si Salomo kai Tuhan ka kudduat pasibuluat sigalainia ka matat Uman Tuhan. 13#2Mos. 23:14-17, 34:22-23; 4Mos. 28:9–29:39; 5Mos. 16:16 Buluakenen nenda ipanguruatake siripot Surukat Mose ka senen punen sabeu: gogoi Sabat, gogoi punen Laggo Sibau, samba ka telu punen senen rura, iate punen Roti Sitasioman, punen Pasimoneiat samba punen Sapou Buluk. 14Siripot surukat David, ukkuinia, si Salomo masipagalak galajetda tai imam ka senen gogoi samba ka tai Lewi masiuraiake urai pasiumun kai Tuhan samba masiropake tai imam kabagat masigalaiake punen panindogat. Kisedda leu et sipasijajago Uman Tuhan rubeinangannia kabagat mungkuat ka senen matatbaliu gugurukat, siripot siteuakenen David pagugulet Taikamanua. 15Sangamberi siteuakenen David ka tai imam samba ka tai Lewi pagalaiat kudduat pangoirikat samba pabageibagei, galaiakerangannia simakolou.
16Iageti tukapplunangan sangamberi galajet siripot sipinatut Salomo. Sangamberi galajet, barania ka pasigalangan bukku bongen pat lepa Uman Tuhan, atugalaian simakolou.
17Lepa nenda si Salomo mei ka laggai Ezion-Geber samba ka Elot, laggai sosoroat ka bebet koat Tunang Akaba ka laggai Edom. 18Rimata Hiram masikau katubut Rimata Salomo kinapat samba sirimanua siagai pagalaiat koat. Pulajorangan ka laggai Ofir sambatda sipugagalai katubut Salomo samba alarangan sedda pulu lima ngaribu ngakilo mas, lepa ambitrangannia kai Salomo.
Currently Selected:
2Taw. 8: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
