2Taw. 11
11
1Kele aisege ka Jerusalem si Rehabeam, ruruakenangan sangotu balu pulu ngaribu saladdunia simaeru sibara ka muntogat Jehuda samba Benjamin, bule rasaggangi tai Israel samba masitoiliake minca pupasikelanannia ka muntogat saigit ka bare Israel. 2Tapoi si Tuhan masikoiniake nabi Semaya 3masisegeake tiboiet nene katubut Rehabeam samba ka sangamberi sirimanua ka muntogat Jehuda samba Benjamin, 4“Bui nusaggangi sasarainam tai Israel. Toiliake ekeu! Aponia sipuaaili teu bagakKu le. Oto sia sangamberitda, masireddet tiboiet Tuhan samba taipuriuriunangan raei masisaggangi si Jerobeam.
Rimata Rehabeam masiparon purimataatnia
5Pukuddunangan si Rehabeam ka Jerusalem samba koiniakenangan sirimanua masigalai kudduat pujagoat laggai ka kupkumen Jehuda samba Benjamin, iate 6Betlehem, Etam, Tekoa, 7Bet-Zur, Sokho, Adulam, 8Gat, Mares, Zif, 9Adoraim, Lakhis, Azeka, 10Zora, Ayalon samba Hebron. 11Paronnangan leu palaggai-laggai sibara pujagoat nenda samba pagalaknangan sara utet saladdu ka senen laggai. Ka senen laggai nenda patareknangan komen, tulat zaitun, anggur, 12korabbbi samba sosoat. Bailiu kupkumen Jehuda samba Benjamin mariuriu kabagat kupkumennia.
13Tai imam samba tai Lewi sibara ka sangamberi kupkumen Israel mei musara kai Rehabeam. 14Tai Lewi nenda rakaddiuake su'su samba polakda, iageti ei sia ka Jehuda samba ka Jerusalem kalulut si Jerobeam samba tatogania sibailiu rimata sipasisailiakenia taan raobaake rapugalai sibailiu imam Tuhan. 15#1Rim. 12:31 Uddetakenangan si Jerobeam tai imamnia bule rapasikeli kudduat pasibuluat sabulungan samba pasibuluat sikameinan samba tularat jaui sigalainia. 16Sirimanua sibara ka muntogat Israel bulat sioba masibuluiji Tuhan, Taikamanuan Israel, ei sia ka Jerusalem masitut tai Lewi bule ioi rabuluake buluakenen kai Tuhan, Taikamanua buluijiet taikebbukatda. 17Bailiu purimataat Jehuda makopenangan imaron. Telu ngarura burunia raropake purimataat Rehabeam togat Salomo nenda samba purimanuarangan kele kateteret pupaneineiat Rimata David samba Rimata Salomo.
18Putalimounangan si Rehabeam kai Mahalat; ukkui Mahalat iate Jerimot, togat David, samba inania iate si Abihail, togat Eliab punuteteu Isai. 19Togania ai telu taimanteu iate, Jeus, Semarya samba Zaham. 20Iageti putalimounangan minca si Rehabeam kai Maakha togat Absalom. Bara togatda epat taimanteu, iate Abia, Atai, Ziza samba Selomit. 21Si Rehabeam ai pulu balu sinanalepnia samba enem pulu sinanalepnia ka be'be, rua pulu balu tatogania taimanteu samba enem pulu tatogania tainanalep. Katalagat sangamberi sinanalepnia samba sinanalepnia ka be'be bulat makope nuntut bagania iate si Maakha. 22Iate lulunia si Abia togat Maakha makope obanania bele peile ka tatogania sabagei, bailiu si Abia le aiteuake masisailiakenia sibailiu rimata. 23Kabagat pusikuat patuat kaunangan galajetda tatogania si Rehabeam samba pagalaknangan sia ka laggai-laggai sibara irip ka sangaliot kupkumen Jehuda samba Benjamin. Kaunangan leu komenda simakope igi samba leu patareknangan tainanalep simigi sibailiu sinanalepda.
Currently Selected:
2Taw. 11: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
