2Taw. 20
20
Pasaggangan masisaggangi Edom
1Iageti piga pa burunia saladdut Moab samba Amon, pasamba sipusasara katubutda iate saladdut Meunim, saggangirangan Jehuda. 2Iageti oi sirimanua masipaagaiake katubut Rimata Josafat, “Bulat maigi saladdut Edom siooi sibara ka silat Koat Simamatei sipasisaggangi ekeu. Araoppungan Hazezon-Tamar.” (Hazezon-Tamar iate makere le nia En-Gedi.) 3Malotonangan simakope si Josafat, lepa panindounangan itiddou enungan sibara kai Tuhan. Iageti koiniakenangan sangamberi siberikabaga ta rapukom. 4Sibara ka senen laggai ka Jehuda ei sia ka Jerusalem ratiddou paroman katubut Tuhan. 5Iageti parururangan sambatda sipulaggai ka Jerusalem ka laibokat sibau ka Uman Tuhan. Rimata Josafat murio kamatatda, 6samba panindounangan ka nganga simaron, “Ale Tuhan, Taikamanuanda taikebbukatmai! Ekeu le Taikamanua ka manua samba Ekeu le masipaneinei sangamberi purimataat laggai, Gege samba ron ai kakabeiNu, bailiu taanai simagege masisaggangi Ekeu. 7#Jes. 41:8; Jak. 2:23 Ekeu le Taikamanuamai. Kateteret akuoi kai ka laggai nene, keklenungan sangamberi sirimanua sikudduiji laggai nene. Lepa kaunungan laggai nene ka muntogat Abraham, suruakNu nenda, ibailiunia bakkatda teret buruburu. 8Lepa laggaijirangan polak nenda, samba galairangan Kekeu kudduat sipunenan uktuk onim. Kuarangan: 9Ke iorak kai pugejaat baga, iate pasaggangan, besi' simasappo ele pulajeat, puriomaian ka matat lalep nene, kamatam, kalulut onim ai kabagat lalep nene. Samba pusogamaian katubum kabagat puokkimanmai, pat arepinungannia samba arauakenungan kai.
10 #
5Mos. 2:4-19
Kineneiget tai Amon, Moab samba Edom masisaggangi kai. Kateteret araoi taikebbukatmai baratda ka Misir, ta anuobaake rakudduiji laggaira nene. Oto taikebukkatmai enungirangan enungan simabokko samba ta arasubuake tai Amon, Moab samba Edom nenda. 11Kineneiget, kise te aragalaiake tai Amon, Moab, samba Edom katubumai. Raoba masikekle kai ka laggai siakeNu katubumai. 12Ekeu le Taikamanuamai! Ukumake sia, kalulut taanai ronmai masisaggangi saladdu simigi nenda, sioba masisaggangi kai. Ta kuagai kai aponia kipa kugagalai kai, kalulut nenda moi kai katubum masitiddou paroman.” 13Sangamberi taimanteu tai Jehuda sambatda tainanalepda samba leu tatogatda ai sia muririo ka Uman Tuhan.
14Katalagat sirimanua simigi nenda ai sara tai Lewi sipuoni Jahaziel. Nia iate togat Zakharia togat Benaya togat Matanya. Kateteret nenda si Jahaziel sopsopnangannia Ketsat Tuhan, 15#2Mos. 14:13-14; 5Mos. 20:1-4 samba kuanangan, “Arepake ale tuanku Rimata Josafat samba sangamberi tai Jehuda samba leu sipulaggai ka Jerusalem. Aikua si Tuhan: Bui' numaloto kam masisaggangi saladdu simigi nenda. Kalulut ta kam pasasaggak, tapoi Taikamanua le. 16Mansep kateteret ai sia mananatra ka enungan Zis, saggangimuian sia. Paaili te kam ka sia ka tutut su'su, ka matat kudduat simatangeu Jeruel. 17Kabagat pasaggangan nene ta pasasaggak kam. Kenan le kam ka kudduat siteuakenen kakam samba pangena kam sedda. Nuinco te kam geti si Tuhan iake kamanangan katubumui. Ale sipulaggai ka Jehuda samba Jerusalem, bui'' makarat bagamui samba bui'' numaloto kam. Kenan kam mansep nuailiake kam sia, ipaalei le geti kam si Tuhan.”
