A-KOLOSU 1
1
1Yami Paulu, postolo wa Yesu Kristu ku upale wa Zambi, hamuwika ni ndumbwetu Timoteu,
2Kuli asandu kanda mandumbu amwenemwene muli Kristu, waze atwama mu Kolosu:
Vumbi kuli yenu ni sambukila ya kuli Zambi Tata.
3Twakusakwila kuli Zambi Tato ya Mwene wetu Yesu Kristu, matangwa eswe ha kulemba hali yenu, 4se hitunevu ha Ufulielo wenu muli Kristu Yesu, ni zango lize nuli nalio kuli asandu eswe. 5Mumu ha kutalatala chize hananutulikila mu malilu; ha chino nwevwile kulu mu liji lia umwenemwene wa sango lipema. 6Lienalio hilineza kuli yenu, chizechene ngwe hilineza hano hashi heswe mukwima mihuko, nikutatuka chizechene ngwe muli yenu nawa, chize ku tangwa lize nwaliangile kwivwa ni kunyingika liakulu vumbi lia Zambi; 7chizechene ngwe nwalilongesele kuli Epafwa, mukwa kulingila-ni-mukwetu, tunamuzange chikolo, yoze wapwa kavumbi wamwenemwene wa Kristu hali yenu. 8Mwenawo nawa watulwezele zango lienu muli Spiritu.
9Ha chikuma chino, ni yetu nawa, chize ku tangwa lize twachivwile, kutushi kulitwamina kunulembela ni kunwichila, hanga nukazale tò ni yinyingi yeswe ya upale wenyi ni mana eswe ni malinjekela ja uspiritu; 10hanga nukende ngwe chinatela Mwene ku upemeno weswe, nukeme mihuko ha yitanga yeswe yipema, nukatatuke ni yinyingi yeswe ya Zambi: 11nukalikoleze ni tachi jeswe nikulita ni ndundo ja uhenya wenyi, hanga nukapwe ni utunu weswe ni uhomboloji hamwe ni uwahililo: 12nukasakwile kuli Tata, yoze hanatutesa ha kutambula chihanda cha chihinga cha asandu mu pangu; 13mwenawo hanatupulula ku chiyulo cha milima, hanatututulwila ku wanangana wa mwe Mwana wa zango lienyi. 14Muli iye ukule wetu tuli nawo ku manyinga jenyi, we ukonekeno wa milonga yetu.
15Mwenawo che kulifwa cha Zambi, yoze keshi kumoneka, iye mutangu wa yuma yeswe ya kutanga: 16mumu kuli iyo yuma yeswe yatangiwile, mu malilu ni hano hashi, yuma yize yakumoneka, ni yize kuyishi kumoneka, chipwe ngunja ja mianangana, hanji wene, hanji mawanangana, hanji yiyulo: yuma yeswe yatangiwile kuli iye, ni hali iye; 17iye kapwa kulutwe lia yuma yeswe, ni yuma yeswe kuyakupwa muli iye. 18Iye we mutwe wa mujimba, che chikungulwila: iye we uputukilo, mutangu kusemuka hakachi ka afu; hanga akapwe ni muhela utangu helu lia yuma yeswe. 19Mumu che kupwa cheswe cha Uzambi chatwama muli iye nikuwaha. 20Muli iye kuwanyisa yuma yeswe kuli iye mwene, se hanalingi sambukila ku manyinga ja ku kulusu yenyi; kuli iye ngwami, Chipwe yuma ya hano hashi, hanji yuma ya mu malilu.
21Ni yenu, se ha miaka ya kunyima nwahandunukine, nwapwile akwa kole mu kunyonga chenu mu yitanga yenu ya ungulungulu, 22hindu haliapwila hananuwanyisa mu mujimba wa musunya ku kufwa, mukunutumbikila ku usandu, kunushi kapalia, akwa kusamba kumeso jenyi. 23Kachi mununyongonona mu Ufulielo, akwa kujikiza, akwa kukola; kachi kunushi kututuluka ku kutalatala cha sango lipema, lize nwevwile, lize ambujolele kuli atu eswe mushi lia lilu; ha liyo yami Paulu kunapwa kavumbi.
24Haliapwila nakuwahilila ha lamba liami hali yenu, nakuzalisa chize chinahono ku luyinda wa Kristu mu musunya wami, mumu ha mujimba wenyi, wenawo che chikungulwila. 25Ha chiyo yami kunapwa kavumbi nikulita ni uselo wa Zambi, uze anguhele hali yenu, mukumanununa liji lia Zambi. 26Chijimbikilo chino chahengamine chize ku miakulwila ni ku yisemuko: alioze haliapwila hanachisolola kuli asandu jenyi. 27Kuli ayo Zambi wafupile kulweza chize chapwa kulumbama cha uhenya wa chijimbikilo chino hakachi ka mavungu, chenacho Kristu muli yenu, che kutalatala cha uhenya. 28Iye twakumwambujola, nikukanyamisa mutu ni mutu, nikulongesa mutu mweswe ni mana eswe, hanga tukatumbikile mutu ni mutu mungunu muli Kristu. 29Ha chino nawa nakukilikita nikulitachika, nikulita ni kulinga chenyi chize chakulinga muli yami ni tachi.
Currently Selected:
A-KOLOSU 1: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
