A-NGALASHIA 2
2
1Mba kulutwe lia kumi lia miaka ni miaka yiwana, nakandukile cheka nawa ku Yerusaleme hamwe ni Mbarnavwe, ni Titu nawa wayile hamwe ni yami. 2Nakandukile nikulita ni usolwelo; nikusela kumeso jo sango lipema lize nakwambujola hakachi ka akwa mavungu, alioze ukawetu kumeso ja waze a lufuma, kuchina hanji nguzomboke, hanji nazombokele chizombokela. 3Alioze chipwe Titu, yoze wapwile hamwe ni yami, iye Ka-Ngresia, kamushinjilile kupwa ngalami. 4Alioze mumu hali mandumbu a kwonga aanjishile ku tenga, eno anjilile ku tenga mukutala ngwe ngendeshi utuswilo uze tuli nawo muli Kristu Yesu, hanga akatutwale ku undungo; 5o kutwaatayijile, ngwe kulizeyesa, ka, chipwe ha ola yimuwika; hanga umwenemwene wa sango lipema ukatwame hamwe ni yenu. 6Alioze kuli waze afumanyine kupwa chimwe (cheswacho apwile kunyima, chamokomoko kuli yami: Zambi keshi katonde), waze a lufuma kanguwezele nichimwe. 7Alioze Shinaho, muze amwene ngwe angukunjikile sango lipema lia akwa ulima, chizechene ngwe kuli Petulu lize lia akwa ungalami; 8(mumu yoze walingile muli Petulu ha upostolo wa akwa ungalami, wapwile nikulinga muli yami ha apostolo wa akwa mavungu); 9muze anyingikine vumbi lize anguhele, Tiangu ni Sefwa ni Yoano, waze apwile manguji mu chikungulwila, ahanyine kuli yami ni Mbarnavwe moko ja chindume a kulikunda, hanga yetu tukaye kuli akwa mavungu, o akaye kuli akwa ungalami. 10Chino wika, ngwo, Tukewuluke yiswale; chuma chino chene ni yami nawa nasele mbunge yami kulinga.
11Muze Petulu ahetele ku Andiakia, nalimikine nenyi, meso ni meso mumu iye wahile. 12Mumu shimbu amwe a kuli Tiangu kanda aheta, iye walile hamwe ni akwa mavungu; alioze muze o ahetele, wakatukile nikulihandununa, se wevwile woma wa akwa ungalami. 13A-Yunda akwo alingile ni ulembekese chizechene hamwe nenyi; chocho chipwe Mbarnavwe wahungumukine ku ulembekese wo. 14Alioze muze namwene ngwe kendele nikululika, nikulita ni umwenemwene wa sango lipema, nambile kuli Petulu kumeso ja eswe ngwami, Kachi yena, uli Ka-Yunda, wakwenda ngwe akwa mavungu, hi ngwe Ka-Yunda ko, kuchi te wakushinjika akwa mavungu akende ngwe A-Yunda? 15Yetu se tuli A-Yunda ku chisemewa, hi yivulumunyi ko a ku mavungu, 16hindu nikunyingika ngwetu, Mutu keshi kumusambisa ku yitanga ya shimbi, alioze ha kufuliela Yesu Kristu, chipwe yetu twafulielele Kristu Yesu, hanga akatusambise kuufulielo kuli Kristu; hi ku yitanga ya shimbi ko: mumu ku yitanga ya shimbi kechi kasambisa niumwe. 17Alioze kachi shimbu twafupile atusambise muli Kristu, chipwe yetwene atuwanyine yivulumunyi, Kristu kanapu kavumbi ka shili, nyi? Ka, pundu. 18Mumu kachi mungutunga cheka nawa yuma yize nonwene, kachi mungulipwisa chitanguke. 19Mumu yami ku shimbi nafwile ku shimbi, hanga ngupwe ni mwono kuli Zambi. 20Hananguhachila ha kulusu hamwe ni Kristu; hi yami ko nawa nguli ni mwono, alioze Kristu yoze katwama muli yami; ni mwono uze nguli nawo mu mujimba, nguli nawo mu Ufulielo uze wa kuli mwe Mwana Zambi, yoze wanguzangile, yoze waliechele hali yami. 21Chishi kupwisa vumbi lia Zambi liamokomoko: mumu kachi ululi muupwa mumu ha shimbi, kachi kufwa cha Kristu chamokomoko.
Currently Selected:
A-NGALASHIA 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
