2Taw. 18
18
Rimata Ahab masisaggangi Ramot-Gilead
Nabit Tuhan pagolu pasamba nabi sipatataju
(1Rim. 22:1-28)
1Kateteret aimakayo samba aimaron purimataatnia si Josafat, rimata Jehuda, talimouakenangan sara katalagat muntogatnia pasamba sara katalagat muntogat Ahab rimata Israel. 2Piga ngarura pa atusabau ei si Josafat masiailiake si Ahab ka laggai Samaria. Si Ahab masija'ja kambing simigi samba jaui komen Josafat samba sipaaleinia, samba na'nanangan si Josafat bule rasaggangi Ramot di Gilead. 3Kuanangan si Ahab, rimata Israel, katubut Josafat, rimata Jehuda, “Noba leu taei sambatta ka Ramot-Gilead?”
Aleginangannia si Josafat, “Kauan, saladdukku musara le geti pasamba saladdum. Pasaggak sita sambatta. 4Tapoi simaerunia tarere boiki si Tuhan.”
5Iageti ruruakenangan si Ahab epat ngotu tai nabi, lepa rerenangan sia, “Momoi leu kuei masisaggangi Ramot?”
Alegirangannia tai nabi, “Momoi! Iaake te geti Taikamanua laggai nenda katubum.”
6Tapoi pererenangan minca si Josafat, “Ta pa anai sene nabi bagei sioi parere kai Tuhan bule taagai enungan sibara ka sia?”
7Aleginangannia si Ahab, “Ai peile sara, si Mikha, togat Jimla. Tapoi malaga bagakku katubunia, kalulut tapei anai aipatuptup simaeru kaku; sarat sikatai le.”
Aleginangannia si Josafat, “Ta kisedda.”
8Iageti sogainangan sara utet saladdu si Ahab lepa koiniakenangannia simaola iei masiala si Mikha.
9Kateteret nenda si Ahab samba si Josafat, ai sia muleppei pubebeunan samba mukuddu ka uddenan purimataat ka kudduat pasiperakat gandum kamatat matatbaliu gugurukat Samaria, samba leu tai nabi ai sia kamatatda masisegeake siripot sipatuptupda. 10Sara katalagatda tai nabi nenda, sipuoni Zedekia togat Kenaana, masigalai ban laba, lepa kuanangan kai Ahab, “Nene te sikuat Tuhan, “Pasamba ban nene te nusukkaiake Siria pat subuakenungan sia.” 11Sangamberi tai nabi bagei masikua, “Saggangingan Ramot, mamanang te ekeu. Iake le geti si Tuhan kamanangan katubum.”
12Iageti sikoiniakenen sipasiala si Mikha, kuanangan kai Mikha, “Sangamberi nabi sabagei masipatuptup kamanangan rimata. Oto bule ekeu leu masipatuptup simaeru kele ka sia.”
13Tapoi aleginangannia si Mikha, “Ka oni Tuhan sipuririmanua, sarat sikuat Tuhan katubukku le kukukua!”
14Kele aisege si Mikha kamatat Rimata Ahab, parerenangan rimata, “Momoi leu kuei kai ruamai Rimata Josafat masisaggangi Ramot?”
Aleginangannia si Mikha, “Kauan, kenannan, bulat mamamanang te ekeu. Iake te geti si Tuhan kamanangan katubum.”
15Aleginangannia si Ahab, “Ke manibo ekeu katubukku ka onin Tuhan, kua le simakolou. Piga ngaminca kuparepdep ekeu ka pagalaiat nene?”
16 #
4Mos. 27:17; Jehz. 34:5; Mat. 9:36; Mrk. 6:34 Aleginangannia si Mikha, “Akuitco saladdut Israel musaragai ka paleleuleleu. Kele tarimeu sitaanai sipasijajago, samba si Tuhan masikua pagalaiat sia, ‘Sirimanua nene taanai siuteake sia. Eddangan ratoili kabagat arau.’ ”
17Iageti kuanangan si Ahab kai Josafat, “Aisesengan sikuakku, tapei anai aipatuptup simaeru kaku! Sarat sikatai le!”
18Kuanangan minca si Mikha, “Kineneiget arepi aponia sikuat Tuhan! Akuitco si Tuhan mukuddu ka uddenan purimataatNia ka manua, samba sangamberi malaika murio ka bebeNia. 19Parerenangan si Tuhan, “Kasei masinana'na si Ahab bule ioba mei pasaggak samba matei ka Ramot ka Gilead” Alegiatda samalaika nenda ta makere. 20Iageti oi sara ketsat, legreakenangan tubunia kai Tuhan samba kuanangan, ‘Aku te masinana'nania.’ Rerenangannia si Tuhan, ‘Kipa enungannia?’ 21Aleginangannia ketsat nenda, ‘Mei le aku samba kubailiuake sangamberi nabi Ahab rapaboko.’ Kuanangan si Tuhan, ‘Kauan, galaiakean nenda, momoi te geti nuna'nania.’ ”
22Kuanangan minca si Mikha, “Nenda te muaaili! Aikauan si Tuhan ketsat pabokoat ka ngungunda tai nabim, kalulut aiteuakean si Tuhan iorak ekeu pugejaat baga!”
23Iageti legreakenangan tubunia nabi Zedekia katubut Mikha, lepa lippatnangan bailat Mikha samba kuanangan, “Kipa ioi ikaddiuake aku Ketsat Tuhan ioi ipanibo katubum?”
24Aleginangannia si Mikha, “Itco boiki toggaiatnia kateteret nutuguru ka sara bilik nupulipput!”
25Kuanangan si Ahab, “Laba kamnia, samba ambit kamnia kai Amon, sipasikupkup laggai, samba katubut Joas, togat rimata. 26Koiniake sia raguruakenia ka papatpanan, samba kau kam lo samba kannia goiso pat toili aku kabagat arau.”
27Kuanangan si Mikha, “Ke toili ekeu kabagat arau, katukolobatnia ta amanibo si Tuhan katubukku. Sangamberi sirimanua sibabara sene ibailiu sipasimuneng.”
28Iageti si Ahab, rimata Israel, samba si Josafat, rimata Jehuda, ei sia masisaggangi laggai Ramot ka Gilead. 29Kuanangan si Ahab kai Josafat, “Kupakau le tubukku samba moi aku pasaggak, tapoi ekeu buita nupakei leppei pubebeunan.” Kisedda rimata Israel ipakau tubunia kateteret aiei pasaggak.
30Kateteret nenda Rimata Aram aiparentaakean sautet saladdu, bule sarat rimata Israel le rasasaggangi. 31Oto, kateteret araitco Rimata Josafat, sangamberi masipaatu nia te rimata Israel. Kalulut nenda saggangirangannia. Tapoi pugereinangan si Josafat, lepa ropakenangannia si Tuhan, samba bilukakenangan si Tuhan pasaggangan ka ipot bagei. 32Kele araagainia sautet saladdut Aram sipukekereta, ta rimata israrel nenda, ariakerangan rasagganginia. 33Tapoi sitaiagaiet baga sara saladdut Aram masipanaake siloguinia sitapaluluat. Tapoi silogui nenda oraknangan si Ahab ka patupppaijat leppei pasaggaknia. Pusoganangan si Ahab ka simuriake keretania, “Aiorakngan aku! Bilukake samba ambit aku tubela ka pasaggangan!” 34Tapoi kalulut maoloi peile pasaggangan, Rimata Ahab mariuriu le ipurio aitututukkenia kabagat keretania aimamatai saladdut Aram. Kateteret aitusone sulu tatania.
Currently Selected:
2Taw. 18: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
