2Taw. 19

Sara nabi masiparepdep si Josafat

1Kele aitoili si Josafat rimata Jehuda kabagat arau ka Jerusalem, 2sara nabi sipuoni Jehu togat Hanani moi katubunia masikua katubunia, “Mateu leu nuropake sirimanua sikatai samba simare're ka sirimanua sipulagaki baga si Tuhan” Sigalainu nenda masibaraake golut Tuhan katubum. 3Kenanen kisedda ai peile simaeru katubum. Anuareuake sangamberi bulungan Asyera bulungan sinanalep buluijietda siberikabaga samba leu anubesiakean murimanua siripot obaket bagat Taikamanua.”

Si Josafat masibaraake pasibaugat

4Rimata Josafat mukuddunia ka Jerusalem. Tapoi mareirei iei masibalou siberikabaga ka sangaliot laggai masina'na sia ratoili katubut Tuhan, Taikamanuan taikebbukatda. 5Ka senen laggai sibara irip ka Jehuda uddetakenangan tai sipasiukum, 6samba masikau parenta nene katubutda, “Kau nupugalai kam kabagat sikut patuat, kalulut nupasihakimi kam ta ka onin sirimanua, tapoi ka onin Tuhan le. Ailelekake kam kateteret nutakkiake kam pakaroat. 7Kau numaloto kam katubut Tuhan, mugalai sipinagaba, kalulut si Tuhan Taikamanuanta malaga bagaNia ka sirimanua sigalaiake patajuat, sioba pasibaggei ele sioba masisilo bulagat ka enungan sitaimaroipo.”

8Kisedda leu ka Jerusalem, si Josafat masiuddetake tai sipasiukum sibara katalagatda tai Lewi, tai imam samba sikebbukat laggai. Buita ratakkiake pakaroat sipaakkup pasisasabau surukat Tuhan samba pakaroat bagei. 9Katubutda tai sipasiukum si Josafat masikau parenta nene, “Enungake kam galajetmui kabagat loto katubut Tuhan. Reddet kam parentaNia kabagat sangamberi galaiakenenmui. 10Ke bara saaleimui sibara ka laggai bagei sisegeake pakaroat pamamatei, pasisasabau surukat ele pasisasabau siteuakenen, kau nukau kam enungan katubutda. Oto kiseddangannia ta masesele sia katubut Tuhan, samba Tuhan ta mugogoluNia katubumui ele katubutda. Galaiake kam parenta nene, bailiu ta masesele kam. 11Imam Sabeu si Amarya kukau gege sabeu ka sangamberi pakaroat sipaakkup ka surukat arat. Si Zebaja togat Ismael, iate Ute laggai Jehuda, kukau gege sabeu ka sangamberi pakaroat bagei. Tai Lewi buita rapasikeli bule sangamberi sitakkiakenen ka pakaroat buita tugalaiake. Reddet kam sangamberi enungan nene samba galaiake kam ka subulatnia. Bule si Tuhan masipaalei sirimanua sipuparaboat simaroipo!”

Currently Selected:

2Taw. 19: MWV

Highlight

Copy

Compare