A-TESALONIKA 4

1Ha yize yinasala, mandumbu, tunaliumbu, nikunushinjila muli Mwene Yesu, chizechene ngwe nwatambwile kuli yetu, ngwe chize Chanutamba kwenda ni kupemena kuli Zambi, chizechene ngwe nwakwenda, hanga nukalumbamemo nawa ni nawa. 2Mumu nunanyingika shimbi jize twanuhele ja kuli Mwene Yesu. 3Mumu chino we upale wa Zambi, ngwetu, usandu wenu, nukachine utanji. 4Mweswe wa kuli yenu akanyingike kufunga sapa yenyi mwene ni usandu ni ulemu. 5Hi ni kusasaminya cha usolo ko, chizechene ngwe akwa mavungu waze kanyingikine Zambi. 6Niumwe kanda ahiana akavulumune ndumbwenyi ha chuma chino: mumu Mwene iye mukwa kukala yino yuma yeswe, chizechene ngwe twanwambulwilile kulu twashindakenyene chikolo. 7Mumu Zambi hanatutambika hi mukulinga luchisa ko, alioze ku usandu. 8Kashika yoze malituna, malituna hi atu ko, alioze Zambi, yoze wakunwaha Spiritu yenyi Musandu.

9Alioze ha kutwala ku kufwila cha mandumbu, kuchatambile kusoneka kuli yenu: mumu yenwene nunalongoloka kuli Zambi kulizanga umwe ni mukwo; 10mumu chamwenemwene nwakuzanga mandumbu waze eswe ali mu Masendoniya mweswe. Alioze tunaliumbu, mandumbu, nukalumbamemo nawa ni nawa; 11nukeseke chikolo kuhola ni kulinga milimo ya yenwene, ni kukilikita ni moko ja yenwene, chizechene ngwe twanwambile; 12hanga nukende ngwe chinalite kuli waze ali haze, hanga kunuchi kahona nichimwe.

13Alioze kutwazangile nukalajale, mandumbu, ha kutwala kuli waze hanayi tulo; kunuchi kevwa chinyengo ngwe akwo waze keshi kutalatala. 14Mumu nyi hinafuliela ngwetu, Yesu yafwa, yahinduka, chocho waze nawa hanayi tulo, Zambi, kuli Yesu, kumakaaneha hamwe nenyi. 15Mumu chino tunambe kuli yenu ku liji lia Mwene ngwetu, Yetu tuli ni mwono, tunasala ndo ku kuheta cha Mwene, kutuchi katetekela nichimwe waze hanayi tulo. 16Mumu Mwene, iye mwene, kumakahulumuka mwilu, ni liji lia mutambi, ni liji lia mungelo wa lutwe, ni chitavwi cha Zambi: ni afu muli Kristu kumakalianga kuhinduka. 17Mba kulutwe yetu, tuli ni mwono, twasala, kumakatupindumuna hamwe no mu malelwa, mukutakana ni Mwene mu tetela: chocho mutukapwa matangwa eswe hamwe ni Mwene. 18Kashika lilembejekenu umwe ni mukwo ni maliji ano.

Currently Selected:

A-TESALONIKA 4: Csa

Highlight

Copy

Compare