18Iageti purekkuknangan Rimata Josafat. Sangamberi siberikabaga leu murekkuk pasambania masiabeuake si Tuhan. 19Lepa puriorangan tai Lewi sibara ka muntogat Kehat samba Korah, samba puurairangan raumun si Tuhan, Taikamanuan Israel.
20Mansepnia maseggei peile bela siberikabaga ei sia ka kudduat simatangeu Tekoa. Kepei mei sia, si Josafat masikau patonekat katubutda, “Arepake kam tai Jehuda samba Jerusalem! Kau matonem bagamui katubut Tuhan, Taikamanuamui, bailiu mariuriunangan numaron kam. Silo le kam nganturat sibara ka tai nabimui, iageti mauktukmuian!” 21Ka lepat aipatiboake siberikabaga, rimata masikoiniake sipuurai muleppei simakere kele simatukkle rapakei ka punen sikokoi kabagat arat. Sipuurai nenda buita muenung sipatutut kamatat mungkuat saladdu sialei urai, “Umun kam si Tuhan! Nuntut bagaNia sitaitatata!”
22Kateteret sipuurai nenda musoga muurai, galainangan si Tuhan ramasaragai tai saggak sipasisasaggangi sia. 23Saladdut Amon samba Moab masisaggangi tai Edom samba subuakerangan sia. Iageti pamateirangan pasasambatda. 24Kateteret arasege saladdut Jehuda ka kudduat panaikoat ka kudduat simatangeu samba masilelekake kudduatda tai saggak, itcorangan tubu simamatei sipusasaragai ka polak. Taanai berisara katalagatda tai saggak sipuririmanua.
25Iageti si Josafat sambatda saladdunia ei sia masiparauraugi bibiletda tai saggak. Seserangan tarimeu simigi, pugalai, leppei samba bibilet bagei simakeppu saki. Ka lepat araruruake bibilet nenda telu ngagogoi burunia, maigi peile bibilet bagei, bailiu galakrangannia. 26Ka gogoi sikaepatnia parururangan sangamberitda ka Susut Pasiumun samba umunrangan si Tuhan kalulut sangamberi sigalaiNia. Iate lulunia aituoniake su'su nenda “Pasiumun”. 27Iageti uteakenangan sangamberi saladdu si Josafat ratoili ka Jerusalem kabagat angkat baga kalulut aikalaakean saggakra si Tuhan. 28Kateteret arasege ka Jerusalem, puriorangan sipatutut ka Uman Tuhan sialei kecapi samba pipiau. 29Sangamberi laggai bagei bailiu maloto kateteret araarep kipa galainia si Tuhan aikalaake sangamberi saggak Israel. 30Iate lulunia aioi aipupaneinei si Josafat kabagat aban, samba si Tuhan masikau katubunia paabanan ka sangaliot laggai.
Kalepakat pupaneineiat Josafat
(1Rim. 22:41-50)
31Si Josafat ibailiu rimata Jehuda kateteret rurania telupulu lima, samba aipupaneinei ka Jerusalem rua pulu limangarura burunia. Inania iate Azuba togat Silhi. 32Kele si Asa ukkuinia, si Josafat masigalaiake simaeru ka matat Tuhan. 33Tapoi sangamberi kudduat pasibuluat sabulungan ta aipakatai. Siberikabaga leu tapei ka muinet patuatda rapanindou ka Taikamanuan taikebbukatda.
34Pungunguan bagei pagalaiat si Josafat, barania ka panandaat pa aili kalepakat pupaneineiatnia, tusuratake kabagat buko Pungunguan Jehu Togat Hanani sitususurat kabagat buko pungunguan pagalaiat tai rimata Israel.
35Iageti si Josafat masibaraake pasuruangan pasamba si Ahazia rimata Israel, sigalaiake maigi sikatai. 36Aibaraake pasuruangan pasamba si Ahazia bule ragalai kinapat sioi mulajo ka Tarsis. Sangamberi kinapat nenda tugalai ka Ezion-Geber. 37Tapoi Nabi Eliezer togat Dodawa sibara ka laggai Maresa masiparepdep si Josafat, kuanangan, “Kalulut apasuruakngan kam si Ahazia, ipakakatai te geti si Tuhan sangamberi galajetnu.” Iageti makatainangan sangamberi kinapat, taan momoi rapulajo raei ka Tarsis.
Currently Selected:
2Taw. 20: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
