A-NGALASHIA 3
3
1Yenu A-Ngalashia nunahepuka, iya hananwongo, yenu, kwe kumeso jenu, asolwele pundu Yesu Kristu wa kuliachila ha kulusu? 2Chino wika ngunazange kunyingika kuli yenu ngwami, Nwatambwile Spiritu ku yitanga ya shimbi, nyi, shina ku kwivwa cha Ufulielo? 3Nunahepuka Chichize, nyi? Se nwaputukile muli Spiritu, munumanununa mu musunya, nyi? 4Nwevwile lamba lipwa haha chamokomoko, nyi? Kachi chamwenemwene hichapwa chamokomoko. 5Yoze kashika wakunwaha Spiritu, nikulinga yipupu hakachi kenu, kakuchihnga ku yitanga ya shimbi nyi, shina ku kwivwa cha ufulielo?
6Chizechene ngwe Apalahama afulielele Zambi, mba amuhelecho ha ululi. 7Kashika nyingikenu waze a ku Ufulielo e ana a Apalahama waze. 8Che chisoneko, nikumona Shimbu-kanda ngwe Zambi makasambisa akwa mavungu ku Ufulielo, chambulwile Shimbu-kanda sango lipema kuli Apalahama, ngwo, Muli yena akwa mavungu eswe kumakawaha. 9Chocho akwa Ufulielo haawahisa hamwe ni Apalahama mwe mukwa ufulielo.
10Mumu waze eswe a ku yitanga ya shimbi, kushi lia shingo ali: mumu chinasonewa ngwo, Kashingiwa mweswe keshi kunyongonona mu yuma yize yeswe yinasonewa mu mukanda wa shimbi mukuyilinga. 11Mba chinasoloka pundu mutu niumwe keshi kumusambisa ku shimbi kumeso ja Zambi; mumu mukwa ululi kumenda ku Ufulielo. 12Hindu shimbi hi ya ku Ufulielo ko; alioze yoze wakuyilinga kumapwa ni mwono ku yiyo. 13Kristu hanatukula ku shingo lia shimbi, se a amupwishile shingo hali yetu; mumu chinasonewa ngwo, Kashingiwa mweswe hamuzezeleka ha mutondo. 14Hanga uwape wa Apalahama ukeze hali akwa mavungu muli Kristu Yesu; hanga tukatambule chilakenyo cha Spiritu ku Ufulielo.
15Mandumbu, ngunahanjika nikulita ni atu ngwami, Chipwe usendo wa atu tuhu, hindu muze haukolesa, niumwe maulelesa, hanji mawezaho. 16Achi, ahanjikile yilakenyo kuli Apalahama, ni ku munyachi wenyi. Kambile ngwenyi, Ku minyachi, ngwe kuli anji; alioze ngwe umuwika, ngwenyi, Kuli munyachi we, mwenawo Kristu. 17Achi chino ngunambe ngwami, usendo uze aukolesele Shimbu-kanda kuli Zambi, shimbi yino yapwile kulakaji awana a miaka ni makumi atatu a miaka kulutwe, kuyishi kuulelesa, ngwe yikapwise chilakenyo chamokomoko. 18Mumu kachi chihinga muchipwa cha ku shimbi, kuchichi kuhasa kupwa cha ku chilakenyo; alioze Zambi hanachihana ni vumbi kuli Apalahama ku chilakenyo.
19Mba shimbi yaka? Ayiwezele mumu ha Utanguko, ndo we munyachi muwiza, yoze amuhele chilakenyo; ayikolesele kuli angelo, mu kwoko lia chitakanyishi. 20Achi, chitakanyishi hi wa kuli umuwika ko; alioze Zambi iye umuwika.
21Shimbi kevwe yinalimika ni yilakenyo ya Zambi, nyi? Ka, pundu: mumu kachi ahanyine shimbi yize muyihasa kupwisa ni mwono, kachi pundu ululi muupwa wa ku shimbi. 22Alioze yisoneko hiyayika yuma yeswe kushi lia shili, hanga akahane chilakenyo ku Ufulielo kuli Yesu Kristu kuli waze akufuliela.
23Alioze shimbu Ufulielo kanda wiza, atufungile kushi lia shimbi, nikutuyikila ku Ufulielo uze himausolola. 24Chocho shimbi yinapu chifumbe chetu ndo kuli Kristu, hanga akatusambise ku Ufulielo. 25Alioze haliapwila se Ufulielo hiuneza, kutwatwamine nawa kushi lia chifumbe. 26Mumu yenu eswe muli Kristu nuli ana a Zambi ku Ufulielo. 27Mumu eswe a kuli yenu anupapachishile muli Kristu, hinunazala Kristu. 28Kukushi Ka-Yunda hanji Ka-Ngresia, kukushi ndungo hanji mwenya chifuchi, kukushi lunga hanji pwo; mumu yenu eswe nunapu umuwika muli Kristu Yesu. 29Nyi kachi nuli a Kristu, kachi nuli munyachi wa Apalahama ni maswana nikulita ni chilakenyo.
Currently Selected:
A-NGALASHIA 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
