2Taw. 5

1 # 2Sam. 8:11; 1Taw. 18:11 Kele ailepa aigalai Uman Tuhan nenda, Rimata Salomo, masikoiriake ka kudduat pangoirikat ka uma nenda sangamberi perak, mas samba bibilet bagei sipanguruatakenen David ukkuinia kai Tuhan.

5:2–7:10

PANUKANAN UMA SIPUNENAN

Peti Pakerekat Baga tuambit samba pulatsanan Tuhan masisaluki Uman Tuhan

(1Rim. 8:1-13)

2 # 2Sam. 6:12-15; 1Taw. 15:25-28 Lepa nenda Rimata Salomo masikoniake sangamberi siuteake muntogat, sikebbukat laggai paruru ka Jerusalem bule raotcaake Peti Pakerekat Baga ka laggai David iate ka Sion. 3Oto oi sia sangamberitda ka punen Sapou Buluk. 4Kele araparuru sangamberitda saute, akkatnakerangan peti nenda tai Lewi, 5samba ambitrangannia ka Uman Tuhan. Sapou Tuhan samba sangamberi bibilet rambit leu tai imam samba tai Lewi ka Uman Tuhan. 6Rimata Salomo samba sangamberi tai Israel paruru ka matat peti nenda, iageti panguruatakerangan buluakenen kai Tuhan iate biribiri samba jaui sitaioi tuadde iginia. 7Lepa guruakerangan peti nenda ka Uman Tuhan tai imam samba galakakerangannia ka tei tularat kappot malaika ka Bilik Bulat Sipunenan. 8Kappot tularat nenda aitunganganga masisakkeri peti nenda samba loina pasibairatnia. 9Loina pasibairat nenda makope nanta bailiu tutunia matoila ka matat Bilik Bulat Sipunenan, tapoi ka uja ta matoila. Samba sedda te kudduatnia teret kineneiget. 10#5Mos. 10:5 Kabagat peti nenda taanai bagei kabagania, sarat rua ngambua bukku lei le. Bukku nenda aiguruakean si Mose ka leleu Sinai, kateteret aigalai palelengannia si Tuhan pasamba tai Israel kateteret ai sia musisila baratda ka Misir mei ka Kanaan.

11Lepa geti bela sia tai imam ka Bilik Bulat Sipunenan nenda. Sangamberi tai imam sibabara sedda arapalinaan tubutda, pasara le sia ka mungkuatda senenda. 12Kisedda leu sipuurai tai Lewi ai leu et sia, iate si Asaf, Heman, Jedutun sambatda tatoga samba sasarainanda. Tai Lewi nenda murio saigit ka sikalaut kudduat pasibuluat, samba leppeira iate juto simaalit baga pasamba ceracap, gambus samba kecapi, sambatda sangotu rua pulu tai imam sinauake pipiau. 13#1Taw. 16:34; 2Taw. 7:3; Ezra 3:11; Psalm. 100:4-5, 106:1, 107:1, 118:1, 136:1; Jer. 33:11 #2Mos. 40:34-35Lepa sinauake pipiau samba sipuurai nenda puurairangan simakere urai pasiumun pusurakat katubut Tuhan. Puurairangan sialei nafiri, ceracap samba nauakenen bagei sipaalei ka urai raumun Tuhan. Nene te ngangan uraira: “Umunake si Tuhan kalulut eruNia. Nuntut bagaNia teret buruburu.” Kateteret nenda masutnangan pulatsanan ka Uman Tuhan, 14bailiu tai imam taioinangan rariuriuake panindogat nenda kalulut pulatsanan Tuhan masisaloki Uman Tuhan.

Currently Selected:

2Taw. 5: MWV

Highlight

Copy

Compare