2Taw. 12
12
Rimata Misir masisaggangi Jehuda
(1Rim. 14:21-31)
1Kele aimaron pupaneineiat Rehabeam sibailiu rimata, taipuletseirangan surukat Tuhan 2samba taimareddetrangan sangamberitda. Kalulut nenda ukumnangan sia si Tuhan. Ka rura sikalima pupaneineiat Rehabeam, si Sisak rimata Misir masisaggangi Jerusalem 3pasamba sangaribu rua ngotu kereta pasaggak, enem pulu ngaribu saladdu sipukukuro, samba maigi saladdu sitaioi tuadde iginia, samba leu saladdu Libia, Suki samba Etiopia. 4Oppunangan leu palaggai-laggai sibara pujagoat ka Jehuda pat aili ka bebet Jerusalem.
5Kateteret nenda Rimata Rehabeam samba sia siuteake Jehuda aparuruan sia ka Jerusalem kalulut arapuloto kai Sisak. Iageti oi nabi Semaya katubutda samba kuanangan katubutda, “Kise te ngangan Tuhan, ‘Anukaddiuakean kam Aku, oto kineiget Aku leu masikaddiuake kam bailiu kupkupakenangan kam si Sisak.’ ” 6Rimata samba sia saute sabagei masiseseake jo sigalaira, kuarangan, “Sigalaiakenen Tuhan nenda sineseat le.”
7Kele aiitconia si Tuhan babauakera patuatda, panibonangan minca kai Semaya, kuanangan, “Kalulut arabauakean poi patuatda, oto taan Kususubuake sia. Kubebelaakean le sia; Jerusalem taan mararagat. Kenanen kisedda, si Sisak 8mariuriu le ikupkupake sia, bule raagai baggeinia mupagugulet katubukKu samba mupagugulet ka siabeu tiboi tubu ka polak.”
9 #
1Rim. 10:16-17; 2Taw. 9:15-16 Iageti oi si Sisak masisaggangi Jerusalem samba rauraunangan bibilet simakeppu saki ka Uman Tuhan samba ka uma purimataat, samba leu korabbi mas sigalai Rimata Salomo. 10Sibailiu silinia galainangan korabbi tembaga si Rehabeam, samba kaunangannia ka sautet saladdu sipasijago matatbaliu gugurukat uma purimataat bule rajago korabbi nenda. 11Senen iei rimata ka Uman Tuhan, ambitrangan sangamberi korabbi nenda sipasijago, lepa nenda toiliakerangannia ka bilik pujagoatda saladdu. 12Kalulut aiepeakean patuatnia si rimata kai Tuhan samba aipeile simaeru ka Jehuda, bailiu malebaknangan golut Tuhan kai Rehabeam samba taan aisubuakenia.
13Si Rehabeam mupaneinei ka Jerusalem samba pubebeunannia memei le mabebeu. Epat pulu sara ngarurania kateteret aibailiunia rimata samba pulu pitu ngarura burunia aipupaneinei ka Jerusalem laggai sikokoiakenen Tuhan sibailiu kudduat panindogat katubuNia. Inan Rehabeam iate Naama sibara ka laggai Amon. 14Si Rehabeam masigalaiake sikatai kalulut ta aibesiake masigalai siobat bagat tuhan.
15Pungunguan pagalaiat Rehabeam barania ka panandaat pat aili kalepakat samba paninikatnia tusuratake ka buko Pungunguan Nabi Semaya samba kabagat buko Pungunguan Nabi Ido. Si Rehabeam samba si Jerobeam mariuriu ibara pasaggangan. 16Iageti tata si Rehabeam samba turateake ka puariat tai rimata ka laggai David. Si Abia, togania, ibailiu rimata masisailiakenia.
Currently Selected:
2Taw. 12: MWV
Highlight
Copy
Compare
Share
Want to have your highlights saved across all your devices? Sign up or sign in
@LAI 2015
