A-KOLOSU 3
3
1Kashika nyi hananuhindwisa hamwe ni Kristu, fupenu yuma yize yili kwilu, kuze Kristu ali, kanatwama ku chindume cha Zambi. 2Nyongenu yuma yize yili kwilu, hi yuma yize yili hano hashi ko. 3Mumu hinunafu, ni mwono wenu kuwaswama hamwe ni Kristu muli Zambi. 4Muze makasolola Kristu, iye mwono wetu, hohene ni yenu nawa makanusolola hamwe nenyi mu uhenya.
5Kashika shihenu yihanda yenu yize yili hano hashi; ni utanji, ni luchisa, ni kusasaminya, ni usolo upi, ni kuzo, yenayo kukombelela mahamba; 6mumu ha yuma yino utenu wa Zambi kumuwiza hali akwa uhulia. 7Muze mwene ni yenu nawa ha miaka ya kunyima nwendele, muze nwatwamine mu yino yuma. 8Alioze haliapwila mbilenu yino yuma yeswe; ni utenu, ni ufwatulo, ni uhuka, ni kushililika, ni kuhanjika cha sonyi mu makanwa jenu. 9Kanda nuhanjika mahuza umwe kuli mukwo; se hinunazula mutu mukulu hamwe ni yilinga yenyi, 10nunazala mutu mwaha, yoze kanamupwisa mwaha ha yinyingi yeswe, nikulita ni kulifwa cha yoze wamutangile: 11muze kumushi Ka-Ngresia ni Ka-Yunda, ngalami ni chilima, kandaka ni Ka-Seteya, ndungo ni mwenya chifuchi; alioze Kristu iye yuma yeswe, muli eswe.
12Kashika ngwe ana aze hanaatongola Zambi, asandu, waze kanaazange chikolo, zalenu mbunge ja keke, ni utu, ni mbunge ja kulikehesa, ni kushimbika, ni uhomboloji; 13nikulihumikiza umwe ni mukwo, nikulikonekena umwe ni mukwo, kachi umwe munengo a muli nawo mukwo, chizechene ngwe Kristu hananukonekena, chocho ni yenu nawa nulikonekene. 14Helu lia yino yuma yeswe zalenu zango, lize liapwa muya wa ungunu. 15Sambukila ya Kristu yikayule mu mbunge jenu, ku yenayo hananutambika mu mujimba umuwika; pwenu nikusakwila. 16Liji lia Kristu Ukatwame muli yenu lia kulumbama ni mana eswe; nikulilongesa nikulikanyamisa umwe ni mukwo, ni masamu ni miaso ni mimbo ya uspiritu, imbenu ni vumbi mu mbunge jenu kuli Zambi. 17Cheswacho munulinga, chipwe ha liji, chipwe ha chitanga, lingenu yuma yeswe mu jina lia Mwene Yesu, muli iye Sakwilenu kuli Zambi kanda mwe Tata.
18Yenu mapwo, zeyelenu kuli akwenumalunga ngwe chinatambe muli Mwene. 19Yenu malunga, zangenu akwenu-mapwo, kanda nupwa asasu kulimika no. 20Yenu ana, Ononokenu kuli yisemi jenu ha yuma yeswe, mumu chino chinapemena chikolo kuli Mwene. 21Yenu atato, kanda nukehia ana jenu kuchina mahonga ku mbunge. 22Yenu ndungo, Ononokenu ha yuma yeswe kuli waze apwa akakenu nikulita ni musunya; kanda nulingila ku meso wika, ngwe akwa kupemena kuli atu, alioze ni kutuwika cha mbunge, nikwivwa woma wa Mwene. 23Cheswacho munulinga, chilingenu ni mbunge, chizechene ngwe kuli Mwene, hi kuli atu ko. 24Nyingikenu ngwenu, Kuli Mwene mutukatambula chihinga ha kwononona, mumu twakulingila Mwene Kristu. 25Mumu yoze malinga yipi kumakatambula nawa yipi yize hanalingi: ni katonde wakuhi niumwe.
Currently Selected:
A-KOLOSU 3: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
