2Taw. 17
17
Si Josafat ibailiu rimata
1Si Josafat ibailiu rimata Jehuda masisailiake si Asa ukkuinia samba iparon tubunia uktuk masisaggangi Israel. 2Pagalaknangan saladdu ka sangamberi laggai sibara pujagoat ka Jehuda samba ka laggai-laggai bagei samba leu ka sangamberi laggai siopput ukkuinia ka Efraim. 3Si Tuhan masisukatake si Josafat kalulut nia masitutake sigalai ukkuinia ta ibuluiji sabulungan, 4tapoi ipanindogi le Taikamanua. Mareddetnia ka sangamberi surukat Taikamanua samba puririmanuania ta kele tai rimata Israel. 5Si Tuhan masikau kai Josafat pubebeu simaron sibailiu rimata Jehuda. Sangamberi siberikabaga masikau panguruat katubunia bailiu makayonangan samba masuru sirimanua katubunia. 6Kabagat ron patuat reddetnangan surukat Tuhan samba pakatainangan sangamberi kudduat pasibuluat sabulungan samba tularat Asyera sabulungan sinanalep ka Jehuda. 7Ka rura sikatelu pupaneineiatnia koniakenangan sabeu tiboi tubu bule ragelaiake surukat Tuhan ka laggai-laggai Jehuda. Sia nenda iate: Benhail, Obaja, Zakharia, Netaneel samba Mikha. 8Aileu sipaalei sia iate siba tai Lewi samba rua tai imam. Tai Lewi nenda iate: Semaya, Netanya, Zebaja, Asael, Semiramot, Jonatan, Adonia, Tobia samba Tob-Adonia. Karua imam nenda iate: Elisama samba Jehoram. 9Ambitrangan buko Surukat Tuhan samba ei sia ka senen kudduat ka sangamberi laggai Jehuda samba gelaiakerangan siberikabaga sedda.
10Si Tuhan masigalai sangamberi purimataat ka bebet Jehuda maloto pasaggak masisaggangi Rimata Josafat. 11Silonangan sibara ka tai Filistin perak simigi samba panguruat bagei, samba sibara ka tai Arab silonangan leu pitu ngaribu pitungotu biribiri samba pitu ngaribu pitungotu kambing. 12Kisedda te si Josafat memei le maburu makokope le pubebeunia. Galainangan pujagoat samba laggai pangoirikat komen samba pamatei. 13Ruruakenangan komen simigi ka laggai nenda, 14senen mungkuat siripot muntogatda. Si Adna iate utet saladdu mungkuat sibara ka muntogat Jehuda. Uteakenangan telu ngoturibu saladdu. 15Si Johanan masiuteake ruangotu balu pulungaribu saladdu. 16Si Amasia togat Zikhri, masiuteake rua ngoturibu saladdu, nia te sara sirimanua sikau tubuna mupagugulet katubut Tuhan. 17Utet saladdu sibara ka sangamberi muntogat kabagat suku Benjamin iate Elyada, sara sirimanua simagege pasaggak. Uteakenangan rua ngoturibu saladdu sibara silogui samba korabbi. 18Sikarua kabagat mungkuat nene iate si Josabad; uteakenangan sangotu balupulungaribu saladdu sibara pamatei. 19Sia te sipugagalai ka Jerusalem. Rimata leu masipagalak mungkuat bagei ka pujagoat ka kupkumen laggai Jehuda.
Currently Selected:
2Taw. 17: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
