A-NGALASHIA 4
4
1Alioze ngwami, Ha shimbu lize lieswe swana mapwa kanuke, keshi kulipalikila nichimwe ni ndungo, chipwe kanapu mwenewa eswe; 2alioze kushi lia tufufuchi ni tuselo ali, ndo ku mwaka uze aselele tato. 3Chocho ni yetu nawa, muze twapwile twanuke, twapwile mu undungo kushi lia yikuma yamokomoko ya hano hashi. 4Alioze muze miaka yacha Zambi watumine Mwanenyi wa kusemuka kuli pwo, wa kusemuka kushi lia shimbi 5hanga akakule waze apwile kushi lia shimbi, akatupwise ana jenyi. 6Mba se nuli ana, Zambi hanatumu Spiritu ya Mwanenyi mu mbunge jetu, kanatambika ngwenyi, Ta-ta, Tata. 7Chocho hi uli ndungo ko nawa, alioze uli mwana; nyi kachi mwana, swana nawa ku upale wa Zambi.
8Alioze ha miaka yize se kunwanyingikine Zambi, nwapwile mu undungo kuli waze ku chisemewa hi mazambi ko. 9Alioze haliapwila se nunanyingika Zambi, hanji Shinaho Zambi kananunyingika, ngwe kuchi nunatewulukila cheka nawa ku yikuma yamokomoko ya ulelu ni ya uswale, nukalitenge ndungo jayo nawa, nyi? 10Nwakufunga matangwa, ni tukweji, ni yiwanyino, ni miaka. 11Ngunanuvwila woma, kuchina hanji nakilikichile chamokomoko hali yenu.
12Ngunaliumbu kuli yenu, mandumbu, pwenu ngwe yami, mumu yami nawa ngunapu ngwe yenu, kunwangulingile chipi nichimwe. 13Alioze nunanyingika chapwile mumu ha kukokoloka cha musunya nambujolele kuli yenu sango lipema hatangu: 14chize chapwile chuma chikalu kuli yenu mu musunya wami kunwachilelesele, chipwe kunwalitunyinecho; alioze nwangutambwile ngwe mungelo wa Zambi, ngwe Kristu Yesu. 15Chilihi kuwaha chenu? Mumu nakunushindakenya ngwami, Kachi nwahasa, kachi nwatombongwene meso jenu nukangweho. 16Mba hinalumuka mukwa kole yenu ha kunwambulwila umwenemwene, nyi? 17Kakusongojola alioze hi ha chuma chipema ko; kanazange kunuyikila haze hanga nukasongojoke kali ayo. 18Chinawaha kusongojoka ha chuma chipema heswaho, hi ha kupwako yami ko. 19Ana jami akepe, hali yenu nakwivwa yikola ya kusema cheka nawa ndo Kristu matengewa muli yenu; 20Ngunazange kupwa hamwe ni yenu haliapwila, ni kuhipula liji liami, mumu ngunayambashana ha kutwala kuli yenu.
21Ngwambulwilenu, yenu, nwakuzanga kupwa kushi lia shimbi, shimbi kunushi kuyivwa, nyi? 22Mumu chinasonewa ngwo, Apalahama wapwile ni ana aali a malunga: umwe wa kuli ndungo wa pwo, ni mukwo wa kuli pwo mwenya chifuchi. 23Alioze yoze wa kuli ndungo wa pwo, wasemukine nikulita ni musunya; alioze yoze wa kuli pwo mwenya chifuchi, wasemukine ku chilakenyo. 24Yino yuma yinapu chishima: mumu wano usendo waali; umwe wa ku mulundu wa Sinai, kakusema ana ku undungo, iye Hekare. 25Achi, yono Hekare kanapu mulundu wa Sinai, mu Arabia, kanalite ni Yerusaleme yize ya haliapwila; mumu yili mu undungo hamwe ni ana jenyi. 26Alioze Yerusaleme yize ya kwilu hi ndungo ko, iye mama wa yetu eswe. 27Mumu chinasonewa ngwo,
Wahilila, yena mumba, kushi kusema,
Kalumioka, ukololoke, yena kushi kufumbajala.
Mumu ana ja twamishi anji kuhiana,
yoze uli ni mukwo-lunga akehe.
28Achi, yetu, mandumbu, chizechene ngwe Izake, tuli ana a chilakenyo. 29Alioze chizechene ngwe ha miaka yize, yoze wasemukine nikulita ni musunya wahungumionene yoze wasemukine nikulita ni Spiritu, chocho nawa haliapwila. 30Alioze chika chinambe chisoneko? Ngwo, Mbila haze ndungo wa pwo ni mwanenyi: mumu mwana wa ndungo kechi kahinga hamwe ni mwana wa pwo mwenya chifuchi. 31Chocho mandumbu, hi tuli ana ja ndungo ko, alioze a pwo mwenya chifuchi.
Currently Selected:
A-NGALASHIA 4: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
