A-KOLOSU 2
2
1Mumu ngunazange yenu nunyingike ngwe nakulitachika chikolo hali yenu, ni hali waze ali mu Laotisea, ni hali waze eswe kangumwene ku meso, 2hanga mbunge jo jikalilembejeke, ha kulinunga mu zango, hanga akapwe ni kulumbama cheswe cha chinyingi cha malinjekela, hanga akanyingike chijimbikilo cha Zambi, chenacho Kristu, 3yoze muli iye upite weswe wa mana ni yinyingi kuwahengama. 4Chino ngunambe, hanga niumwe kanda anwonga ni maliji a kulembejeka. 5Mumu chipwe chishiko mu musunya, hindu kunguli hamwe ni yenu mu Spiritu, nikuwahilila ha kumona kululika chenu, ni kujikiza cha Ufulielo wenu muli Kristu.
6Kashika chizechene ngwe nwatambwile Kristu Yesu mwe Mwene, chocho endenu muli iye; 7nukatande miji, nukondomoke muli iye, nukalikoleze mu Ufulielo wenu, chizechene ngwe anulongesele, nikulumbama mu kusakwila.
8Kanyamenu kuchina umwe manuhupa ni mana jenyi a kwonga nikulembejeka chamokomoko, nikulita ni ndongo ja atu, nikulita ni manyonga a hano hashi, hi a Kristu ko. 9Mumu muli iye mwatwama kuzala tò cheswe cha Uzambi mu mujimba. 10Ni muli iye kunwazala tò, mwenawo we mutwe wa mawanangana eswe ni yiyulo. 11Muli iye hananupwisa ngalami, ni ungalami hi wa kulinga ni moko ko, ha kuzula mujimba wa musunya mu ungalami wa Kristu; 12se hananufundu hamwe nenyi mu upapachiso, mu wenawo hananuhindwisa nawa hamwe nenyi ku Ufulielo ku kulinga cha Zambi, yoze wamuhindwishile hakachi ka afu. 13Ni yenu, se nwapwile afu mu milonga yenu, ni mu ulima wa musunya wenu, yenu ngwami, Hananupwisa ni mwono hamwe nenyi, se hanatukonekena milonga yetu yeswe; 14se hanajimuna chisoneko cha shimbi ja kutuhisa, chize chalimikine ni yetu: iye hanachichiza lume, nikuchihachila ha kulusu. 15Se hanapupu mawanangana ni yiyulo, waahepwishile kumeso ja atu eswe, nikwakumba nayo.
16Niumwe kanda anupatwila kashika ha kulia, hanji ha kunwa, hanji ha kutwala ku tangwa lia chiwanyino, hanji kakweji mwaha, hanji tangwa lia Sambata. 17Yize yinapu yizulie ya yuma yize muyizaho; alioze mujimba wapwa wa Kristu. 18Niumwe kanda anulimuna kwononona chenu, nikulengumuka ku mbunge yenyi ya kulikehesa, ni kuwayila cha angelo, nikupolongoza mu yuma yize hanamono, nikulifuza ni kunyonga chenyi cha musunya. 19Keshi kukakaminya ku mutwe, kuli iye mujimba weswe, ha kulihoka, nikulinunga ku makonekeno ni mijipa, kuwakutatuka ni kutatwisa cha Zambi.
20Nyi nwafwile hamwe ni Kristu ku manyonga ja uhepuke a hano hashi, kuchi te nwakwenda ngwe nuli a hano hashi, nikulizeyesa ku ndongo jo? 21Ngwo, Kanda nukwata, kanda nupanjika, kanda nusa minwe, 22(yuma yize yeswe muyipola ha kulinga nayo), nikulita ni yambo ni longeso lia atu. 23Yenayo chamwenemwene yinasoloka ngwe mana yikwete mu uwayilo wa kuliyula, ni mbunge ya kulikehesa, ni kumwesa lamba we mujimba; alioze kuyishi tachi ja kukanjisa usolo wa musunya.
Currently Selected:
A-KOLOSU 2: Csa
Highlight
Copy
Compare
Share
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
