A-FWILIPU 4
4
1Kashika, mandumbu jami a zango, nakunuvwila usona, uwahililo wami ni chipangula chami, chocho manenu ngú muli Mwene, akwetu a zanga.
2Ngunaliumbu kuli Evotia ni Sentiki, akapwe ni kunyonga chimuwika muli Mwene. 3Ewa, ngunaliumbu kuli yena nawa, chikwashi-ni-mukwetu ngwami, Kwasa kama wano mapwo, mumu akilikichile hamwe ni yami mu sango lipema, ni Kelemente nawa, ni akwa milimo-ni-akwetu akwo, waze majina jo mwali mu mukanda wa mwono.
4Wahililenu muli Mwene matangwa eswe: cheka nawa mungwamba ngwami, Wahililenu. 5Umbovu wenu ukamoneke kuli atu eswe. Mwene hakamwihi ali. 6Kanda nukalipikala ha nichimwe; alioze ha yuma yeswe ku kulemba ni kuliumba hamwe ni kusakwila, kwita chenu akachinyingike kuli Zambi. 7Ni sambukila ya Zambi, yize yakuhiana kunyonga cheswe, muyikafunga mbunge jenu ni kunyonga chenu muli Kristu Yesu.
8Ha yize yinasala, mandumbu, yeswayo yamwenemwene, yeswayo kuyishi lwelia, yeswayo ya ululi, yeswayo yitoma, yeswayo yatela kufwila, yewsayo ya lufuma mupema; kachi kuhiana chimwe, kachi uhaliso umwe, nyongenu ha yino yuma. 9Yuma yize anulongesele, yize nwatambwile, yize nwevwile, yize nwamwene muli yami, yino yuma lingenu; ni Zambi ya sambukila makapwa hamwe ni yenu.
10Nawahililile chikolo muli Mwene ngwe haliapwila ha kusula, hinunasokolwesa kunyonga chenu hali yami; mumu nwangunyongene wate, alioze nwahonene mwaka upema. 11Chahanjikile ngwe ngunahono, ka: mumu hingunalilongesa kuyuka ni yuma yeswayo nguli nayo. 12Ngunanyingika chize changutamba kulilelesa; ngunanyingika nawa ngwe chize kulumbama: mu majila eswe, ni ha yuma yeswe, ni kukuta ni kwivwa zala nawa, ni kulumbama ni kuhona. 13Kunahasa kulinga yuma yeswe muli yoze wakunguhashisa.
14Hindu nwalingile kanawa nwalianyinyine ni luyinda wami. 15Ni yenwene nawa nunanyingika, yenu A-Fwilipu, ngwe ha uputukilo wa sango lipema, muze nakatukile ku Masendoniya, chikunpilwila nichimwe kuchalianyinyine ni yami ha kutwala ku kuhana ni kutambula, shina yenu wika; 16mumu chipwe mu Tesalonika, nwatumine kashi, kaali, nikungwaha yize nahonene. 17Kuchapwile ngwe ngunafupu chawana, alioze ngunafupu chikolo mihuko yize yakulumbama kuli yenu. 18Alioze yuma yeswe nguli nayo; nguli nayo ya kulumbama: ngunazala tò, se natambwile kuli Epafwonditu yuma yize nwatumine, lupembo mupema, chitapo cha kupemena chikolo kuli Zambi. 19Chocho Zambi yami kumakanwaha yize yeswe munuhona nikulita ni upite wenyi mu uhenya muli Kristu Yesu. 20Haliapwila uhenya ukapwe kuli Zambi yetu kanda Tata yetu ndo ku miaka yeswe ya mutolo. Amene.
21Menekenu asandu muli Kristu Yesu. Mandumbu waze ali hamwe ni yami kananumeneka. 22Asandu eswe kananumeneka, ni kuhiana chikolo akwa zuwo lia Sesare.
23Vumbi lia Mwene Yesu Kristu likapwe hamwe ni yenu eswe. Amene.
Currently Selected:
A-FWILIPU 4: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
